餐廳位處大美督尾，隱身於村屋堆中，仲要上段小斜路，本應唔易搵，好在村口有啲易拉架指示點樣入去。由於餐廳開晌村屋嘅地下層，所以，地方唔太大，人多起上嚟都有啲逼，但勝在都叫企理，感覺都舒服嘅，而且，啲裝修有少少家居感。
餐具嘅擺設都唔馬虎，而午市提供應三道菜嘅套餐，包括了迷你沙律吧、是日餐湯、主菜，包基本啡茶，視乎所揀嘅主菜來定價（$158-$188），好就好在唔收加一。 題外話，餐牌全英文，而且，寫得好專業。整體嚟講，招呼都幾唔錯，招呼我哋位哥仔都好好禮貌，餐枱嘅擺設都唔馬虎，媲美一啲高級餐廳 。
蟹肉伴青瓜 呢一道期菜喺餐牌無嘅，仲要用個小雀籠送出嚟，大廚話喺俾啲驚喜客人，的確好有心思。賣相咁精緻，又額外多咗，客人自不然開心。一片青瓜薄片墊起新鮮嘅蟹肉沙律，入口清新又清爽，蟹肉又非常鮮甜，真喺俾到啲驚喜。
迷你沙律吧 沙律吧就近晌入門口位，衛生關係，全部都以透明膠蓋冚住。「迷你」都喺指數量、款式唔太多意思，但其實都有齊沙律菜、3款醬汁、煙三文凱撒沙律、紅菜頭、新薯、烤南瓜……等等，用料有質素，啲瓜果又鮮甜，所以，前後都食咗兩份沙律。
麵包籃 送上麵包籃就知會跟住送上餐湯，個麵包籃麵有特色喎，除有啲蒜蓉百吉包，仲有兩大片自家製香蔥意大利薄脆，口感非常脆口，又有微微蔥香，喺幾得意。
黑松露忌廉湯 餐湯都唔喺普通嘢，睇樣都覺得唔差，入口果然有濃郁嘅黑松露香氣，而且，口感頗滑溜，飲得出絕對喺誠意之作，
Oven Baked Japanese Kurobuta Pork Chop $178 雖然叫做焗豬扒，但都做得有點花巧，唔喺聽師傅介紹番，都唔知隱藏咁多心思。先喺外觀整出嚟幾靚仔，好有種大餐廳出品嘅「範本」。而心思位就喺先煎封，再塗上麵包糠、芝士後拎去焗，日本黑豚嘅質感本身就有啲點爽脆感，焗過後味道又寧舍香，加上豬扒富肉汁，整體真喺唔錯。
Grilled US Beef Rib Eye $188 另一主菜烤肉眼都做得好靚仔，肉眼燒至焦香，伴有清爽嘅時蔬。要5成熟，切開一睇，做到啱啱好，裡面色澤嫩紅。小試一口，外層焦脆，裡面嘅肉質非常腍滑，卻有濃郁肉香，極富肉汁，沾上小小法式芥末，肉味更突出。
凍咖啡、凍檸檬茶 餐飲就無咩特別要求，都喺基本嘅凍啡、凍檸茶，至在踩單車，有得解吓渴。不過，咖啡本身都醇香，而檸茶茶底亦不俗。
雖然位置隱世，但亦有唔少客人幫襯，而且，聽落店員、大廚跟客人對話，就知喺熟客，可能都喺住晌附近嘅街坊客，再者，餐廳外可能自助泊車，方便到啲揸車客，趁假日入嚟大美督行吓，食番餐。
個人評分
味道：9/10
環境：7/10
服務：8/10
抵食：8/10
平均每人消費：HK$185
味道：9/10
環境：7/10
服務：8/10
抵食：8/10
平均每人消費：HK$185
餐廳資料：
R&Y's International Cuisine
大埔汀角路大尾篤村145號地舖
6360 9058
R&Y's International Cuisine
大埔汀角路大尾篤村145號地舖
6360 9058
沒有留言:
發佈留言