漁樂 Lime Fish：期望又「樂」空

近排天氣好清爽，雖然無特別約人行山，但朝早處理好晒個人事情，趁有啲閒情逸致，兩公婆行行短山，再落番嚟美孚食個下午茶。今次過到嚟「曼克頓山」搵食，睇吓邊間餐廳人少就入邊間，結果，幾間餐廳中，就以「漁樂」較少人。數一數，都好耐無幫襯過佢，睇番啲食評，對上一次幫襯已經喺2018年10月嘅事。

店內嘅環境都幾寬敞，感覺幾唔錯，裝修都幾有特色，因為喺賣亞洲唔同地方美食，所以，有點點似馬來西亞、新加坡啲茶室。而牆壁、天花，都專登畫上咗啲「出入境印」。

嚟到食下午茶，所以，就影低啲下午茶餐俾大家參考，自己亦可以留個記錄。選擇都有幾多，輕食、船河、麵飯，定價亦親民，又無收加一喎。

此外，仲有一款「下午茶驚喜優惠」，而其中嘅迷你海南雞飯拼碗仔翅配椰汁紅豆冰就頗有興趣試。

輕量泰式咖喱炒金邊粉 $40

話輕量咋，其實份量都唔少，以小煎鑊盛載，又幾有心思。泰式咖喱有黃、有紅、有綠……等等，雖然無講明喺邊一隻，但咖喱既香又惹味，而且，亦頗有辣勁，仲喺幾辣嗰隻；啲金邊粉炒得爽身，唔會太黐埋一嚿嚿，粉內有少少什錦海鮮料，但就唔算多。

迷你海南雞飯拼碗仔翅 $38

個飯又真喺有啲迷你，剛剛一碗飯嘅份量，而海南雞就只有3件，亦無配慣常見到嘅黑醬油、薑蓉及辣椒醬。啲雞都唔錯，去晒骨，亦唔喺好嚡，皮下脂肪亦少，但啲飯唔喺好得，比較乾。至於碗翅，味道OK，除得半碗份量外，拎到嚟唔熱（微微暖）喺一個大問題。

椰汁紅豆冰、熱美祿

我嘅餐餐飲就定咗喺紅豆冰，而老婆揀咗熱美祿。我杯紅豆冰大大杯，仲喺加入椰奶，並唔喺一般嘅只得奶水，所以，味道多咗份椰香，而紅豆腍而清甜，只可惜師傅落得真手緊。

只喺食個下午茶，所以，都唔會專登去搵某某某餐廳試，一切隨遇而安就好了。雖然，今次嚟到「漁樂」，感覺都喺一般般，好又唔喺好好，差亦唔叫差，反而招呼唔錯，環境讓人食得安心都重要嘛！

個人評分
味道：7/10
環境：7/10
服務：7/10
抵食：8/10
平均每人消費：HK$39

餐廳資料：
漁樂 Lime Fish
美孚寶輪街1號曼克頓山（曼坊）1樓101C, 104&107號舖
2174 7100