入到餐廳內，裝修都喺好基本，木枱木櫈，勝在夠光猛，牆上掛上印有大象嘅布簾，以及象頭嘅掛燈，就算喺較有泰式嘅裝飾。此外，雖然枱櫈擺得都闊落，但防疫措施就欠奉，因為客唔多，客人就自動走位坐開啲。實際上，成個午餐時段都無乜人。
好似啲茶記咁，枱側有個抽櫃，餐具、飲管放晒入去，但望落就有啲雜亂無章，放得好隨意。
午市有午餐供應，全部都喺泰式食物，有廿多款，定價$50-$55，所謂包嘢飲，原來喺紙包飲品，轉汽水加$3，轉龍眼冰加$5，此外，就唔見話可以轉其他嘢飲喇。
泰式青咖喱牛肉飯 $50 向來泰式嘅紅咖喱、黃咖喱、青咖喱都頗有特色，所以，選咗個青咖喱，配牛肉（仲有豬肉或雞肉可揀），好快就上枱，完全喺泰式碟頭飯。份量都好足，除有牛肉，仲有青豆角同茄子。啲青咖喱幾香，好重九層塔香味，且頗有辣勁，好彩有杯龍眼冰頂一頂，而啲牛肉比較削，相反，茄子就未腍，仲喺硬硬哋，感覺唔太OK。
泰式雞肉炒金邊粉 $50 睇番以前啲食評，發覺原來我哋食泰國菜時，都幾經常揀泰式炒金邊粉，近乎70%選佢，可能第一觀感喺佢好有泰式風味。呢度啲碟頭好大，碟金邊粉都唔例外，啲金邊粉炒得都夠濕潤，卻唔會黐埋一嚿嚿，味道酸酸甜甜，又俾咗好多花生碎增添風味，個粉炒得唔錯嘅，少少出事喺啲雞肉，雞肉嘅份量多，但老婆就話有陣陣雪藏味，可能小弟要求低，又唔喺好覺得啫！
龍眼冰 +$5跟餐要咗包「維他」蘋果綠茶，另外一杯轉咗龍眼冰，個糖水底一般般，感覺總喺少咗陣純香味，而龍眼一食就知罐頭貨色，因為無乜龍眼肉味，得朕甜味，而且，得三幾粒咁大把。唯一夠凍，幫我解辣，哈哈！
附近都有其他泰式菜館，且風評唔差，左右更有其他茶記，一樣款多價錢平，所以，睇唔到「龍泰」有咩亮點，個人感覺恐怕都做唔長！老婆更加多句，絕對唔會有下次！
個人評分
味道：3/10
環境：6/10
服務：6/10
抵食：7/10
平均每人消費：HK$55
味道：3/10
環境：6/10
服務：6/10
抵食：7/10
平均每人消費：HK$55
餐廳資料：
龍泰小廚 Dragon Thai Kitchen
葵涌青山公路葵涌段476號鴻運樓地舖
3462 2567
龍泰小廚 Dragon Thai Kitchen
葵涌青山公路葵涌段476號鴻運樓地舖
3462 2567
沒有留言:
發佈留言