可可豬海南雞專門店 Cocopig Hainanese Chicken：滄海遺「豬」

住晌東區嘅老友知我都幾鍾意食星馬菜，佢早前試過間小店，主打星馬菜，就推介俾我，老實講，炮台山、北角一帶好少過嚟，所以，佢介紹嘅小店就一直未有光顧。直到最近，要過嚟呢頭整機，就順便會一會呢一家「可可豬」，睇吓喺咪咁正先！

走到麥連街，原來附近有唔少食店，而「可可豬」喺一個角位。鋪面唔喺好大，而裡面亦都唔大，只喺得幾張枱，明顯主要就喺做外賣生意。雖然店內裝修簡單，但就掛上好多油畫小作，都畫得幾靚架。晌等候期間，見買外賣嘅人都非常多，睇住一個接一個，尤其依家疫情，就更多喺外賣客。

門口楝咗個推介餐牌，有選擇困難症嘅人，晌度揀就最簡單。否則，就可慢慢研究吓個餐牌有咩心水想食。見佢有啲單張攞，就索性掃描出嚟俾大家參考，基本上，有主食（飯、麵湯米）、小食、蔬菜、甜品，以及一啲特色飲品，定價都好相宜。

葯膳醉雞配白飯 $53

可惜，無晒海南雞呀，店員話佢哋嘅葯膳醉雞都好唔錯。返到屋企，一打開盒蓋，陣陣葯膳香味一湧而出，再細味，就會嗒得到微微酒嘅醇香。雞件咬落好嫩滑，且好有雞鮮味，皮下脂肪又少，雞皮仲好爽口，葯味同酒香都入晒肉，真喺唔錯。

驚嘆黑蒜醬燒豬軟骨飯 $58

個名好勁，就睇你點驚嘆，哈哈！呢個黑蒜汁好惹味，雖然表面睇落油淋淋唔多討好，但就幾正吓，蒜香味濃郁就唔使多講，最正喺香得嚟唔霸道，撈飯一流。而啲豬軟骨就炆得軟腍，肉質非常鬆化，一咬即開，啲黑蒜汁又入晒味。

養生秋葵 +$15

嗌主食可以加錢配小食或飲品，秋葵就最合老婆心水，。秋葵切成細細件，只喺簡單加咗少少豉油嚟調味，而秋葵輕灼仲帶少少爽脆感，細嚼就會有種黏糯感。

金羅漢果養生茶 +$15

我就鍾意飲吓凍飲，所以，加配咗一款幾特別嘅羅漢果茶。我就唔知有咩成份，不過，單張有寫：金羅漢果，菊花，杞子同陳皮，從樽身都睇到真材實料，入口確喺幾正，感覺清甜、好潤、好清涼，飲落令人好舒服。

今次緣慳一面，下次有機會真喺要試試佢啲特色椰香海南雞飯，以及其他小食。

個人評分
味道：8/10
環境：6/10
服務：5/10
抵食：8/10
平均每人消費：HK$70

餐廳資料：
可可豬海南雞專門店 Cocopig Hainanese Chicken
北角炮台山麥連街1A號寶榮大廈地下I號舖
2242 6388