馬祖台灣養生湯麵館 Taiwanese Mazu Lifestyle Noodles：不「藥」而同

今晚無飯開，本來都打算返屋企煮麵食，咁啱同個朋友傾開偈，大家都無飯開，摘日不如撞日，索性約出嚟聚聚吹吓水。因為都喺閒聚，大家又喺晌中環返工，所以，就揀咗嚟「馬祖台灣養生湯麵館」，食碗養生湯麵。

餐廳屬小店格局，其實，仲有樓上嘅，不過，就無走上去睇。而廚房設晌樓下，所以，下層嘅空間唔太大，然而，裝修企理，地方整潔光猛。

餐牌一大張A4底面兩版睇晒，一版喺所有主食，以養生湯底做成不同嘅口味，一共11款，可配米線或白飯，部份款式更可配手工麵，定價為$65-$77，無加一服務費。

反轉嘅另一版，就喺不同嘅飲品同一啲小食，前者都幾多特色嘢喎，好似自家製冷泡茶、冷萃咖啡、荔枝烏龍茶、黑糖薑母茶、牛蒡茶……等等。

Nescafe雲石牛奶咖啡 $18、荔枝烏龍茶 $10

小弟一向都喜歡嘆吓咖啡，見呢度有款「雀巢」出嘅牛奶咖啡，賣點喺「冷萃」，即喺低溫慢萃，即喺好似冰滴咁。入口個咖啡味較清醇，奶味偏重，幾啱我飲。友人就要咗荔枝烏龍茶，佢話茶底頗清香，而荔枝味非常突出。

藥膳農場醉雞米線 $67

大大碗嘅藥膳米線，上到枱時散發出好濃嘅藥材香氣，真喺唔講得笑，所以，即時飲番啖，感覺喺好真材實料，濃而不濁；配上滑溜嘅米線，好食，份量又足。啲雞件亦都好嫩滑，滲出微微酒香，皮下脂肪少，同埋，好有鮮味。呢一碗藥膳米線，如果晌秋冬嚟食，唔單具養生、食療之效，感覺更令人暖和呀！

藥膳古早牛肉湯手工麵 $75

其實喺平常食嘅台灣牛肉麵嘅藥膳版，湯色深沉醇厚，比起我試嘅藥膳農場雞米線，個湯嘅肉味更濃郁，但又不失藥材所帶嚟嘅香氣。啲牛腩裁得好大件，炆得入味而鬆化，喺心機之作；而手工麵呢，耐浸又具咬口，友人大讚成碗牛肉湯手工麵都好有質素，牛肉湯配上藥材，甚有驚喜。

本來都喺打算同老友短聚，但入夜嘅中環內街，顯得好寧靜，是夜客人亦唔多，不知不覺間，傾咗成粒鐘，店員亦主動幫忙執拾枱面，仲低聲一句慢慢坐。

個人評分
味道：8/10
環境：7/10
服務：7/10
抵食：8/10
平均每人消費：HK$85

餐廳資料：
馬祖台灣養生湯麵館 Taiwanese Mazu Lifestyle Noodles
中環和安里6-7號聯安樓地下及M樓