Taste Gourmet Group：嚐味‧秋夕月餅

今年真喺食元餅唔多，除咗之前友人送嘅、老婆公司送嘅，其次就喺同家人中秋聚一聚時，交換吓啲月餅嚟試試。不過，仲有一盒喺贈品嚟，不過，一直未開，中秋翌日放假，就開嚟當下午茶。月餅嚟自「嚐 · 高美集團」嘅出品，可以到旗下餐廳換取，最近我返工點就喺過嚟試上環「浦和」拎，順便借個版位出篇食評。

產品嘅名稱為「嚐味•秋夕月餅」（$268），包裝非常高貴得體，仲附送一小盒四季春茶葉，啱晒跟月餅一同享用。

盒內共有3款口味月餅，包括流心奶黃月餅、京都宇治抹茶月餅、蛋黃白蓮蓉月餅，每款兩個，都喺必然嘅獨立包裝。個個都屬於迷你裝，正好一次過兩公婆樣樣都試試，又唔會搞到太滯肚。

迷你流心奶黃月餅

流心加奶黃，算喺依家大流行嘅款式，因為唔似蓮蓉咁甜，口感綿密富蛋香。加上有啲蛋黃流心餡，自然相得益彰，而呢個做出嚟有水準喎。

迷你京都宇治抹茶月餅

夠膽註明用上京都宇治抹茶，當然唔會差得去邊，睇見色澤墨綠，而入口抹茶味非常濃郁，後績嘅餘韻帶微甘，整體又唔太甜，幾好食。

迷你蛋黃白蓮蓉月餅

呢一個就傳統款式，白蓮蓉好清香，算少甜版本，餅皮鬆化，唯一要挑剔喺蛋黃嘅油水麻麻，望落都見唔太起油，然而，整體味道算唔錯。

正所謂人月兩團圓，今年中秋算好天氣，月亮伯伯都又亮又圓，加上疫情緩和好多，市面嘅氣氛都唔錯，但願風調雨順、國泰民安！

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
Taste Gourmet Group
https://www.tastegourmet.co/