囍源古早蛋糕 Hei Yuen Bakery：一切隨「源」

前文就講到壞咗電腦，落黃金砌咗部迷你電腦，晌等機期間，晌附近嘅「越萊」食個越式下午茶，不過，食完都未夠鐘攞機，周圍兜吓，就喺咁，兜吓兜吓嚟鴨記睇吓嘢，經過「囍源」有啲印象佢咃嘅風評幾唔錯，鋪門又打住古早正宗旗號（其實，好似間間都咁寫），就隨緣買咗一個古早蛋糕返屋企當飯後甜點。

古早蛋糕真喺唔多食，幾個月前試過一次，感覺唔錯就再買多次。都喺如所有古早蛋糕店嘅設定，鋪面喺巨型玻璃櫥窗，玻璃後放滿唔同口味嘅古早蛋糕及定價。

此外，更擺咗張摺枱，放咗4款蛋糕，話喺樣品，但原來喺俾客人摸吓、掂吓，以證明佢哋嘅出品有幾得。而且，更棟咗個牌寫住「全港唯一正宗做法」！

咁點為止「正宗」？其實第一次食嘅時候，都有睇過啲飲食雜誌介紹啲古早味蛋糕，就話喺經過低溫慢火烘培而成，賣相要挺，無凹無裂，表皮要薄，底皮無燶，口感應該鬆軟而帶點濕潤，唔應該太乾身，有濃厚蛋香，咁先叫好、正宗。而店家都晌鋪前貼咗張「標準」，點樣先喺正宗。

原來佢哋啲蛋糕一早入晒盒，放晌櫥窗嘅都喺做樣品俾客有個參考。你要邊款，就可以即時袋起俾你。

而盒嘅兩邊，就印晒有關古早蛋糕嘅特色，以及享用時一啲小貼士。

班蘭味古早蛋糕 $70

打開個包裝盒，整個蛋糕又真喺焗得幾靚仔，糕面平滑，亦無裂紋，四邊及糕底又真喺無咩燶邊燶底嘅情況，果然喺低溫烘焙。

色澤青綠得好搶眼，感覺仲有少少誇張，但質感實在好鬆軟，回彈力強，入口軟綿而帶點濕潤，滲出陣陣班蘭嘅清甜香味，但唔算話好強烈嗰種，亦確喺有種低糖、少油嘅感覺。不過，我見都有人寫過呢一款口味嘅古早蛋糕，晌中間加有咖吔醬，但我呢個就似乎喺齋班蘭版本而已。

淨番一半番嚟第二朝當早餐，按佢指示，用飯煲焗番，3-4分鐘就未夠熱，大概7分鐘好啲，相信都因應唔同飯煲用嘅時間可能唔同，自我調節啦，但雪咗一晚，第二朝食返又真喺OK喎，同噚日食真喺分別唔大。

個人評分
味道：7/10
環境：7/10
服務：8/10
抵食：7/10
平均每人消費：HK$35

餐廳資料：
囍源古早蛋糕 Hei Yuen Bakery
深水埗北河街123號地舖
2669 9888