海薈 My Harbour：美味再「薈」

老婆考到個專業試，獲得個好成績，就梗喺要賀一賀啦，所以，專誠嚟到啟德郵輪碼頭，睇睇風景，並食餐有水準嘅晚餐慶祝吓。雖然，郵輪呢家嘢近十年八年都發展得好蓬勃，不過，小弟都仲未坐過；然而今晚到訪碼頭頂層花園嘅「海薈」，就曾經晌3、4年前機緣之下嚟過食晏，今次可謂後「薈」有期。

餐牌中有少少對餐廳定位嘅介紹，主要都喺做婚宴，始終做到婚宴喺幾賺到錢嘅項目。

既然喺搞婚宴嘅，環境裝修就有番咁上下，黑白格仔地磚，拱形天花，一派復古嘅英倫車站風，夠晒格調。而且，四周設有啲小白樹，掛上燈飾，餐廳尾又有個小舞台，浪漫有氣氛。

枱上嘅擺設亦唔馬虎，小枱燈、花環、精緻嘅餐具。

晌入門口位，就楝咗個牌，正正推介緊波士頓龍蝦為主打嘅晚市套餐，究竟詳情喺點呢？睇睇以下嘅餐牌就明白晒。

4道菜嘅晚餐，包括有沙律、餐湯、主菜及甜品，並奉送餐飲，而主菜共有6款選擇，由唔同嘅肉類或海鮮拼龍蝦，定價為$288-$468，視乎所揀嘅主菜。既然主打龍蝦，唔止主菜有龍蝦入饌，就連沙律及餐廳都有龍蝦元素，如果連甜品都加埋，就完整喇。

波士頓龍蝦田園沙律

田園沙律都喺簡簡單單嘅沙律菜、車厘茄、櫻桃蘿蔔……等等，但取欣賞喺落嘅油醋份量剛好，唔會太多而令啲菜太濕，好清爽，再配搭埋龍蝦鉗肉，肉質鮮爽，帶點點海水味咁，喺一道好醒神嘅頭盤。

傳統法式龍蝦湯

睇到餐湯深沉嘅色澤，感覺已好對辦。有人可能會覺得質感有啲稀，但正正喺落少咗「麵撈」嘅效果，無一般忌廉湯類嘅咁肥，口感確喺爽口啲，而龍蝦味就堅濃郁、好精華。此外，跟湯嘅麵包亦烘得軟綿，感覺喺塗咗橄欖油嚟烘。

香煎深海比目魚柳、波士頓龍蝦配黑魚子香檳忌廉汁，時令蔬菜 $368

老婆揀咗比目魚，因為佢喺偏素之人，紅肉少食，白肉都OK。整道主菜賣相好爽朗，件深海比目魚柳煎得外皮非常之香脆，咬落真喺咯咯聲，而魚肉嫩滑細緻，且好有魚味，襯少少黑魚子連香檳忌廉汁，食味一流，老婆就大讚件魚本身好高質素。

焗紐西蘭羊架配香煎波士頓龍蝦、黃芥末汁，薯蓉及蔬菜 $438

難得有羊揀，小弟就首選選羊架配龍蝦，而羊架有兩大支，燒得外觀焦香，煎到嘅生熟度啱啱好，色澤粉嫩而唔會有血水滲出。切一小口試試，肉質柔嫩富羊肉嘅羶香，無論沾點黃芥末汁，抑或薄荷啫喱，都一樣咁好食。

龍蝦方面呢？蝦鉗就用咗做沙律，亦無乜膏，所以，只有蝦身嘅一大口肉，入口好爽彈，又帶蝦鮮味。

伴菜就列明喺薯蓉及蔬菜，其實都喺大路嘢，不過，整得有心定無心，一食就知，就好似啲薯蓉咁，搓成半爛，柔滑得嚟又帶少少薯仔粒粒嘅口感，而且，啲薯仔好有薯味，無話撈呢樣嗰樣，此外，啲蜜糖豆爽口無渣，用料不賴。

是日甜品

初時，估計甜點會唔會喺乜乜芝士多糕呢，原來喺一盤4款迷你慕絲杯，分別喺蜜瓜味、荔枝伯爵茶味、士多啤梨味及白朱古力味（我就覺喺似意式奶凍）；對比起啲沙律、餐湯、主菜而言，啲甜品就有較大嘅回落，其實見到杯杯都花心思裝飾過，賣相的骰精緻，但慕絲部份就唔算好滑溜，整體喺OK嘅，只不過跟埋其他食物比，就變得普通咗。

即磨咖啡、熱檸水

配甜品，都喺咖啡最襯，老婆就要熱檸水，啲杯碟都好靚架。最後，一口咖啡，一口慕絲，輕鬆完結今晚嘅波士頓龍蝦晚餐。

總括嚟講，餐廳嘅環境好，有氣氛，食物做得有一定水準，服務非常妥貼，店員好有禮貌，上菜速度又拿捏準，讓人舒服悠閒咁用餐。餐後，晌花園平台逛吓，欣賞吓對岸夜景，吹吹海風，讓涼意平靜人心。

個人評分
味道：8/10
環境：9/10
服務：9/10
抵食：7/10
平均每人消費：HK$445

餐廳資料：
海薈 My Harbour
九龍灣承豐道33號啟德郵輪碼頭頂層花園S302號舖
2748 1668