Boring?!：消費解「悶」

今晚老婆要上堂，小弟亦唔想煮，所以，等佢放學後出街食，消消費推動吓經濟。過到葵芳新都會，我哋都好方便，返屋企兩個站就到。晌新都會遊上遊落打個轉，睇睇有乜好食，最後嚟到「Boring」，因為見幾人氣，仲要稍稍等位，加上有啲套餐組合，好抵喎，值搏率高呀！

餐廳環境四四正正，裝修走北歐簡約風，輔以一啲植物作點綴，而客人都喺以年輕人居多。由於要等老婆放學，所以，8:30pm先入座，仲喺坐滿全場。原來8:45pm截單，9:30pm閂鋪，好彩趕得徹。

基本嘅餐具、餐紙，以及簡單嘅調味料，都已放晌餐枱之上，自由取用。

餐廳提供嘅晚餐，喺一種好有彈性嘅自由組合，定價$208-$406，從A類嘅意大利麵或意大利飯，再配B類嘅主菜系，並送上一客小食，餐飲喺基本嘅茶啡，但可以額外加錢升級為特飲。我哋喺A+B組合，送埋小食跟餐飲，都喺$238，而以下標示嘅價錢為散點價。

此外，仲有一版全日供應嘅單點餐牌及甜點餐牌，睇落定價真喺幾親民。

白酒煮青口 $45

先嚟一客小食，眾多小食中，呢一款喺廚師推介之一，由於喺小食關係，一客只有5隻，夠讓客人過過口癮。青口都好大隻，質感亦唔差喎，好軟熟，卻唔會韌到唔唔開，而最正喺啲白酒忌廉汁，好香滑，好微微嘅酒香而已，如果跟啲法包就好喇，唔使嘥咗啲忌廉汁。

虎蝦墨魚汁意大利飯 $118

意大利飯就最能試到師傅嘅手勢，雖然墨汁意大利飯「黑鼆鼆」個樣就極之唔討好，但勝在有「內涵」。實際上，啲意大利飯煮得夠濕潤，口感煙韌，不過，味道就淡口咗少少；然而，隻虎蝦就好有睇頭，大大隻，肉質亦爽口彈牙，可惜得一隻，有少少唔夠喉，哈哈！

香草牛油汁伴本菇燒春雞 $128

本來就好想試香橙百香果汁伴三文魚，因為老婆超鍾意百香果，可惜三文魚賣晒。燒春雞都有興趣試，春雞燒得好靚仔，外皮金黃，已切成兩大件，方便食用，咬落果然好香脆，肉質亦好嫩滑，而且，好有肉汁，唔會燒到乾晒，沾上啲香草牛油汁就更加正；除有啲本菇，仲有啲薯仔粒，炸得金香。

熱情果奶昔 +$12

好耐無飲過奶昔，而加$12可轉特飲，小弟覺得轉奶昔或沙冰喺性價比最高。無百香果三文魚，都試番杯熱情果奶色，咪睇佢好似白雪雪，都好有熱情果嘅果香味，打得滑身，入口好順滑，味道唔錯。

熱情果梳打 +$12

老婆都喺要咗杯熱情果系嘅飲品，不過，就喺熱情果梳打（少冰），因為太夜，都唔太敢飲花茶。佢就話杯梳打好晶瑩，望落去幾靚，熱情果味都幾酸香，不過，佢見原價喺賣$48，一心一意有啲期望喺用新鮮嘅熱情果嚟做，不過，睇落唔見熱情果籽就應該喺用果漿做。

整體食物做得唔錯，店員亦好有禮，餐碟收拾亦快手，同埋，定價真喺好相宜，咁食法都唔使三嚿水。事後再上網睇睇，原來黃埔都有店，咁嗰邊嘅朋友又有個好選擇。

個人評分
味道：8 /10
環境：8 /10
服務：8 /10
抵食：9 /10
平均每人消費：HK$145

餐廳資料：
Boring?!
葵芳興芳路223號新都會廣場2樓270-271號舖
6293 9281