時代冰室 Times Cafe：期「代」落空

老友話太子開咗間「時代冰室」，知小弟都幾喜歡茶記嘢，就趁星期日完咗崇拜落去食個午餐，反正我又未幫襯過。始終食晏時段，真喺幾旺場，都要等一陣先有位，不過茶記有樣好，嚟得食嘢嘅人都真喺食完就走，唔會坐得耐，快上快落，故就算等位都唔會耐。

門口擺咗啲餐牌晌度，所以，晌等候期間，就睇定食乜好。午市選擇都幾多，乜餐物餐就標準設定架啦，仲有午市套餐、「蒸」選套餐、小菜套餐……等等，當然，啲款式麵喺晌茶記見慣見熟嘅嘢。

卒之有得入，第一感覺喺絕對逼，啲4人卡位喺迷你型，一般中等身材嘅就坐到4個，想擺埋背包就好「抆水」，如果有個肥少少嘅，一邊位就真喺坐唔落多一個。

餐具、調味料全部都喺放晒晌枱側嘅抽櫃中，呢種已喺茶記嘅常規設定。友人話呢度啲常餐好得，叫我試吓，咁就一於常餐啦，都好期待架。

例湯

我哋雖然揀咗常餐，只包餐飲，不過，啲侍應喺唔喺都擺低碗例湯。雖然，飲完都唔喺好知咩湯，感覺似喺青紅蘿蔔煲豬骨之類，因為湯內一粒渣都無，最緊要唔好太肥都無所謂啦。

自家叉燒湯意粉、火腿奄列、牛角包（常餐）$50

呢個喺友人嘅常餐組合，先嚟火腿奄列及牛角包，佢話啲奄列唔錯，蛋皮薄薄哋，裡面有唔少火腿，灑咗少少紫菜粉感覺喺唔同啲，但牛角包就麻麻，未夠酥香，加上無烘熱，外皮無脆口感。

至於碟叉燒湯意粉就OK啦，無話有咩特別，啲叉燒屬瘦叉，口感都鬆化，至少唔會「嚡烚烚」，不過呢，意粉嘅口感只算喺勉強OK，因為有微微過腍嘅跡象。

招牌沙嗲牛麵、3.6牛乳炒蛋、丹麥多士（常餐）$50

小弟就揀3.6牛乳炒蛋搭丹麥多士，依家間間都話炒滑蛋，但真正炒得全面都滑就好少有，都只不過打咗蛋落鑊就收火，連攪拌都慳番，只喺有啲未熟嘅蛋漿而已，見到蛋心位置都熟到透。件丹麥多士反而唔錯，外皮有酥脆感，包心好軟熟。

沙嗲牛麵則果然不失招牌之名，啲沙嗲做得香濃惹味，牛肉亦好腍滑，湯底加入沙嗲汁，自然香好多，麵條亦算喺爽口，比上面嘅意粉做得出色好多。

熱奶茶

餐飲就要咗小弟慣常嘅熱奶茶，茶色亦好對辦，但入口茶底就唔覺得好幽香，奶味亦相對淡咗少少，口感亦未見好細滑，不過，又唔可以講喺差，只可以講喺不過不失而已。

食物算喺中上，不過，環境比較逼，招呼亦麻麻哋，好似有種催你快啲食完快啲走嘅感覺，可能飯市旺想多做幾輪生意，定價計落比附近嘅茶記就貴少許，依家晌出面食嘢度度都咁上下，平唔得去邊。

個人評分
味道：7/10
環境：6/10
服務：6/10
抵食：8/10
平均每人消費：HK$50

餐廳資料：
時代冰室 Times Cafe
太子長沙灣道21-25號地下A號舖
2318 1663