對上一次到訪「聆渢咖啡廳」已經喺2013年嘅事喇，對其環境、食物都有好好嘅印象，時隔8年再臨，感覺一樣都好唔錯，地方唔會覺得好殘殘舊舊，室內地方企理整潔，喺疫情關係，餐枱數量嘅編排少咗，間隔嘅距離大咗，一側嘅落地大玻璃對出就喺開揚嘅園林景，加上陽光斜照，予人感覺舒服。亦因為疫情加強咗管理，所以，室外絕大部份嘅用餐區都停用，而且，餐廳對二人限聚令都執得好緊，唔會「求其」加塊膠板就俾3、4個客人坐埋一齊，對一啲親子家庭要分開坐感到無奈啲，只希望疫情盡快完，大家可安心出行。
餐廳主要喺供應早午晚自助餐嘅，而今次個主題下午茶本應安排晌酒店嘅「海岸扒房」餐廳享用，但依家平日所有餐飲都安排晒晌酒店嘅「聆渢咖啡廳」，其他餐廳都只晌星期六、日先營業。講番個下午茶，平日同星期六、日嘅主題有啲唔同，單價亦有分別，但同樣有好多嘢食，呢個餐單喺晌官網下載出嚟俾大家參考，好似我哋所食嘅「綠茶派對」下午茶就有成5款鹹點、7款甜點，非常豐富，真喺「綠綠」無窮，包埋餐飲，散點要$428 + 10%（兩位用），差唔多等同個住宿計劃嘅一半價值喇。故此，當我哋嚟到餐廳，見唔少客人都喺買咗呢個住宿計劃，嚟到嘆下午茶。
晌官網無相片介紹，但睇餐牌，第一個印象會喺英式下午茶一類嘅三層架，又或類似嘅層架，但當經理捧住整「盤」下午菜過嚟時，又真喺有份驚喜。因為主題喺綠茶，鹹點、甜點當中亦有唔少喺和風食物，所以，整份下午茶用番和風造型就好貼切，再者，不論鹹點、甜點，都小巧的骰，賣相精緻，放到琳瑯滿目，更讓人萬分期待。
上文都講過餐廳對防疫都好上心，入門口量體溫、提供酒精搓手啫喱都喺基本，餐枱與餐枱之間保持一段距離，仲有個細節位喺餐具都額外多用一張餐紙巾蓋好，無論實際成效有多大，至少讓客人多添幾份安心。
照燒雞肉菠菜漢堡包配香草醬 迷你漢堡已成為英式下午茶嘅常客款式食物，不過，呢款話漢堡，但似潛艇多啲，夾有一大件香滑嘅照燒雞肉，味道唔錯，而且，個潛艇包包身好鬆軟，但表面唔喺好睇得出加入咗菠菜元素，咬入去就會見個包心喺綠綠哋；當然，唧咗啲香草醬，味道立時層次豐富咗好多。
綠茶蟹肉醃青瓜撻 綠茶嘅元素就唔覺好強，但蟹肉既多又鮮，就真喺好好食，好鮮味；而撻殼有啲似脆粟米片咁，鬆脆不膩，搭埋啲醃青瓜，喺一件幾唔錯嘅鹹點！
吞拿魚他他配香脆紫蘇葉及芥末脆米 食西餐，一講吞拿魚就第一時間諗起罐頭貨嗰啲吞拿魚，但一入口就知喺做剌身嗰啲吞拿魚，細刴成他他，魚鮮味特別濃；再墊上以紫蘇葉做成嘅天婦羅，加入咗少少芥末入去，整件事都唔同晒，真喺較有驚喜。
綠茶蕎麥麵配天婦羅蝦及水煮鵪鶉蛋 相信喺因應綠茶嘅主題，所以，先加入咗蕎麥麵。啲麵條沾上醬汁，入口清爽，麵條帶綠茶味，鵪鶉蛋細細隻太易煮熟，就難有流心嘅效果，不過，件天婦羅蝦就幾得，粉漿薄脆，又唔油膩，蝦肉鮮爽彈牙。
燒紫菜飯糰配蝦籽 最後一款鹹點喺飯糰，咪睇佢平平無奇「一嚿飯」，裡面卻喺塞滿唔少蝦籽，當然唔喺我哋食蝦籽麵嗰啲蝦籽啦，類似食壽司蟹籽嗰啲，入口卜卜爽，而飯粒黏糯飽滿，搓得挺實唔鬆散，比預期好呀！
北海道綠茶奶凍配紅豆 綠茶配紅豆喺走唔甩嘅組合，先嚟個北海道綠茶奶凍，以小牛奶樽仔裝住，加粒小朱古力花做點綴，賣相精巧。入口啲奶凍勁柔滑，綠茶味濃郁，而且，仲滲出濃濃奶香，至於啲紅豆，又綿，又清甜，真喺無得輸。
京都綠茶白朱古力蘆薈啫喱海綿蛋糕 小雀籠內有另外3款甜點，先分享呢一款海綿蛋糕，喺最滋補嘅款式，因為加咗蘆薈做成面層嘅啫喱，而中間有一層厚厚嘅綠茶白朱古力慕絲，整體感覺唔錯。
焗綠茶芝士餅 以美式芝士餅作為主軸，加入綠茶元素，再以忌廉唧花，加件小脆餅做裝飾，賣相就好討好。消化餅底做得夠薄又平均，綠茶芝士有強烈嘅綠茶香，又嗒到鹹鹹嘅芝士味，兩者所產生嘅衝擊感好強，正呀！
迷你蘋果綠茶金寶撻 個金寶撻由於加咗綠茶，所以，唔似得以往咁個樣焗出嚟咁金黃，不過，咪睇佢其貌不揚，實在好有內涵。撻內填滿蘋果肉，仲加有玉桂，而金寶又焗得好香脆，感覺又唔會太膩，再者，撻殼十分脆口，又的骰，又好食！
靜岡綠茶鬆餅配雜莓醬及紅豆 食英式下午茶，又點可以無英式鬆餅吖，但呢個喺綠茶鬆餅，仲刻意加入靜岡之名，當然要慢慢嗒真啲佢份綠茶味。不過，最令我印象深刻反而喺啲配料，啲紅豆食個奶凍時已講過，又綿又甜；而雜莓醬就堅正，唔喺啲現成貨，一食就知喺自家新鮮製，嗰份雜莓味清香自然，就算厚厚咁塗晌鬆餅之上，唔會有死甜嘅感覺，而喺一份鮮活感。
綠茶林明頓 嚟自澳洲嘅林明頓其實可以講無咩特別，但平凡得喛又有其特色。立方形嘅海綿蛋糕沾滿綠茶味朱古力，再灑滿椰絲，唧咗少少忌廉花令賣相幾靚仔。入口好軟綿，綠茶味朱古力好香濃，伴住咖啡都好唔錯。
日式三色小丸子串配甜醬油 日式三色小丸子唔喺人人都鍾意食，仲記得第一次喺十多年前去京都嵐山旅行，因為喺冬天，以為啲小丸子，原來又凍又硬。但今次再食，感覺又好唔同，雖然都唔喺熱，但口感好軟糯，煙韌又有咬口，沾點甜醬油感覺好得意。
抹茶 餐飲除了啡茶，仲特別提供埋抹茶，襯晒成個下午茶餐，而且，下了好多抹茶粉，抹茶味好濃，味道甘醇，之後，再添熱水飲多兩轉都仲OK喎。
即磨咖啡 小弟都喺鍾意咖啡多啲，話晒有成7款甜點，襯咖啡就最好不過。而咖啡就無話好特別，但即磨出品，用豆又唔喺差，所以，飲落都幾醇厚。
放輕心情，拋開工作煩惱，12道下午茶美食逐一慢慢細嚐，又欣賞吓出面園林景致，感覺真喺幾有渡假感。再者，除環境、食物，酒店即喺酒店，啲招呼寧舍熨貼，夠專業，食得特別稱心愉快。暫時嚟講，老婆就好欣賞今日嘅行程安排，最緊要喺天公造美，陽光充沛，又唔太熱，在我嚟講呢，可以唔使諗返工嘢已經當渡假啦！
個人評分
味道：9/10
環境：8/10
服務：9/10
抵食：9/10
平均每人消費：HK$235
味道：9/10
環境：8/10
服務：9/10
抵食：9/10
平均每人消費：HK$235
餐廳資料：
聆渢咖啡廳 Cafe Lagoon
屯門香港青山公路1號香港黃金海岸酒店低層地下
2452 8448
聆渢咖啡廳 Cafe Lagoon
屯門香港青山公路1號香港黃金海岸酒店低層地下
2452 8448
沒有留言:
發佈留言