其實間店嘅位置喺幾隱蔽，瑟縮入安樂里小巷之內，但一踏入餐廳內，絕對有種世外桃源或隱世小店之感，因為一室以純白為主調，兩邊牆鋪上仿草牆，配以淺木系枱椅，再掛上唔少盆栽，加上樓底特高，喺咪好有一種田園小清新嘅感覺呢！
呢度點餐，除一般剔紙仔之外，更可以掃一掃獲分派嘅二維碼，再利用手機直接落單。當我以為好新「科技」，友人話晌內地已經興咗一段時間，真喺少見多怪添。
睇見店名，就知主打喺台式麵啦，除湯麵，仲有乾拌麵、便當、台式小食，而飲品亦多元化，如奶蓋、沙冰、梳打，仲有，餐廳更引入台灣阿華師嘅靚茶嚟製作一系列嘅茶品。
最正喺，點選主食，可以加錢配飲品，而有啲正價飲品，亦有半價優惠。食到尾，店員更話甜品都有半價，超划算，但點菜紙就唔見有，晌手機程式裡先發現到，其實見牆上有啲甜品相都覺得有古怪架喇。
台灣夜市小拼盤 $48
落單無耐，就好快有菜上，先嚟一客細拼盤，邊食邊吹水，講吓生活近況。拼盤寫到明包括路邊小香腸、台灣鹽酥雞、酥炸花枝丸及木魚炸豆腐，款式都好台灣風味，小香腸帶點甜味，鹽酥雞等陣先講，花枝丸嘅墨魚味好強，而豆腐外脆內嫩，配木魚碎添幾分鹹香。
芒果沙冰 $11（原價$22）
配小食，友人就話梗喺冰凍嘅沙冰好啦，4款沙冰中，芒果喺佢最心水。唔好話因為半價就會將貨就價，送到嚟一樣大大杯，色澤鮮黃，友人話芒果味好濃郁，啲沙冰打得綿密，仲唔會出現啲碎冰粒。
奶蓋桂花 $17.5（原價$35）
小弟就偏向啲奶蓋系，揀咗隻由「阿華師」茶園出品嘅茶葉做嘅桂花茶。鹹鹹哋嘅奶蓋，打得好綿滑細緻，口感一流，而桂花茶好清幽，兩者混合埋一齊，有種好清爽嘅化學作用，清香得宜，配我點嘅鹽酥雞麵就夾晒，難得仲喺半價就飲到嘛。
紅燒牛肉便當 $56
友人選便當，因為喺飯桶一名，而一客便當仲會配埋潺菜、鹵蛋、四季豆，加上牛腩嘅份量可不少，當然底下其實墊咗少少白蘿蔔，但可算為非常豐富。先講吓啲牛腩，好得，極之軟腍鬆化，一咬即開，又炆得入味，啲配菜又好食，白飯夠晒軟熟有飯香，呢個價真喺好抵吓。
肉燥鹽酥雞麵 $64
我就揀咗食麵，選咗清湯（透過手機有得揀，我見剔紙仔嘅話就好似無得揀），所以睇落湯色唔喺好深，麵條幾好，有韌勁，又耐浸，食到尾都唔會腍晒；不過啲肉燥就碎濕濕啲，而且，味道唔算突出，反而啲鹽酥雞炸頗香口，鹹鹹香香唔油膩，兼肉質出奇咁嫩滑。順帶一提，好鍾意佢哋用啲木搖托盤拌客，多俾台灣味。
仙草芋圓冰 $16（原價$32）
店員話甜品都有做緊半價，所以，順利成章試埋啲台式甜點啦。我就簡單啲，仙草配芋圓，嘩！就算半價都照足俾咁大碗，意外驚喜，份量真喺唔少，所以，友人都食唔晒。芋圓好有咬口，仙草亦都爽滑，碎冰埋底，食完透心涼，勁解暑呀！
招牌芋泥芋圓冰 $19.5（原價$39）
友人所點嘅都喺芋圓冰，只喺無仙草，但就加入大量芋泥，佢大讚啲芋泥又香又滑，不過，就略嫌對芋圓口感有啲硬淨，而味道卻喺OK嘅。
「牛霸」嘅食物做得唔錯，而且，定價相宜，啲飲品及甜品加配更喺抵到爆，環境又舒服，真心希望佢哋做得長久。點解咁講？因為一睇個地址好面善，2016年嚟過喺間咖啡店，之後，舊年年中嚟就變咗居酒屋，依家就成為家台式食店。
個人評分
味道：8/10
環境：8/10
服務：8/10
抵食：9/10
平均每人消費：HK$116
環境：8/10
服務：8/10
抵食：9/10
平均每人消費：HK$116
餐廳資料：
牛霸小麵店 Niu Ba Taiwanese
灣仔安樂里1號利昌大廈地下低層D號舖
2389 1086
牛霸小麵店 Niu Ba Taiwanese
灣仔安樂里1號利昌大廈地下低層D號舖
2389 1086
沒有留言:
發佈留言