Burger Joys：滋味滿「Joys」

依家無咗晚市堂食，返工日子都喺食飯盒居多，加上減少社交聚會，又少咗啲食好嘢嘅機會，不過，偶爾都會想食啲好嘢嚟慰勞吓自己嘅辛勞，就好似今次，嚟到「Burger Joys」食餐高檔漢堡。

雖然店家瑟縮小巷之內，但話晒小弟都晌中環返開工，當然知椗啦！避免人流，亦專登揀早少少過嚟，此時，客人確喺唔多，自己搵個角落位，受感染嘅機會都細好多。

室內嘅環境都喺好美式酒吧風格，幾邊放置嘅都高腳枱櫈，不斷播放流行音樂，氣氛輕鬆。牆上貼有好多食客食漢堡包時嘅開心照片，貫徹店名主題。

後知後覺，原來枱下有啲掛勾，早知嘅話就唔使將啲嘢放晌地下。

餐牌影出嚟都喺俾大家有個參考，自己都做番個記錄。除多款漢堡包之外，仲有小食、沙律及飲品，漢堡包可以加錢額外再加配料，而加$41可轉為套餐，包咗汽水或啤酒及炸薯條，更可以再加多$11 / $21轉其他口味嘅薯條。

午餐精選就划算少少，其實，啲漢堡包同散點同價，但就已經包汽水及薯條，即喺變相慳番嗰$41，此外，薯條可以改要洋蔥園、沙律或薯堡。

埋收銀機位落好單就可以埋位等吓，因為佢哋會俾個號碼牌你，食物由店員送上。等候期間，又可以睇睇師傅整包個樣，見佢真喺唔停咁整。

枱上已放有Tabasco辣椒仔、是拉差辣椒醬、茄汁及芥辣俾客人隨意用。

芝士牛肉漢堡餐 $109

呢類高檔漢堡包店，除用靚料之外，賣點就喺即叫即做，所以，就算咁少人，都要等上10min。不過，碌吓手機時間就好快過，芝士牛肉漢堡包、薯條、可樂轉頭送到，而漢堡包以半開放式紙盒包住，時下都好興呢個做法，尤其韓式多士店就見得最多。

先講講薯條，幼身嘅薯條炸得香脆不膩，最緊要喺炸起就即食。平常就咁沾茄醬，但今回就加埋啲芥辣，效果唔錯架，味道嘅層次感多啲。

如果有留意到餐牌，都會見到佢哋標榜用100%美國安格斯牛肉每天手打，唔會搵機攪到咁碎濕濕，所以，食落確喺鬆化得嚟，又有實在感，肉汁豐富，而且，份量十足；夾埋大大片蕃茄、生菜、半溶嘅芝士、酸青瓜、紫洋蔥，令到整個包嘅味道更具層次，再者，自家製嘅麵包口感鬆軟，烘過有啲脆邊，亦記一功。

你問我成嚿水一個漢堡包貴唔貴？貴架！但值唔值？都值嘅！偶一為之，無所謂啦，最緊要喺自己享受嘛！

個人評分

味道：8/10
環境：7/10
服務：7/10
抵食：7/10
平均每人消費：HK$109

餐廳資料：
Burger Joys
中環士丹利街82號地舖
2537 3288