水吧位設晌近門口處，加上鋪面對出有一處空間都喺屬於餐廳，好似商場嘅一部份咁，擺明就做埋優閒外賣，好似啲咖啡店咁，賣杯咖啡坐低嘆吓。而且，呢一層喺傢俬鋪樓層，應該引到啲客路行攰咗嚟嘆杯咖啡。
講返有啲咩嘢食揀先，先睇睇散點餐牌，印刷幾精美，部份菜式附有圖片，但就最怕呢類膠面餐牌，反光嘛。大類選擇分為湯品、沙律、小食、全日早餐、漢堡、三文治、意大利麵、意大利飯、主菜、甜品，以及各式飲品。選擇全面，每個分項亦有好多菜式揀，定價屬中等價位咁啦。
此外，有做緊個推廣，美國厚切安格斯肉眼，標明15安士，唔講得笑，喺一個超重量級嘅份量，原價賣$350，依家只喺半價賣$175，俾多$38可以變為套餐，好適合人多嚟一齊「些牙」。
不過，今晚同朋友得兩個人，選晚餐就喺最正路。晚餐包沙律、餐湯、主菜（5款選擇）、精選甜品及基本餐飲，餐湯及飲品都有升級選擇，而定價視乎所揀嘅主菜（$188-$248），睇落啲主菜都頗有特色吓。
此外，仲見到有款二人用嘅晚餐，賣$468，指定嘅湯品、沙律、小食中7揀2，指定嘅主菜又喺7揀2，不過，選取部份菜式需額外加錢，仲包埋精選蛋糕及基本餐飲。
田園蔬菜沙律
喺好簡單嘅田園沙律，幾炷沙律菜，加啲車厘茄，再唧上沙律醬即成。味道唔會有咩驚喜，還好啲沙律菜夠新鮮爽脆。
是日餐湯
雖然個沙律好普通，但個餐湯好得喎。今晚嘅餐湯喺野菌忌廉湯，睇色澤好對辦，飲落感受到好足料，極有菌香，黏度又啱啱好喎，口感順滑。最鍾意喺夠熱辣嘛，真唔明點解有啲餐廳，明知啲湯唔熱都照樣奉客。
香煎比目魚配香草北非小米沙律 $218
佢哋上菜嘅速度都幾好，飲完個餐湯隔一段短時間抖抖，就上主菜。友人嘅比目魚賣相頗靚仔，件魚煎得外皮焦香，小試一口，果然皮脆肉嫩，好食。並佐以芒果墨西哥莎莎醬及蘑菇龍蒿汁，前者味道好清爽，幾夾到啲魚，而後者就似喺啲配菜，幾幽香。滔一小羹小米沙律，其實喺涼涼哋，初時醒唔起，以為喺啲「熱飯」，所以，變咗有啲驚覺感，哈哈！
紐西蘭羊肋排配新薯時蔬 $228
幾款主菜，其實樣樣都想試，不過，都喺羊肋排啱我心水多啲。我碟羊賣相都好唔錯架，一客有3大支羊肋排，支支都好大支，再配上好多新薯、炒意大利黃瓜……等等，份量十足，食得我好飽吓。啲羊肋排帶微微羶香，肉質非常柔軟，又富肉汁，再佐以迷迭香燒汁，真喺堅好食，值得推介。
精選甜品
話喺精選，其實都只不過喺一球雪糕，喺石板街口味，朱古力味好濃郁，微微甘苦，口感軟滑，內含少少棉花糖及朱古力碎碎，再襯以少少雜莓，簡簡單單，過吓甜癒。
黑糖咖啡 +$12
餐飲基本上喺定明得黑咖啡或柚子蜜，難得食咁好嘢，自然想襯杯出色嘅咖啡。意式咖啡都好多選擇，額外加多$12就可以享用，呢$12淨喺睇拉花都已經好值啦，個拉花真喺好靚，圖案複雜而工整，線紋細緻，入口口感均勻，奶泡撞落去嘅手勢非常之好，而咖啡味好醇香。
藍花伯爵茶 +$21
友人就喜歡花茶多啲，所以，揀咗款藍花伯爵茶，不過，色澤比一般所見嘅伯爵茶無咁深沉，但茶味則頗醇香。
綜合而言，覺得「Amica」喺提供到優質菜式嘅餐廳，而言，對個環境嘅感覺喺幾咁簡約休閒，招呼又唔錯，可以講性價比屬高位嘅餐廳。最衰喺星期日唔提供午餐，要散點，點都喺晌心理上覺得唔抵。
個人評分
味道：8/10
環境：8/10
服務：8/10
抵食：8/10
平均每人消費：HK$265
味道：8/10
環境：8/10
服務：8/10
抵食：8/10
平均每人消費：HK$265
餐廳資料：
Amica
太子彌敦道750號始創中心3樓315-317號舖
2338 6828
Amica
太子彌敦道750號始創中心3樓315-317號舖
2338 6828
沒有留言:
發佈留言