大家樂 Café de Coral：我的星期六美孚早餐 ~ 絕對喺貪新鮮

晌美孚區，幾家快餐店中，「大快活」就近我住嘅屋苑，幫襯得較多，但嘢食普普通通，比較少寫；其次喺「大家樂」，因為座位多，地方大較好坐；而「MX」就較少幫襯，因為環境好逼吓，坐得唔多舒服。最近，又嚟到幫襯大家樂，純粹因為一紙廣告。

呢一家分店嘅早市都好多客，就算好似今朝星期六咁，算喺唔少人唔使返工嘅日子，都一樣坐滿客。

早排睇到「大家樂」推出咗一款「豐盛套餐」，就喺呢則廣告喇，好有「全日早餐」嘅影子，都喺大堆頭大製作，有炒蛋、香煎多士、扒蕃茄、薯餅、煙腩片、茄汁豆、楓糖煎雞扒（可以配炸魚柳），跟餐飲，睇起嚟好正，而且，都只喺賣$42.5（剪報紙優惠券減$4），都叫好抵玩吓。

雖然，成品出嚟跟廣告張相擺得無咁靚仔，但照到足有咁多樣嘢，份量都好夠。味道又點呢？比預期中好，好似啲煙腩片，幾香，又唔肥，炒蛋亦都算滑，兩件多士就好似西多咁沾滿蛋漿煎過，唔喺就咁兩片烘多士；不過，雞扒啲肉質雖然都滑，但層皮唔脆，亦只有微溫，明顯喺煎好擺咗好耐，始終都有啲快餐模式嘅作風。之不過，40蚊都唔使，算喺咁啦，總唔可能跟賣成舊水嘅「全日早餐」比嘅。

美孚俾人感覺喺有唔少中產，不過，小弟唔喺囉，但目測睇到確喺有唔少人點呢個餐，除咗大堆頭夠豐富外，加上廣告附上優惠券，喺更吸引人去幫襯嘅原因之一。

個人評分
味道：7/10
環境：7/10
服務：7/10
抵食：8/10
平均每人消費：HK$38.5（報紙優惠券）

餐廳資料：
大家樂 Café de Coral
美孚美孚新村萬事達廣場1樓N95(B)
2785 5821