格局如好多酒樓咁，裝修得富麗堂皇，前排中央有個大舞台，設咗啲音響、射燈，不過，望望啲地毡呀、枱布呀，都顯得有點殘舊，所以，相信唔多會有客人嚟擺婚宴，但好似啲地區組織、街坊聯誼會、社福團體……等等，晌呢度搞聯歡會就幾適合，地方唔過大，又唔太細，樓底高，無柱位先好嘛。
右邊一排仲間咗啲廂房，最啱就喺擺啲生日飯、百日宴……等小規模嘅聚會，自成一角點熱鬧都唔怕太影響人。
食物都喺啲點心啦，收順亦印晒晌啲點心紙度，所以，就唔多講。但值得一提，就算假日，都有唔少著數優惠，如「晨光第一擊」$9.8嘅指定點心，只賣$28.8或$32.8嘅「醒神百搭組合」；此外，仲有啲午市套餐、特惠孖寶……等等，另外，茶錢$10位，加一就必然架啦。
家鄉煎薄餅 $9.8
先點兩客「晨光第一擊」，皆因每款只喺賣$9.8，更喺無將貨就價，睇件煎薄餅嘅呎吋就知啦。煎得唔錯，個薄餅唔會太粉，夠乾身，又有啲脆邊位。其次，混咗好多蔥粒，好有蔥香。
娥姐蒸粉粿 $9.8
粉粿？乾事後睇番張單，都真喺落咗粉粿，有無機會喺送錯我哋就無深究，但我就覺得似喺乜乜乜蒸餃喇！咬開，無沙葛、無花生，取而代之喺鮮蝦、甘筍絲、蔥絲，幾新鮮，餃皮薄又唔黏牙，當佢喺蝦餃咁食，賣$9.8真喺堅抵。
南瓜魚肚粥（A+C區組合 $28.8）
啲孖寶系列咁抵，亦無理由唔嗌，先嚟一大碗粥，一身橙黃，入口都幾有南瓜香甜味，質感亦都夠綿，不過，肚肚就唔多，亦裁得好細粒，反而撈到大大嚿排骨，哈哈！
香煎蘿蔔糕（A+C區組合 $28.8）
「A+C區組合」嘅另一款點心要咗蘿蔔糕，無話喺孖寶優惠就縮咗水，都照酒樓慣常所見嘅3大件。平常食嘅，啲蘿蔔絲都切到好幼身，但呢度啲就好粗身，不過，就好清甜，好有蘿蔔味，混入些少臘味，煎得亦都唔錯。
翡翠帶子腸（B+C區組合 $32.8）
「B+C區組合」其中一款嗌腸粉，飲茶食點心無咗腸粉梗喺好似欠咗啲嘢咁。睇見啲內餡就知啲腸粉皮拉得夠薄啦，亦唔無話好削身，裡面包住啲珍珠帶子同翠玉瓜，份量都佔唔少。
蜜汁叉燒包（B+C區組合 $32.8）
叉燒包就失望啲，雖然，個蜜汁底做得香濃，叉燒鬆化，又無乜肥肉，之但喺包身一咬已有個實實哋嘅感覺，缺少咗份鬆軟感，可以講喺唔合格。
醬皇蒸鳳爪 $26.8
由於姨仔鍾意食雞腳，所以，專登點呢味點心，亦喺唯一一款散點嘅點心，所以，相對價錢就無咁划算。幸而，做得有質素，味道香濃而惹味，墊底嘅花生亦夠腍。
第一次嚟幫襯，印象唔錯，地方闊落，喺有少少舊，但招呼幾好，喺個叉燒包唔得，其他都食得稱心，就算喺假日，又多抵食嘅選擇。
個人評分
味道：8/10
環境：7/10
服務：7/10
抵食：8/10
平均每人消費：HK$50
味道：8/10
環境：7/10
服務：7/10
抵食：8/10
平均每人消費：HK$50
餐廳資料：
京都薈 Capital Canton
美孚美孚新邨4期百老匯街73號地下及1樓
2727 3188
京都薈 Capital Canton
美孚美孚新邨4期百老匯街73號地下及1樓
2727 3188
沒有留言:
發佈留言