其實，富豪機場酒店內嘅餐廳算喺幫襯過唔少，不過，幫襯「紅軒」已經喺11年前嘅事、「Regala Cafe ＆ Dessert Bar」都7年前喇，而「藝廊咖啡室」就算喺近期啲，都只喺1年前嘅事，而今次到訪嘅「空港居酒屋」卻喺第1次。踏進餐廳，雖然裝修比預期簡單，但有種日本飯堂嘅感覺，而且，地方非常之大，感覺好闊落、舒服，好有空間感，就算嚟食鐵板燒都予人感覺輕鬆，唔會太拘謹。
講到食鐵板燒，當然喺坐晌鐵板燒枱前啦，睇住師傅直接做菜，欣賞師傅手勢，味道以外，仲喺一種視覺嘅享受。
如果人多，又唔想靜侷啲，唔想太多騷擾，餐廳設有兩個貴賓廂房，目測所見，都可以坐到十多、廿人。
本來都打算影影餐牌俾大家參考，但都幾厚吓，有唔少頁數，事後上官網睇睇，都已經有餐牌提供，故此，就唔多此一舉貼出嚟。不過，打開首頁，概略就知道店家以鐵板燒、日式吉列及新鮮刺身為亮點，最厲害喺提供成50款清酒，啱晒我老友。
不過，我哋嚟嘅目標清晰，一早定好主意，胸有成竹，就喺新推出嘅鐵板燒配清酒嘅「精選套餐」，共有8道菜，仲包括甲羅燒、焗龍蝦、安格斯牛柳，原價要$1,288，依家接近一半價錢，只喺賣$698，加多$88仲可以任飲指定日本清酒，真喺抵到無嘢講。
尾張男山（清酒）
友人就好此道，小弟對酒就普普通通咁啦，佢話啲酒頗清醇，易入口，口感好順，配鐵板燒感覺真喺唔錯。
前菜三點
日本菜一向以精緻見稱，就連前菜都做得的骰，3款前菜包括胡麻毛茄、柚子蘿白、明太子沙津。毛茄即喺秋葵，口感有點黏黏，襯胡麻醬，和風味十足；簡單嘅蘿蔔絲，加入柚子汁，立時變得更爽口清甜；而甘筍粒混和沙律醬及明太子，味道亦變得有層次，為今餐奏出美妙起頭。
自家製蟹肉忌廉餅
賣相貫徹精緻嘅炸物登場，咪以為就咁得面面一撮蟹肉，其實忌廉餅內仲混有唔少蟹肉，喜歡食蟹嘅朋友絕對滿足到你。亮點唔止喺咁，蟹肉及餅面之間，仲放上一抹蟹膏，甚有畫龍點睛之效，加上炸得香脆不膩，師傅嘅炸功了得。最得意喺食落又唔似薯餅嘅口感，師傅再作說明，叮一聲，啊！原來喺咁，棄用薯仔，改用日本米嚟做，既有心思，又有特別效果，讚呀！
銀鱈魚洋蔥湯
唔喺講笑，送到上枱仲喺熱辣辣滾住滾住咁，碗洋蔥湯嘅洋蔥味本身已好突出，再加上應該喺以魚湯嚟熬製，故此，入口更有份魚鮮味。以為銀鱈魚就咁加幾粒隻落湯度啦，嘩！原來有成一大件，有食開鱈魚西京燒嘅朋友都知，外間賣一客基本嘅都百幾蚊啦，再者，見佢件銀鱈魚做得唔馬虎，都喺煎封晒先放落湯度，食到啲魚油潤甘香，但個湯喺亳無油膩感，好有誠意嘅一道湯品。
松葉蟹甲羅燒
由於近年香港都開咗唔少浜燒店，加上唔少屋酒屋都有提供，所以，呢幾年都食唔少甲羅燒呢道菜，但食咁多次，相信就以呢一客印象最深。一來用上松葉蟹入饌，二來堅用好蟹蟹肉及蟹膏去做，三來放上大量蟹籽做點綴，夠晒吸晴。撈勻之後，入口味道好豐厚，嗒得出蟹鮮味，蟹膏所帶出甘腴嘅餘韻，絕對喺讓人喜出望外。
岩鹽焗龍蝦
卒之到師傅粉墨登場，席前表演鐵板燒喇。為咗表示啲龍蝦喺新鮮飛機貨，專登事前拎出嚟俾我哋睇睇，童叟無欺，無花無假，郁得非常生猛，蝦身有光澤。向師傅查詢一下，龍蝦嚟自澳洲，咁就當然喺靚貨啦，切開之後，睇到蝦頭帶有唔少膏。
睇住師傅逐步逐步咁做，先灑下岩鹽去焗，再拆肉煎香，下黑椒碎調味，確喺賞心悅目。
最後，擺到靚一靚上碟，由始至終都做得一絲不苟。以鹽焗方式去做，帶出食材自然嘅鮮味，咬一口龍蝦肉，爽彈鮮甜，蝦頭少少蝦膏，豐腴味鮮。而且，每人都喺有一整隻龍蝦，吃罷非常滿足。
鐵板燒美國安格斯牛柳
據師傅介紹，佢哋主要賣3款牛：佐賀A4和牛、澳洲M8和牛、美國安格斯牛柳，餐牌內嘅多款套餐，都可以自由選擇任何一款牛。當然，以配佐賀牛會最貴啦，但其實安格斯都唔差。
又喺晌鐵板上經過一輪處理，煎封底面，調味，淋上拔蘭地，再切成一小口一件嘅呎吋。
伴以自家炸嘅獨子蒜蒜片，佐以自家調和嘅醬汁。啲牛柳粒極之軟腍，鮮嫩多汁，帶少少油香，沾一點燒汁，好食，而啲蒜片香脆不膩，增加整道菜嘅趣味。
櫻花蝦溫泉蛋稻庭烏冬
一般食鐵板燒，去到近尾都喺配炒飯，但呢個餐則送上稻庭烏冬，食啲濕濕哋口嘅嘢，仲好啦！咪睇佢細細，一樣好飽肚。烏冬內加咗好多櫻花蝦，隻溫泉蛋又做得啱啱好，蛋黃滑流而出，烏冬本身亦口感滑溜，帶少少煙韌感。
是日甜品
呢一晚嘅菓子簡簡單單喺兩件蕨餅（黑糖及抹茶味），啲蕨餅幾好食，軟軟糯糯。
淨喺睇今晚所用嘅食材，感覺都值回票價啦，加上烹調得宜，煮法又多元化，唔會一味淨得鐵板燒嘢；再者，喺酒店內嘅餐廳，招呼絕不失禮。個套餐據我了解暫定只做到10月尾，仲需要提前預訂，真喺有心試嘅話就要有快襯手喇。
個人評分
味道：9/10
環境：8/10
服務：8/10
抵食：9/10
平均每人消費：HK$800（信用卡9折優惠）
味道：9/10
環境：8/10
服務：8/10
抵食：9/10
平均每人消費：HK$800（信用卡9折優惠）
餐廳資料：
空港居酒屋 Airport Izakaya
赤鱲角暢達路9號富豪機場酒店地下
2286 6668
空港居酒屋 Airport Izakaya
赤鱲角暢達路9號富豪機場酒店地下
2286 6668
沒有留言:
發佈留言