講到燈效，每張枱上方都有條拱形木柱掛上小波燈，非常別緻，而另一吸晴嘅燈飾，就喺大大個「月亮」高高掛。環境好，都要有好招呼，整晚嘅用餐嘅感覺非常之好，上菜速度、換碟、添水、收拾……基本上都無咩挑剔位！
除咗環境靚，餐碟亦如藝術品般，成晚無論用餐嘅餐碟，抑或載食物嘅餐碟，色彩、圖案都甚富地中海風情，正正附合番餐廳嘅路線。
咩路線？其實，一入門口就見到一個開放式嘅大冰櫃，擺放咗多條魚獲，就有少少提示佢哋主打時令海鮮，旁邊嘅黑板就寫上當日時令魚獲有啲咩魚，以及價錢。事後經理嚟到介紹餐牌時，才知魚獲都喺專人即日捕釣返嚟，非常新鮮。
再睇埋餐牌，及經理嘅詳細講解，「Osteria Marzia」所走嘅路線就喺賣意大利沿海地區嘅美食，選用時令嘅意大利食材及新鮮嘅海鮮入饌，有生或熟嘅前菜、沙律、熱盤、熱鍋菜式、不同煮法嘅烤魚菜式；經理更特別點出，意大利麵亦喺自家製作嘅新鮮貨色，絕對跟一包包意大利麵煮出嚟嘅感覺好唔同。
White Wine (Regaleali Bianco) $98以白酒嚟襯海鮮就喺最好嘅配搭，雖然小弟本身唔好酒，但淺酌一下都無問題，而經理就專登介紹咗一款甚易入口嘅白酒俾我哋，色澤晶瑩，果然喺易入口，口感好清爽，而且，酒精度亦唔算高，配次後幾道鮮魚菜式，真喺襯晒。
Bread & Butter 先登場喺自家烘焙嘅酸種麵包，以及伴有鯷魚及鮮牛油，麵包以扒爐燒過，一條條坑紋表示出製作嘅誠意，令到入口有少少煙燻香，而麵包嘅質感好有韌性，單喺塗上鮮滑嘅牛油已好好食，更襯托出其麥香；唔怕鹹少少嘅，可以伴少少鯷魚，包你覺得好有「海洋」氣息，哈哈！
Amuse Bouche通常食法國菜先有「Amuse Bouche」，我譯佢為開胃小品，佢又唔算頭盤嚟，就好似上酒樓食中菜時，一坐低就擺低幾小碟酸菜、花生咁，等客人過過口癮。而餐廳提供嘅開胃小品喺水牛芝士配蕃茄，再加少少青醬。啲蕃茄好鮮甜，而水牛芝士好綿滑，食過水牛芝士都知佢喺味淡，小弟就一於將佢哋嚟配麵包食，都好正。
Hamachi $248 前菜來一客鰤魚，之前食「廚師發辦」算喺遇過一次鰤魚，其實，鰤魚就等同油甘魚變成咗大人，咪以為大條咗就會肉質嚡，實際佢算喺頂級食材，而且，好講時令。大廚以橄欖油拌勻，加入少少羅勒調味，伴以沙律菜及車厘茄，泛紅嘅魚身食落口感鮮滑細膩，油脂豐腴，羅勒嘅香氣更能突出魚鮮味。
Sgombro $258 再來的一客鯖魚，喺一客半生熟嘅菜式，賣相做得好精緻，將鯖魚煎至半生熟，外皮焦香，再伴以意大利鄉村芝士（Buffalo Ricotta）、洋蔥及無花果。魚肉鮮嫩富油香，夾雜着芝士嘅鹹香、無花果嘅清甜，味道多變而有層次。
Chitarra $318 既然經理都提特別提到，又點可以錯過店家嘅意大利麵。「Chitarra」，晌網上查過，有譯佢為「手工吉他麵」，因為源於晌製麵過程中，通過一種類似吉他琴弦嘅器具嚟切割，姑勿論名稱喺點，形狀就有啲似烏冬版嘅意大利粉，比較粗身，所以，非常煙韌有咬口，好有口感；加上伴以波士頓龍蝦肉，仲要非常之多，每一炷麵又掛滿汁，真喺極之好食。
Red Snapper $578 經理推介咗紅鯛魚，靚啲又平啲，上文都有講過有幾種唔同嘅整法，如簡單嘅燒烤、西西里式、鹽焗，而我哋選咗一種可以譯為意式嘅水煮（acqua pazza），當然唔會見到花椒、辣油之類，而喺用上車厘茄、蒜蓉、羅勒，再加上新鮮嘅大蜆去烹煮條紅鯛魚，所以，整道菜都充分海洋氣息。
經理俾我哋影完相之後，仲會晌旁邊嘅餐車之上，起肉拆骨，再上枱，等我哋食得更方便。而魚肉紮實得嚟保持嫩滑，而且，極有魚味，車厘茄吊起一份清新感，大蜆入口又極為鮮甜，用料絕對有質素。當然，底下嘅湯汁亦可以飲埋去，喺非常鮮！
Gelato呢度好多嘢都自家製，就連雪糕都喺，經理就請咗我哋試試佢哋自家製嘅牛奶意式雪糕，跟想像中一球球唔同，差啲以為喺乳酪。啲雪糕好軟滑，牛奶味勁濃郁，而且，灑咗啲開心果仁碎，更增添風味。
Brutti ma Buoni除咗個意式雪糕，仲送咗幾粒意式曲奇俾我哋試試，佢話個意大利名稱解作為「ugly but good」，可以譯為意式焗杏仁蛋白餅，的確，其貌真喺不揚，但又幾好食，口感煙煙韌韌咁，帶有好濃嘅杏仁香味，襯咖啡應該一流。
今晚，多道都喺魚鮮嘅菜式，各有不同做法，可以講喺精彩美妙嘅一餐，跟以往食嘅意大利菜真喺好唔同。不得不讚店員嘅態度好好，好有禮，對食材、煮法都好熟悉，讓小弟亦長了不少知識。
個人評分
味道：9/10
環境：9/10
服務：9/10
抵食：8/10
平均每人消費：HK$880
味道：9/10
環境：9/10
服務：9/10
抵食：8/10
平均每人消費：HK$880
餐廳資料：
Osteria Marzia
灣仔菲林明道41號芬名酒店地舖
3607 2253
Osteria Marzia
灣仔菲林明道41號芬名酒店地舖
3607 2253
沒有留言:
發佈留言