加藤屋 Katoya：「加」常便飯

完咗聚會，落到太子搵食，依家算喺少嚟太子，加上只喺食晏，所以，都無乜心水話想食乜，全權交俾朋友揀。而走到嚟近太子室內運動場一帶，查實選擇都幾多，睇睇吓，就揀咗「加藤屋」，友人想食日式牛丼，小弟就純粹因為想食吓日式咖喱。 

由鋪面到室內，一室鮮黃色，非常搶眼。裝修簡約，走年輕路線，但間隔其實有少少逼，靠塊膠板擋一擋咁啦，不過，呢個現像依家都隨處可見，大部份人都接受咗。

感覺「加藤屋」就有啲似「吉野家」嘅茶記版，都喺主打日式牛肉飯，但選擇層面就多好多，一大版飯類已經有成18款選擇，此外，仲有鐵板飯、和風咖喱飯、鍋物、驚喜價小食……等等，飲品方面就比較港式啲。各款主食，都配麵豉湯、16oz汽水或玄米茶，但轉其他熱飲、凍飲都要加錢。

泡菜麻辣牛肉飯 + 麵豉湯 $49

老友食得吓辣，揀咗碗又泡菜，又麻辣嘅牛肉飯，不過，穩陣起見，揀咗中辣而已，但佢話已經好夠刺激，啱啱好合佢胃口。佢仲話，啲牛肉幾嫩滑，而且份量夠多，飯粒軟熟好食。麵豉湯就叫OK啦，唔算好濃郁，但都夠麵豉味。

和風咖喱豬扒飯 + 忌廉 $46

小弟就一心想入嚟食咖喱，所以，縮窄咗範圍晌和風咖喱飯系列裡面。豬扒用吉列做法，油炸嘢幾時都咁得人歡心，外層甘香鬆脆卻唔油賺，肉質亦軟腍富肉汁，但最搞笑啲咖喱汁多到可以當湯飲，咖喱唔辣，反而帶少少甜品，喺和風咖喱嘅特色，撈飯確喺幾正。

食咖喱，配冰凍嘅汽水就最夾，不過，後尾留意到牆上有張告示，話環保關係，飲品唔會主動提供飲管，不過，小弟杯忌廉一嚟到就插住咗啦，哈哈！

今日快快手手又一餐，味道唔錯，無驚喜，但夠穩陣，就正如一餐家常便飯。

個人評分
味道：7/10
環境：6/10
服務：7/10
抵食：8/10
平均每人消費：HK$46

餐廳資料：
加藤屋 Katoya
太子花園街232-242號黃禮賢大廈地下M號舖
2363 7488