忠誠茶座泰國菜 Chung Shing Thai Restaurant：茶座「忠」影？

天氣好，一到周末，唔喺行山，就跟老友踩單，今回又跟老友出車，由大埔踩入大美督，食完晏再兜過去三門仔，然後經大埔海濱公園返大埔，條線好踩、輕鬆。雖然天氣幾熱吓，但踩住車感覺喺OK嘅。正午到大美督，亦喺最熱嘅時段，最好喺食晏嚟「避暑」，食咩老友話事，佢哋最熟地頭，最後揀「忠誠」，因為有啲算喺抵死嘅粉麵，一陣仲要踩車，唔方便食太飽。

老友話咪被個名呃咗，唔好以為叫「茶座」就好似嗰啲椰林樹影下，撐住啲太陽傘，景色一流嘅環境，入到裡面，查實同茶記無咩分別。呢度勝在樓底高啲，枱櫈又排得梳，最緊要夠涼快，尤其啲咁嘅天氣。正正因為天氣熱，拉落晒啲膠膜箍住啲冷氣，近路邊位更無晒剩餘丁點嘅茶座感。

由於餐廳主力喺賣泰菜，所以，無論午市嘅碟頭飯餐，抑或麵餐，都有唔少泰式風味嘅選項，當然，地道嘅港式嘢都有啦。雖然話喺茶記格調，但收費絕對比市區嘅茶記貴一截。

不過，我講飯餐或麵餐都有啲錯，因為，基本上喺唔包嘢飲，嘢飲需另外加錢，普通熱飲加$6，凍飲或汽水加$9，幾款特飲更加到$15。如果單睇張飲品餐單，「忠誠」真喺當自己喺茶座，一杯鹹檸七標$42。

泰式牛丸河 $32

老友點牛丸河，佢話雖然叫做泰式，但個人嚟講，真喺同食港式嘅牛丸河無咩分別，牛丸紮實卻彈牙，有肉香。

泰式魚蛋河 $32

咁小弟就揀魚蛋河，明顯魚蛋嘅外貌跟港式嘅好唔同，扁啲，長啲，形狀都喺其次，最緊要好唔好食。味道OK嘅，唔喺溝粉貨色，但就唔及港式嗰啲咁爽彈；河粉夠滑溜，份量足，算做足基本。

南乳豬手米 $45

另一老友就揀豬手麵，比我哋嘅粉麵貴多十幾蚊，但睇份量就大碗好多，單喺豬手都有成5大件，佢就話豬手炆得腍，又夠入味，富南乳香。

凍咖啡 +$9

今朝早餐無飲咖啡，所以，晏晝呢餐有配額，整番杯冰凍嘅凍咖啡。一嚟到就先扯咗半杯，因為，外間天口「慶」到不得了。港式咖啡嘅質素，夠醇香，奶量亦啱啱好，此時此刻，最緊要喺夠凍夠大杯，爽晒。

整體嚟講，環境OK，食物OK，服務都OK嘅，因為，嚟得呢度，當喺去咗茶記，咁茶記你都唔會有啲咩服務上要求，基本唔漏單，無出錯嘢，店員態度唔會唔友善，都已經OK啦。

個人評分
味道：7/10
環境：6/10
服務：7/10
抵食：8/10
平均每人消費：HK$39

餐廳資料：
忠誠茶座泰國菜 Chung Shing Thai Restaurant
大埔汀角路大尾篤村69B-72號地下
2664 5218