如果一個人嚟，最正喺餐廳尾嘅吧枱位，有大窗對住街景，唔使面壁，又有種自成一角嘅感覺。
餐廳採用半自助形式，即喺晌收銀處落單，俾個號碼牌你放晌枱上，等店員將食物送上。所以，餐廳正中央有個自助區，放咗好多餐具、餐碟、餐紙、紙杯、各種調味料……等等，自由取用。
晌門面貼咗一張海報，亦喺晌其他人食評見到時，考慮嚟呢度嘅原因為之， 因為老婆喺食嘢講健康嘅人。張海報寫住店家主打賣歐洲健康美食，使用嚴選優質食材，並以意大利橄欖油烹調，無添加味精。
而食物選擇方面，有兩個主餐牌，一款叫「全日套餐」，包意式蔬菜濃湯配迷你牛角包、配菜（8揀1，有熱盤，有冷盤）、主菜（5款供選擇），而定價以主菜計，$68-$218，當中春雞及豬仔背骨有唔同份量揀，整體嚟講彈性都幾大，雖然唔包飲品，但有特價加配優惠。
另一款叫「晚市套餐」，包意式蔬菜濃湯配迷你牛角包、田園沙律、主菜（10揀1），定價同樣以主菜計，$88-$108，亦唔包飲品，但有特價加配優惠。餐廳全日都無加一，所以，真喺幾實惠。結果，我哋就點咗一客全日套餐，兩客晚市套餐。
飲品方面又點呢？都選擇多多，定價都唔貴，如果揀意式咖啡，相信喺自動咖啡機製作（因為晌自助區有成部自動咖啡機晌度），反而，較有特色喺啲西班牙無醇汽泡飲品及西班牙果汁。
意式蔬菜濃湯配迷你牛角包、田園沙律先喺一次過送上熱湯、牛角包、沙律，呢一款意式蔬菜濃湯喺老婆最心水，酸香健康，內有好多蔬菜，味道不俗，而牛角包都幾酥脆，富牛油香，如能再烘得熱啲就更正，至於沙律就只喺簡單嘅沙律菜加點油醋，OK咁啦。
烤法國無激素春雞（半隻）$108全日套餐揀咗半隻春雞，貪佢既喺嚟自法國，又標明無激素，喺有營之選，焗得外皮金黃，雖然喺春雞咋，但都幾大隻。入口外皮香脆，皮下脂肪少，肉質比預期嫩滑，調味都唔錯，唯一挑剔位喺賣相過於簡單，基本喺無咩點搞賣相，我諗擺半粒車厘茄搭少少蕃茜都會靚仔好多。
焗素千層麵全日套餐嘅配菜有啲揀錯，一心一意諗住揀個素食俾老婆，但又千層麵，又珍珠米飯，太多澱粉類。再者，睇樣好似幾正，但啲千層麵內層唔夠汁底，焗得乾身，口感有啲硬，真喺麻麻哋。
托斯卡納乾蕃茄意大利粉 $88對比個千層麵，呢碟意大利粉正好多，雖然只喺得啲乾蕃茄，但一來啲意大利粉煮得啱啱好，既油潤，又咬口，二來啲乾蕃茄味道好濃郁，食得出喺靚貨嚟，簡單嘅配搭，味道卻喺出奇地清新。
墨西哥烤雞肉焗珍珠米飯 $98另一個晚市套餐揀咗有個飯底嘅墨西哥烤雞肉，依個抵食，因為有好多墨西哥烤雞肉，而且，雞肉烤得有啲焦香，兼好味道極之惹味，珍珠飯亦好軟熟，值得推薦。
西班牙無醇汽泡白葡萄桃子汁 $18、西班牙青蘋果果汁 $13平常茶茶啡啡飲得多，今次見有啲西班牙果汁供應，加配又唔喺貴，所以，自己就揀依一款白葡萄桃子汁，味道幾清新，有陣陣果香味，而且，喺有汽嘅飲品，入口更爽。
餐廳都有甜品供應，有咩款式？放晒晌收銀機下嘅凍櫃，一眼睇晒，呢一晚就只得兩款，標價為$38，唔貴，所以，索性試晒兩款。
朱古力榛子碎餅 $38平常多半喺芝士蛋糕、慕絲蛋糕之類，但今次嘅蛋糕，睇外觀有啲似美式嘅焗餡餅。最底層覺得似喺用消化餅加榛子碎倣嘅餅底，中間一層就填滿咗軟心嘅朱加力漿，然後頂層喺軟軟哋，但又好挺身嘅蛋糕，整體食起嚟，口感甚具層次，食味亦都不俗。
自家製紅桑莓朱古力心太軟 $38初時以為紅桑莓喺指會擺啲裝飾，但個心太軟賣相就只喺得件心太軟，無咩伴碟，而食落朱古力味夠晒香濃，但就唔喺好覺有紅桑莓嘅味道，而且，個人就覺得焗過籠咗少少，所以，裡面嘅朱古力漿唔喺好流。
除咗個千層麵之外，其餘嘅菜式都做得唔錯，而且，定價相宜，份量又足，食到我哋3個非常之飽。雖然喺半自助，基本上都無咩服務可言，但至少送菜、收拾都交足功課，店員嘅態度亦好有禮貌！
個人評分
味道：8 /10
環境：7 /10
服務：7 /10
抵食：8 /10
平均每人消費：HK$135
味道：8 /10
環境：7 /10
服務：7 /10
抵食：8 /10
平均每人消費：HK$135
餐廳資料：
J’s Bistro
荔枝角長順街15號D2 Place二期1樓102號舖
2477 2088
J’s Bistro
荔枝角長順街15號D2 Place二期1樓102號舖
2477 2088
沒有留言:
發佈留言