堤岸酒吧及餐廳 Pierside Bar & Restaurant：「鮮」入為主

大半年前嚟過「堤岸」試試其下午茶，無論環境、食物、招呼都有水準，印象頗深，所以，今晚同朋友再嚟一試其晚餐，加上聽講轉咗新套餐，咁就更加期待啦。一於醉人之夜，開心星期五！「堤岸」定位喺酒吧 + 餐廳，不過，兩者並唔喺晌埋一齊，酒吧晌平台層，有啲室外露天位，可以睇到日落美景。

餐廳則晌上一層，需要繞道經一經酒店大堂再上一層先到達餐廳入口，而餐廳入口就打造得富麗堂皇，金光閃閃。

甫入到去，非常之有氣氛，如果，安排到對海一排窗邊嘅揀手位，附送埋180°嘅維港美景。

雖然我哋坐咗晌另一邊角落，都睇到少少海照架，但幽靜嘅位置讓我哋更方便傾偈，而亳無騷擾。雖然樓底唔高，但座位編排闊落，故此，都唔會有咩侷促感。

枱上早早擺放好竹蓆餐墊、餐巾、刀叉，樣樣都乾淨整潔，尤其啲餐巾，非常雪白，唔好睇少呢環，好大程度影響個印象分架。朋友因堵路遲到，小弟就先點咗一杯番石榴汁（$62），好清甜，味道自然，一邊飲，一邊先研究吓個餐牌。

據店長介紹，依家所做嘅「嚐鮮 • 海鮮」晚市套餐已經推出咗成個月，都幾受歡迎。由於「堤岸」主打澳洲菜，所以，有唔少海鮮菜式，至於呢個套餐分為三道菜 ($398) 及四道菜 ($428)，包咗頭盤、餐湯、主菜及甜品，言下之意，四道菜就即喺包埋個甜品，不過，溫馨提示一下，就唔包飲品嘅。

食套餐一向計落喺划算啲，但萬一套餐真喺有啲嘢唔啱食，佢哋嘅散點餐牌都有好多選擇，由前菜、濃湯、意式飯麵、香烤美饌、主菜、伴菜，到甜品，都一應俱全，選擇唔少。

麵包籃

餐前，先送嚟一大份麵包籃，長法包外皮脆口得嚟好煙韌，包心軟綿；另一款小圓包，雖然唔喺話好有特色，但極之鬆軟，且有麵粉香，搽啲牛油已覺得好好食。如果喜歡橄欖油同黑醋，亦可以向店員提出。

前菜有兩款選擇，兩款嘅配搭都非常之特別，無乜理由唔試晒架。

珍寶帶子三重奏

呢道前菜嘅賣相絕對喺意料之外，無論喺食材嘅配搭，抑或所用嘅器皿，均非常有心思，以三層玻璃「杯」裝起3種不同做法嘅帶子菜式，淨喺食手工都值回票價啦。此外，擺設亦唔喺隨意，店家嘅建議次序喺由上而下咁食。

蘋果木煙燻帶子

雖然一打開杯蓋，啲煙就散晒，煙燻嘅效果好似唔明顯，但一口咬落粒帶子度，煙燻嘅味道就好突出，而且，既然叫得珍寶帶子，真喺夠大粒，又爽彈，襯上少少黑魚籽，令味道更多層次。

香煎煙肉帶子柑橘油醋汁

第二道帶子，以煙肉包住嚟煎，令粒帶子帶有微微鹹香，而且，更油潤，配以柑橘油醋汁，食落喺完無油膩感，好得。

鮮帶子他他配三文魚籽

依個就以刺身嘅食法，帶子喺亳無烹煮過，刴成他他，撈埋啲三文魚籽，完全喺鮮味大爆發，帶子好鮮甜，三文魚籽就引出鹹鮮，實在感覺美妙，不愧為用上北海道嘅鮮帶子。

蟹肉沙律配香辣牛油果、柚子、蜜糖鬆餅

食咩都好，逢喺有蟹肉嘅菜式，我大多數都會揀佢，因為鍾意蟹肉嘅鮮甜，但就怕要落手落腳拆蟹，麻煩嘛。而呢一道蟹肉沙律，喺堅多蟹肉，並且好有鮮味，配搭上香辣牛油果、柚子肉，味道十分特別；至於啲蜜糖鬆餅，大可以跟蟹肉作配對，亦都好有驚喜。

堤岸龍蝦濃湯、香煎蟹肉餅

餐湯無得揀，只供應一款招牌龍蝦濃湯，除非你好唔鍾意蝦，或對蝦有食物敏感，否則就真喺唔好錯過。

每啖湯，都喺龍蝦嘅精華，入口蝦味鮮活，濃郁到不得了，而且，打得柔滑細緻。所以，我連一滴都唔嘥，以餐包嚟刮乾刮淨。

正所謂驚喜連連，湯中放有一小件香煎蟹肉餅，一咬就知好足料，因為，食得出絲絲蟹肉，十分有蟹肉鮮味，叫人大滿足。

主菜方面，一共有4款選擇，包括鱈魚、海鮮、羊架及西冷，稍提一下，唯西冷需額外補上$60，但喺以28日熟成嘅西冷嚟講，絕對值得，有食過熟成牛扒嘅朋友都知，成本絕不便宜。順帶一提啲服務，真喺有酒店級嘅專業水平，尤其上每一類別嘅菜式，都喺做到同步，而且，上菜速度合宜。

火炙鱈魚柳、牛油燴大蒜

賣相好精緻，鱈魚柳煎得好誘人，尤其面層嘅魚皮，真喺金光閃閃。友人切咗一小件俾我試試，果然，外皮香脆可口，魚肉嫩滑到不行，牛油燴大蒜汁，仲加咗少少麵豉，鹹香味完全可以吊起魚嘅鮮甜味，一絕。

慢煮羊架、威士忌羊肉汁

4款主菜中，羊架同西冷都喺首選，既然友人鍾情西冷，小弟就揀羊架，等大家都可以試到唔同菜式。一客有3支羊架，疊起嚟，再伴上野菜、紫薯蓉，簡單卻又好睇。

要上5分熟嘅羊架，煎得恰到好處，外層有少少焦脆感，又由於經慢煮處理，所以，啲肉質軟腍細緻，中度嘅羊羶香，完全喺小弟杯茶，沾上威士忌羊肉汁，甚有畫龍點睛之效，喜歡食羊嘅朋友，真喺唔可以錯過呢一道主菜。

香烤28天乾式熟成西冷扒（160克）及原隻大虎蝦 +$60

貫徹之前嘅頭盤、主菜，呢一道西冷嘅擺盤都好靚，西冷煎得焦香，虎蝦比坊間常見嘅大大隻，好有睇頭，配上唔同色彩而多元嘅蔬菜，絕對喺惹人垂涎。西冷試咗一小口，果然不同凡響，既腍滑，又濃肉味，堅好食；再試一小口虎蝦，蝦味濃，極之爽口，就算唔沾醬汁，都夠晒好食，更喺食出原味。

香橙甜酒梳乎厘配薑味雪糕

個梳乎厘上到枱，就明白點解有3道菜或4道菜嘅選擇，因為，個梳乎厘比預期大好多，兩個人共享一客都OK喎。無論梳乎理，抑或雪糕，口味都喺好特別，先試一口梳乎理，質感超鬆軟，比綿花糖更軟綿綿，微微橙味，又帶點酒香，加入雲呢嗱汁，非常好食；一啖梳乎理，襯一啖雪糕就最好，因為雪糕嘅薑味好突出，甚有清清味蕾之效。

大家都非常滿意今晚嘅晚餐，但始終唔喺平，就問問店家有無做午市，因為午市點都會比較平一截。原來，「午市精選」喺半自助套餐形式，分為兩道菜（$168）或三道菜（$188），前者就喺前菜及沙律任食，後者則連甜品都任食，並包是日餐湯及餐飲，而主菜則6揀1，不過，需留意部份主菜要額外加錢。呢個價絕對抵食，唯可惜，只限星期一至五供應。

優雅嘅環境，驚喜嘅食物，雖然無點到酒品，一樣喺醉人之夜，傾吓傾吓，結果坐咗幾個鐘，喺近期難得一次可以暢聚到咁夜嘅飯局。

個人評分
味道：9/10
環境：9/10
服務：9/10
抵食：8/10
平均每人消費：HK$450

餐廳資料：
堤岸酒吧及餐廳 Pierside Bar & Restaurant
尖沙咀廣東道33號中港城皇家太平洋酒店海景翼大堂高座
2738 2398