尚茶 In 喇沙：霸氣喇沙

因為有小組聚會要過返嚟葵涌，出咗葵興地鐵站嚟到光輝圍一帶睇吓有咩好嘢食，行經一啲舊商場仔，晌商場門口位棟咗個「全隻龍蝦喇沙」嘅廣告牌仔，好吸引喎，好奇入去睇睇賣幾多錢，嘩！只賣$76，唔喺啩，齋食隻龍蝦都唔得啦，所以，別無他想，一於就豪一豪龍蝦喇沙。

走入商場，行兩行就見到間鋪，全名叫「尚茶 In 喇沙」，切頭都唔明，後尾再睇睇餐牌，原來喺賣台式茶飲+星馬越麵食。鋪面就一眼睇晒，呢啲小店主力都喺做啲街坊外賣生意。

不過，亦有做堂食，鋪面側旁就有少少枱櫈，但個商場本身喺無乜冷氣，如果天氣熱就唔多好坐，天氣涼就無所謂。

此外，隔離仲有個鋪位，喺堂食嘅專用區，裡面裝修好簡單，一字長形，一邊卡位，一邊吧位，房尾掛咗個大電視，唔喺播電視台啲節目，而喺不斷播啲卡拉OK歌，成個卡拉OK房。

雖然小店一間，所賣嘅食物就實喺唔好睇小佢，有喇沙系列、撈檬系列、越南特色湯粉、咖喱撈麵、飯系列、咖喱飯系列、特別小食……等等，選擇非常之多。而且，飯系列會奉送例湯，跟餐所有飲品有半價。上文都提及過小店主力賣台式飲品，如珍珠奶茶、水果茶就唔少得，仲有多款不同嘅系列，包括奶茶系列、純茶系列、水果芝芝、抹茶系列、鮮奶系列、水果椰爆系列，定價相宜。

龍蝦喇沙 $76

店主話我好彩，因為啲龍蝦喇沙每日都限量供應，賣晒就無，但今日供應商晏咗嚟貨，否則都一早賣晒，佢更補充多句，如果打算嚟食，可以事前打過電話查詢仲有無貨，或者索性留定。

果然，堅喺全隻龍蝦，有相你睇，童叟無欺，折開啲蝦肉，唔單止啖啖肉，仲非常爽口彈牙，口感一流；

喇沙另外碗上，做得亦無欺場，一來份量足，二來個喇沙湯底真喺做得好有風味，濃郁鮮香，呷一啖，淡淡椰香慢慢滲出，夾雜富層次嘅香料味；

配上參參，即油麵加米粉，夠地道啦，仲有雞蛋、豆卜，完全無將貨就價嘅感覺，相反，簡直喺超值大放「餸」，完全超越平靚正嘅境界。

粒粒鳳梨芝芝冰 +$18

食喇沙，配杯凍飲就正晒，加上點咗主食，飲品都只需一半價錢啫。呢一杯粒粒鳳梨芝芝冰喺推介之一，加上小弟本身都好鍾意菠蘿系飲品。大大杯，色澤鮮黃，下層喺加咗啲菠蘿粒粒嘅菠蘿沙冰，面層喺一層芝士奶蓋。啜一口沙冰，涼透心兼菠蘿味突出，再啜一啖面層嘅奶蓋，鹹鹹哋，卻柔滑細緻，兩者混和再飲，又有唔同嘅風味，讚呀！

今次算喺舊區尋到寶，食完就知好，其實，葵涌區屬於舊社區，但卻不乏有質素嘅小店。

個人評分
味道：9/10
環境：7/10
服務：8/10
抵食：9/10
平均每人消費：HK$94

餐廳資料：
尚茶 In 喇沙
葵涌葵涌道1001號德昌大廈地下14號舖
9131 4331