餐廳嘅環境幾悠閒，枱櫈嘅編排唔太逼，有啲前後排嘅位更加設透明屏風，予人感覺更安心。不過，入門口時，遇到位好大隻嘅阿姐啲態度就麻麻，有啲嘢想問咗先決定晌唔晌度食，佢就淨喺不停重覆又重覆叫你掃描「安心出行」先（當時只喺企晌門口近收銀位而已），咁如果我最終唔晌度食，咁又掃嚟做咩啫。其後，問佢攞啲凍水就黑口話無，俾咗杯超熱嘅熱水，擺明玩嘢。
反正快手快腳食完就走，都唔同佢糾纏嘥我哋時間。除咗門口展示出是日午餐之外，落單都喺數碼化，用手機落單，不過，我就覺得至少俾個餐牌方便啲客睇睇，再者，有啲上年紀嘅無智能手機，或者唔太識用手機睇餐牌嘛。
餐具、餐紙、糖包……等，用個小藤籃裝住，放晌枱邊，無遮無掩，衛生就梗喺無咁理想。最後，我哋簡單啲，都喺叫咗「常餐」（$60），定價比出面啲茶記貴。
農場炒蛋、火腿、香腸、牛油厚多士（常餐） 點睇，都唔覺得塊多士厚囉，不過，啲蛋確喺炒得滑溜，好有蛋香，而火腿亦有煎過，無話白烚，食落亦唔喺啲平價貨，至於香腸用上啲豬肉腸，而唔喺平價嘅雞肉腸，算有誠意架嘢喇。
沙嗲牛肉麵（常餐） 老友嘅主食就要公仔麵，佢就話啲沙嗲牛肉幾得，除咗個沙嗲夠香、夠惹味之外，啲牛肉好腍滑，又好有肉香，應該喺有質素嘅貨色；至於啲公仔麵，OK啦，無過腍，無餬到，老友話已經可以收貨！
瑞士雞翼撈通粉（常餐） 沙嗲牛不時都食，反而瑞士雞翼少食，撈通粉都未試過。賣相好似幾好，但得兩隻雞翼感覺總喺覺得少咗啲，而味道確實喺唔錯嘅，酸酸甜甜好入味，通粉亦煮得有啲咬口，但既然撈通粉，喺咪應該俾多少少汁呢！
熱奶茶 老友就可樂配沙嗲牛麵，咁至夠爽，而小弟都喺忠於熱奶茶。奶茶嘅色澤幾對辦，入口茶味芳香，茶底真喺唔錯，茶奶嘅比例亦啱啱好，就算稱唔上絲滑，亦唔失禮。
食完都只喺抖多一陣就再出發，費事又被嗰個阿姐黑我哋面。其實，嘢食OK，味道唔錯，喺用餐嘅感覺唔好啫！
個人評分
味道：8/10
環境：6/10
服務：5/10
抵食：7/10
平均每人消費：HK$60
味道：8/10
環境：6/10
服務：5/10
抵食：7/10
平均每人消費：HK$60
餐廳資料：
香港地 Hong Kong Day
東涌慶東街1號東堤灣畔3座地下25號舖
2981 9938
香港地 Hong Kong Day
東涌慶東街1號東堤灣畔3座地下25號舖
2981 9938
沒有留言:
發佈留言