一支公就當然揀中排啲二人枱，兩邊四人卡位就留俾大枱客。枱上簡單咁只放咗醬油同筷子而已，送上嘅玄米茶頗香，而負責招呼嘅幾位店員都喺女性，溫文有禮，不時主動添茶。
打開餐牌，選擇非常之多，先喺店家嘅推介，此外，仲有即製蛋品料理、沙律、小食、多款壽司及刺身、特危卷物、熟食便當、刺身丼……等等，以及主打外賣嘅壽司拼盤。
晌入門前，已見門口棟咗個木餐牌，有幾款是日推介，平平哋都可以試吓。
而有留意到，牆上仲會寫出最新返嘅飛機貨，就好似是夜到訪，見有深海池魚、原條秋刀、愛爾蘭及蘇格蘭嘅新鮮生蠔。
除咗以上嘅散點菜式，並推出咗3款晚市優惠嘅二人套餐，定價$288-$528，正所謂豐儉由人，平有平食，貴有貴食。
Omakase十貫極上壽司 $168 講到「廚師發辦」，向來都喺極高消費嘅項目， 但店家都有兩款「廚師發辦」式嘅壽司拼盤，分為10貫同13貫，雖然唔喺坐晌席前座，睇住師傅逐件壽司做，但用料靚之餘，當中都有以特色嘅魚生入饌，兼且整體賣相極為亮眼，就連芥末都喺鮮磨貨色，非現成貨。以下就逐件逐件跟大家分享，始終唔喺坐晌席前座，店員亦無特別介紹壽司嘅款式，見佢哋好忙招呼客人都無打擾問長問短，而小弟又唔喺咩壽司達人，如有講錯請多多包涵。
北海道帆立貝壽司 單哋睇件凡立貝，又大又厚肉，潔白如雪，就知好嘢嚟，喺刺身級嘅帆立貝，加少少蟹籽，賣相就更好睇。放入口，嗰份軟綿綿嘅感覺，的確令人印象深刻，而且，味道非常鮮甜，絕無欺場。
火灸紋甲魷魚壽司 平時真喺極少點魷魚壽司，因為心態上覺得普通嘛，而這個紋甲魷魚，通常都喺深海捕獲，試過又真哋改觀晒。魷魚鎅晒花，輕輕火灸，鎅紋就更明顯，顯出師傅刀功，咬落好柔軟，帶少少煙韌感，卻清爽可口。
黑松露鯛魚壽司 印象中，都好少魚生配上黑松露，又睇睇呢個組合喺點。鯛魚外觀好新鮮，色澤亮麗，亦鎅咗少少花，順帶一提，佢哋魚生嘅溫度攤得啱啱好，唔會太凍。入口肉質細膩，味道鮮甜，油脂唔太重，並散發出黑松露嘅幽香，OK喎。
油甘魚壽司 一撮紅紋喺其標記，應該無估錯啩！油甘魚喺刺身、壽司嘅常客，同樣色澤光亮，唔會暗暗啞啞，喺新鮮度嘅明證。切得厚薄均一，入口魚味足，又柔嫩，口感帶少許爽。
三文魚腩壽司 近年都少咗食三文魚，都無話咩特別原因，只喺見到有特別款式都會試吓啲新嘢而已。件三文魚都好靚，腩位就自然更加肥美，而且，呢度嘅魚生都切得幾厚身，落刀唔手緊，講番件三文魚腩，油脂十足，肉質亦緊緻，都具質素。
中拖羅壽司 眾所周知，吞拿魚都分好多部份，赤身、拖羅，而呢件就似喺中拖羅，因為色澤嫩嫩嘅粉紅，又有豐富嘅油脂，且分佈平均，卻唔似大拖羅多得咁緊要。入口感覺喺油分適中，魚味濃郁，挑剔位喺感覺有少少筋，但整體仍覺得好食。
火灸左口魚邊壽司 好老實，10件壽司中，呢一件真喺估唔到喺咩，尤其全件火灸晒，真身都無得睇，純粹晌餐牌中推介手握壽司裡面推敲出嚟。食落喺點呢，咬落有陣陣油香，肉質帶點煙韌，卻又有種爽爽脆脆嘅口感，加上塗上啲芝麻醬，感覺幾得意。
原隻甜蝦壽司 隻甜蝦非常大隻，而蝦頭並放埋晌拼盤之上，以示原隻，童叟無欺。甜蝦外觀好晶瑩剔透，好新鮮嘅感覺，一口咬落去，口感好爽，非常鮮甜，更喺有濃郁嘅蝦鮮味，真喺掂喎。而師傅握出嚟嘅壽司飯飯粒唔太大，啱啱好一口一啖，鬆軟唔死實。
三文魚籽軍艦 拼盤中有兩款軍艦，算喺比較大路嘅軍艦款式，先試三文魚籽，啲三文魚籽幾新鮮，卜卜脆咁，食落有陣陣海水嘅鹹鮮味咁。不過，啲紫菜就唔喺好得，腍咗！
加拿大海膽軍艦 見餐廳嘅刺身中，標示喺加拿大海膽，所以，都推算呢一件軍艦嘅海膽都喺嚟自加拿大，落嘅份量都唔少，且堆得滿滿，色澤無話暗啞，而入口又確喺幾甘香豐腴，質感綿密細膩，喺啲紫菜唔脆而影響整體感覺。
茶碗蒸 $20食咗咁多所謂「生冷嘢」，來一客簡簡單單嘅茶碗蒸暖暖胃。印象中，都好似未遇過啲難食嘅茶碗蒸，今次所品嚐嘅茶碗蒸都有水準，蒸蛋本身非常滑溜，且甚具蛋香，底下有唔少蟹柳絲。其實，晌門口個推介餐牌上，有提供黑松露茶碗蒸，賣$48，並有買一送一優惠，但無理由我一個人食兩客茶碗蒸架！
晌門口收銀櫃位前，砌咗個樂高積木嘅壽司檔屋台，見幾得意，拍下留個念而已！
雖然唔喺真正嘅「廚師發辦」，但百零蚊食到10款有質素嘅壽司，都幾唔錯。區區都總有啲隱世小店，「山下無雙」都算喺，否則，以咁吊腳嘅位置而言，你都唔會見到有人企晌門口等外賣，室內亦有唔少客人啦。
個人評分
味道： 8/10
環境： 8/10
服務： 8/10
抵食： 8/10
平均每人消費：HK$207
味道： 8/10
環境： 8/10
服務： 8/10
抵食： 8/10
平均每人消費：HK$207
餐廳資料：
山下無雙日式料理 Uniquesushi
葵涌石籬大隴街103號昌榮樓地下1號舖
9543 9874
山下無雙日式料理 Uniquesushi
葵涌石籬大隴街103號昌榮樓地下1號舖
9543 9874
沒有留言:
發佈留言