Paul Lafayet：大師手藝

我嘅強積金無樣好，就喺生日或一啲節日，都會送上小禮物，今次就喺Paul Lafayet嘅蛋糕券，雖然只喺一件，但都喺一番心意嘛，有啲嘢都唔喺必然嘅。IFC有分店，食完晏就過去換，等下午茶時段鬆一鬆，嘆一嘆！

望住個餅櫃，可以講喺琳琅滿目，選擇故然多，更喺款款蛋糕都做得漂亮，賣相精緻，而每一款手藝蛋糕都喺賣$50，所以，今日嘅下午茶喺富貴下午茶嚟。

高檔次即喺高檔次，雖然只喺一件蛋糕，仲要喺免費換領嗰種，由包裝袋到包裝盒都寧舍大體，不過，就真喺幾唔環保。問店員有無細啲嘅包裝盒，可惜喺無嘅。

特濃朱古力脆餅 $50

其實咁多款蛋糕，真喺心大心細，樣樣都想試，不過，最後，見呢一款朱古力脆餅似乎手工多而繁複，加上特濃朱古力嘅口味，估計性價比喺最高。

打到包裝盒，細看蛋糕嘅層次，由而下，最上層嘅朱古力片、唧成球狀嘅71%朱古力慕絲、再一層光滑嘅鏡面黑朱古力、71%軟心黑朱古力及法式朱古力杏仁蛋糕，層層相間，交替而成。

每個部份獨立食，都喺一種滋味，有香滑，有軟韌，有脆口，口感各有個性，而味道帶出朱古力唔同嘅韻味，非常有層次；一次過幾個部份放入口中，嗰種互相影響所產生嘅化學作用，更晌口腔內出現一片鼓動，絕對喺叫朱古力「粉絲」們難以抗拒嘅滋味。

大師級出品即喺大師級出品，一件餅就食得出師傅嘅心思、手藝同創意。

個人評分
味道：10/10
環境：7/10
服務：8/10
抵食：8/10
平均每人消費：HK$50

餐廳資料：
Paul Lafayet
中環港景街1號國際金融中心1樓1104B舖
2543 9800