山區裡的走走趯趯: 鮨夢 Sushi Yume：「鮨」味午餐

2021年6月22日星期二

鮨夢 Sushi Yume：「鮨」味午餐

一般嚟講，食午餐都喺比較簡簡單單啲，但今日就有啲唔同，有人請，就食得豪少少。專登嚟到灣仔麥加力歌街嘅「鮨夢」，位置有少少隱蔽，不過，由太源街直行再轉入小街就喺，唔難搵。店面以木條做成嘅小屋，再加張小長木櫈，好有日本小店風格，睇落都有種食好嘢嘅感覺。

踏進餐廳，地方唔喺好大，但一派和風格調，裝修雅致。一張L形板前席，喺食「廚師發辦」嘅最佳位置，因為可以睇到師傅切魚生嘅刀功、揑壽司嘅手勢，以及跟佢哋嘅互動。

高腳櫈下面有藤籃，方便客人擺放背包或手袋。由於我哋嚟得早，未有客人，亦見到師傅整理緊剛剛空運到貨嘅刺身。

上文先講完地方唔喺好大，原來樓上仲有多幾張枱，更有個個室，想靜侷啲嘅朋友就啱晒！待疫情消退後，夠人多，包晒上層嚟聚一聚，不知幾開心呀。

晌呢啲中高檔餐廳，除咗環境，餐具及服務都喺值得留意嘅一環。一碟、一杯都好古雅；而服務方面，都好熨貼，侍應落單時會先問問有無嘢唔食得，或食物敏感，態度既有禮，又不時為我哋添茶及收拾餐具。師傅上菜嘅速度，亦喺恰到好處，令人用餐感到悠閒唔急促。

講番午市有咩選擇，一共10款，定價由$128到$488，有平有貴，豐儉由人，全部都包咗前菜、沙律、味噌湯及茶碗蒸，而我哋就揀咗中價嘅#6（壽司定食併角切魚生飯）及#10（特上魚生飯丼）號餐。不過，剛巧遇到蒸爐壞咗，菜碗蒸做不了，店長不斷抱歉之餘，就額外多送甜品及飲品俾我哋。

堅果沙律、博多茄子

安座不久，就送上沙律、前菜，沙律就簡簡單單嘅田園沙律伴點堅果碎及藜麥，下點柚子醋汁，清新開胃；而前菜喺炙燒過嘅博多茄子，雖然未見好花巧，但食得出質感喺好綿滑，無一啲粗嚡嘅纖維感，喺有質素嘅食材。

味噌湯

熱湯喺傳統嘅味噌湯，好多時定食都喺用佢，雖然無咩帶嚟驚喜，但平實、麵豉味香濃，濃而不濁，湯內更有唔少昆布同豆腐粒，暖和一下腸胃，以近接小弟嘅魚生飯丼。

特上魚生飯丼 $258

都話坐板前席好，睇住信師傅整我碗魚生飯丼，一大盤魚生揀啲靚嘅、揀手嘅，切好一片又一片放上飯面，而啲日本壽司飯已經以落咗少少醋，微微嘅酸香，飯粒軟糯好食。

講返個魚生飯丼，一張烏瞰角度相就睇晒8款魚生，由9點位順時針數落去（亦喺由淡至濃嚟計），有牡丹蝦、海鱲、伊佐木、金目鯛、赤身、中拖羅、三文魚籽及海瞻，全部食材都喺由日本空運過嚟，新鮮而有光澤。今次就唔逐件逐件夾開嚟影啦，因為好似無咁靚，所以，就唔逐件嚟評，不過，就食到各款魚生非常鮮咩，當中嘅海鱲及伊佐木印象中都喺第一次食，後者更有種爽爽哋嘅感覺，中拖羅質感綿滑，油脂更喺恰到好處，此外，海瞻真喺好鮮甜，堅喺食到一陣陣甜味。

壽司定食併角切魚生飯 $288

先上咗碗角切魚生飯俾老友，信師傅就話雖然啲角切魚生大部份都喺噚日飛機貨所用剩嘅所謂頭頭尾尾，不過，佢哋都會好好冷凍保存，相差一日質素唔差得幾遠，而且，所用嘅魚種級數亦唔差，如金目鯛、赤身、池魚、鰤魚……等等，所以，絕無欺場。故此，老友都讚個飯有質素，魚味鮮。而有時間嘅話，信師傅更話啲壽司可以逐件上，做到好似食「廚師發辦」咁。