Ninetys：「九」負盛名

大概兩年半前幫襯過「Ninetys」，嗰時佢應該喺第一間店，開晌灣仔合和斜對面，睇番當時嘅食評，總結喺無論食嘅，飲嘅，都嚐得到高水準嘅出品，加上環境唔錯，招呼又到位，做飲食嘅，永遠都喺要靠食物做得出色先喺長「九」之計。眨吓眼，原來已開到第3間店，仲開咗嚟中環，就晒我啦，可以過嚟食餐晏仔。

「Ninetys」喺一家帶澳洲風嘅咖啡店餐廳，天花密集嘅烏絲燈，襯以水泥牆，一室工業風嘅型格裝修。鋪前有兩張甚搶手嘅「露天茶座」位，而入到餐廳內，首先見到喺圍住水吧嘅高腳吧枱位，最啱一個或兩個嘅客人，尤其喺諗住嚟打書釘、嘆咖啡。

再行入啲，一邊就喺啲二人枱，相信都喺因為限聚令，先改成全部都喺二人枱；另一邊，就喺開放式廚房，專登擺埋啲砂煲罌罉出嚟，更有大型廚房嘅氛圍，並睇到師傅做菜嘅模樣，午市時段，更有緊張感，好似睇緊「地獄廚神」個節目咁。

近門口，接待處旁，仲設置咗個貨架，有啲咖啡相關嘅物品作零售，如咖啡豆、咖啡杯。

枱上已放有一樽加入一整條備長碳嘅清水，咁做有咩好？備長碳嘅吸附力強，可以吸收水中嘅氯氣及雜質，相反，又將其水溶性礦物質釋出，令清水都變成無雜質嘅礦泉水。 

翻一翻餐牌，相信都有唔少食物轉咗，但基本上，頭幾頁喺飲品，包括各種咖啡、茶品、果汁、特飲、手工啤……等等，都喺全日供應。

而食物方面，會分為白天及黑夜，指嘅喺供應時間，前者供應由8:00am到5:30pm，後者則6:00pm開始至9:30pm，而呢個時段嘅選擇亦多好多。

Sassy Belly $148

晌餐牌中發現幾款新品，有肉亦有素嘅，以呢一款豬腩肉最感興趣，睇餐牌，豬腩嚟自波蘭，配菜仲有意大利青瓜、茄子、燈籠椒及水煮蛋，感覺都非常豐富。實際嚟到，賣相都好吸引，豬腩肉都燒到帶焦香，真喺睇到都流口水。

先試啲腩肉，本應腩肉都有唔少肥肉部份，不過，入口又無想像中咁肥膩，但不失油香，而肉質卻頗為鬆化、軟腍。

水煮蛋呢，煮都啱啱好，一篤開，啲蛋黃澎湃咁湧出嚟，蛋黃好香腴、濃郁。

幾款配菜，都以鹽、黑椒稍作調味，扒燒過嚟，絕無hea做，食味不俗，唔會話好「寡」。

Latte $42

上次試Flat White，今次就要杯Latte，其實大同小異，只喺奶泡跟濃縮咖啡嘅比例不同。而佢哋嘅咖啡分為choco blend及fruity blend，小弟就鍾意後者多啲。咖啡送嚟時以小木盤盛載，仲有一小碟果仁。首先咖啡嘅表面好平滑，拉花花紋細緻，圖案又對稱，完全無攪過，入口口感卻均勻順滑，味道醇香細膩，就知用豆有質素，沖泡嘅手勢又好。

唔想咁行貨，抄番同一段總結，不過，「Ninetys」啲出品又確喺有質素，招呼又熨貼，樣樣都做得一絲不「九」，就算喺咁嘅時勢，一樣開分店，又一樣咁有嘅支持，就足證佢哋嘅實力。

個人評分
味道：9/10
環境：8/10
服務：8/10
抵食：7/10
平均每人消費：HK$209

餐廳資料：
Ninetys
中環些利街2-4號地舖
2701 0883