利食堂 Lee Kitchen：因「利」乘便

以往午飯時段，公司就喺包伙食嘅，足不出戶晌公司就可以三餸一湯白飯任裝，而疫情時期，供應商就改為兩餸飯飯盒，每日6款餸中自行揀兩款。但今日放飯時間就無食公司飯，而喺想食吓其他嘢，因為公司附近開咗家韓式小店「利食堂」。

小店主打外賣，不過，店內亦有少許座位供堂食。查實裝修都幾骨子，一室木系，燈光柔和。

近門口仲放咗個凍櫃，擺放咗唔少韓式飯卷及涼拌小菜。

牆上貼咗好多餐牌出嚟，又有啲單張攞，索性掃描出嚟俾大家參考。睇落都有幾多選擇，打量了良久，因為有不少選擇，種類亦相相當豐富，燒魚套餐呀、精選飯品呀、DIY韓式拌飯呀，下午茶餐呀，以及上面提過放晌凍櫃嘅韓式飯卷、生伴涼菜、涼拌海鲜……等等。

此外，單張無印出嚟，晌收銀處棟咗個DIY韓式拌飯嘅餐牌，原來仲可以加其他配料添。以中環區而言，定價合理。

而今次幫襯嘅另一原因，喺有日經過門口，見到鋪前玻璃貼咗款清酒海蜆湯烏冬，天氣寒寒哋，最有興趣試就喺呢個。

清酒海蜆湯烏冬 $69

呢一款烏冬可以另選豬骨湯或麻辣湯，不過，個人覺得清酒先喺亮點，所以，無必要都喺唔好轉。另外，奉送盒裝檸檬茶，如果，有其他選擇俾人客揀會好啲，因為，未必個個都飲檸檬茶嘛。

先試一口清酒湯，酒香撲鼻，但入口卻唔會太嗆喉，反而，有種清爽感，尤其凍凍哋嘅日子飲，感覺份外暖和。海蜆亦食得出喺新鮮貨，鮮甜得嚟帶有少少海水嘅鹹鮮味，咬落無沙；烏冬滑溜非常，卻又有點韌勁，唔會得嚿粉咁，製作有誠意。

返中環工嘅朋友，日日快餐店都會悶，想食啲有水準嘅嘢，又唔想花太多嘅話，「利食堂」都諗得過。雖然都喺外賣無乜招呼，但店員都好有禮，值得再幫襯。

個人評分
味道：8/10
環境：7/10
服務：8/10
抵食：8/10
平均每人消費：HK$69

餐廳資料：
利食堂 Lee Kitchen
中環士丹利街50號信誠廣場地下F號舖
2803 5123