皇玥餅藝 Imperial Patisserie：堅喺12道蜂味喎！

認識「皇玥餅藝」始於舊年參加過其月餅工作坊，知道佢哋紥根香港，致力傳承中式餅藝文化。之前，想試到佢哋嘅出品，只有晌網上訂購，事隔大半年，卒之見到佢哋嘅實體店，落戶晌尖沙咀，以後要購買佢哋嘅產品，就非常方便。

如果想了解更多，上其官網就有晒介紹，好過睇我重複打多次吖。而今次想如大家分享嘅喺佢哋其中一款「蜂巢蛋卷」禮盒。

打開盒內，附有兩張小單張，一張喺店家嘅簡介，當中有介紹到做餅嘅靈魂人物「葉師傅」，以及多款主打產品，如蛋卷、酥餅、酥條、曲奇……等等。

另一張就重點介紹番佢哋嘅皇牌推介「蜂巢蛋卷」，除用料天然、優質高級、無添加之外，並標榜百份百香港製造，更有好多款口味供選擇，足足有12款，可以講喺守住傳統手藝，更要晌味道上發揮創意。

至於呢一罐「奇趣蛋卷」禮盒（$198，應該新張關係，有買2送1嘅優惠），上下兩層共8包，每包有3條蜂巢蛋卷，咁就可以逐少逐少食，唔使一打開成罐怕潮而密密食。味道方面，包括原味、香草蕃茄、櫻花蝦、黑松露，看似經常會食到嘅味道，但用嚟做蛋卷就甚少有。

原味蛋卷

做到蜂巢形相對平常見到嘅平滑形應該有一定嘅難度，打側望望，捲起嚟都幾厚身吓，但入口好鬆化，蛋香味唔失禮，而且，比一般賀年禮盒啲蛋卷細條，兩口就搞掂，減少食到一地都喺蛋卷碎嘅情況。

香草蕃茄蛋卷

睇落個樣都已經喺紅紅哋，入口嗰陣陣蕃茄味堅突出，再滲出少少香草味，比預期嘅味道濃郁，所以，頗有驚喜。

黑松露蛋卷

依家晌應用黑松露方面已經極為多元化，雞蛋仔、曲奇都有用到，所以，用嚟做蛋卷唔會覺得太出奇。本來黑松露一向味強，但相信店家刻意減低其份量，故入口黑松露嘅香味唔會太搶、太霸道。

櫻花蝦蛋卷

除香草蕃茄，櫻花蝦呢款口味就最得小弟歡心，因為，確喺有一份濃香嘅蝦鮮味咁，加上鬆化酥脆嘅口感，實在喺有質素，有心思嘅蛋卷。

試勻晒4款蛋卷，果然值得稱為其皇牌推介。上文都提及過佢哋嘅蛋卷口味多達12款，款款獨特，包裝又美觀，相信用嚟送禮倍感得體。

個人評分
味道：9 /10
環境：7 /10
服務：8 /10
抵食：7 /10
平均每人消費：HK$50

餐廳資料：
皇玥餅藝 Imperial Patisserie
尖沙咀加連威老道43號地舖
2361 8080