甜心麵包 Honey Bakery：有所保「榴」

屋企附近有家麵包店「甜心麵包」，主要都喺賣港式包，做做街坊生意，定價都喺街坊價，而且，每逢3:00pm後，都會麵包特價，買二送一，咁早就已經開始特價，仲有仲有不斷新鮮出爐嘅麵包，絕對唔喺單單清貨尾，所以，都幾多街坊幫襯。我哋有時懶得焗麵包（麵喺用麵包機而已），就會間唔時幫襯吓！

有睇小弟嘅食評都見，不時行完山、踩完單車去茶記，大多數都喺嘆個菠蘿油+熱奶茶。最近，發現「甜心」出咗款榴槤菠蘿包（$8.5），都幾有興趣想試，所以，就趁有日唔整包，就落去買嚟當早餐。

老婆嘅吞拿魚包就唔多講嚟，都喺一貫港式常見嘅款式，而小弟嘅榴槤菠蘿包呢，切開睇睇，中間都有一大嚿軟綿綿嘅榴槤餡。由於唔喺一整嚿喺榴槤果肉，大概溝咗啲吉士呀、奶粉呀……之類啩，所以，喺有榴槤嗰陣陣「飄香」，但入口嘅榴槤味就唔算好重，叫做OK咁啦。然而，鬆脆嘅外皮、軟熟嘅包身都保持番一貫嘅水準。

雖然，個榴槤包唔似出面一啲主打或專做榴槤食身嘅產品咁多驚喜，但過吓口癮，貪吓新鮮，試試無妨。

個人評分
味道：7/10
環境：7/10
服務：7/10
抵食：7/10
平均每人消費：HK$8.5

餐廳資料：

甜心麵包 Honey Bakery
美孚景荔徑8號盈暉薈1樓107-108號舖
2770 1308