走進餐廳，蠻富有氣氛，柔和嘅燈光，細密嘅格仔地磚，以及一幅幅揭示當地人嘅生活作品，都令到整體環境幾有特色。而最特色喺右邊設咗個半開放式廚房，因為我哋坐近門口，睇唔到師傅做菜，但就不時聽到炒菜嘅「鑊氣」聲，更不時聞到炒菜嘅香味，真喺有種未食先興奮嘅感覺。
此外，餐枱嘅擺設都好別緻，尤其一張紅色寫咗泰文嘅布餐巾。由於蘇豪呢區，光顧嘅喺外藉人士居多，而侍應全部都喺外藉人士，所以，外語滿場飛，所以，都有少少錯覺以為身處外地。
仲有，枱上有支初時以為喺香薰嘅東西，因為喺深藍色，外觀型格，原來喺噴霧式消毒酒精。
餐牌簡簡單單有兩大版，一版喺食物，如泰式街頭小食、湯品、沙律、飯麵、蔬菜、肉類、咖喱及甜品，以蘇豪區而言，呢度嘅定價喺較為相宜少少。
另一版唔使多講就知喺酒水啦，尤其呢一區，賣酒喺頗搵錢嘅一環，除啤酒、紅白餐酒、有汽酒之外，唔飲得酒嘅朋友可以好似我哋咁，揀啲無酒精雞尾酒，或者果汁、椰青。
順帶一提，餐廳仲有一種「廚師發辦」套餐，就喺當你唔知選擇揀咩好時，可以以$268 / 位嘅價錢（唔包酒水），由餐廳安排，保證食到飽。雖然話乜都喺餐廳安排，但都會詢問吓你意見，有咩唔食得，建議完菜式後，有邊款唔多啱食，都可以稍作調整，唔使諗，但又有啲彈性。（註：以下嘅價錢就杯示番散點價俾大家參考。）
Calamansi Lime Soda $48 柑橘加青檸，聽到都覺得爽啦，老友話加咗成兩個青檸，夠晒落本，入口唔止陣陣冰涼，仲酸爽過人，但唔會一味得個酸字，柑橘嘅清香味亦好突出，配沙嗲同炸雞翼，真喺一流配搭。
Pineapple and Ginger $48 小弟稍稍鍾情菠蘿，所以，就揀呢杯菠蘿配薑汁嘅組合，由於薑味唔會太嗆，所以，飲落仍有份從菠蘿而嚟嘅清甜感。題外話，佢哋提供嘅喺紙飲管，夠環保。
Chicken Satay、Crispy Chicken Wing $98 餐牌就要獨立點，無雙拼嘅選項，但我哋揀咗「廚師發辦」套餐，就可以以人頭咁樣安排，並配上相襯嘅醬汁。
雞肉燒得香口，帶少少燶邊，咬落肉質幾嫩，且保持肉汁，唔會「乾崢崢」，沾上滿滿花生香嘅沙嗲醬，食落就更惹味。
而雞翼炸到非常甘香，一咬咔嚓作響，外皮真喺勁脆，卻喺一啲都唔油膩，肉質嫩滑，沾上甜酸醬，味道更具層次。
Spicy Papaya Salad $78 喺一款泰菜好常見嘅沙律款式，爽脆嘅青木瓜絲加入好多配料，如花生粒、鹹蝦乾、車厘茄、豆角粒，並以魚露作調味，所以，鹹鹹香香，口感豐富，越食越醒胃，正好中和一下之前嘅沙嗲同炸雞翼。
Soft-shell Crab Pad Thai $148 呢個炒金邊粉都頗有特色，一人分咗半隻軟殼蟹先，再將啲金邊粉跟豆腐乾、花生碎、蛋絲、芽菜、蔥度……等等撈勻，再灑上青檸汁。金邊粉炒得爽身，唔會黐埋一嚿嚿，加上青檸汁就更添清新，味道亦好唔錯；而軟殼蟹炸得又喺香而不膩，軟軟綿綿，面頭加咗少少蔥油，幾得意，整體亦頗有驚喜。
Stir-fried Morning Glory $78再落嚟就喺一道炒通菜，雖然無飛天，但單喺聽到廚房「蓬蓬蓬」嘅炒菜聲，不時更火光熊熊，就夠晒「氣氛」。通菜炒得非常夠鑊氣，口感仲帶少少爽脆，好有蒜香，帶微辣，喺一道頗香濃惹味嘅炒菜。
Yellow Chicken Curry $158本來想一試個青咖喱，但店員就話比較辣，建議我哋試試個黃咖喱雞飯。的確，個黃咖喱都真喺唔錯，香辣得嚟唔嗆喉，辣度亦點都即止，而且，加入咗少少椰奶，有陣陣椰香，撈飯一流。而店員特別說明佢哋喺用上無激素嘅有機雞肉，既嫩滑，又食得更健康，底下仲墊有薯仔同甘筍，沾滿咖喱汁就特別好食。
Coconut Ice-cream $68甜點喺椰子雪糕，咪以為就咁幾球椰子雪糕，一來雪糕喺自家製，椰子味濃郁又自然，而最特別喺面頭淋咗啲糖漿，鹹鹹甜甜，糖味好純厚，又有陣焦香，再睇番個餐牌，原來喺海鹽棕櫚焦糖漿，加埋少少花生碎碎，真喺第一次食椰子雪糕食得咁招積，但就好好食。
都真喺好耐好耐無嚟到蘇豪，尤其上到咁篤嘅伊利近街，眼見唔少餐廳關門大吉，剩得低嘅，可以講喺汰弱留強。香港已好多日無本地確診，但願清晒零之餘，唔好再有第幾波，以及疫情全然消退，令香港回復番應有嘅活力。
個人評分
味道：9/10
環境：8/10
服務：8/10
抵食：8/10
平均每人消費：HK$350
味道：9/10
環境：8/10
服務：8/10
抵食：8/10
平均每人消費：HK$350
餐廳資料：
Soul Food Thai
中環蘇豪伊利近街26-30號地下
2177 3544
Soul Food Thai
中環蘇豪伊利近街26-30號地下
2177 3544
沒有留言:
發佈留言