南記冰室 Nam Kee Restaurant：我的星期六美孚早餐 ~ 清淡至上

「我的星期六美孚早餐」系列好耐無寫過啦，皆因呢區都無乜新店好寫，對上一篇都已經喺舊年8月尾嘅事。不時搭巴士時，都經過見到呢家新茶記「南記冰室」（其實都開咗一段日子），喺嫌離屋企遠少少懶行過嚟，卒之扚起心肝同老婆行過嚟食個早餐。

始終喺星期六朝，又過埋九點，客人喺相對無咁多。依家好多茶記都改叫冰室，「南記」都用上冰室二字，不過裝修簡約，無咩玩懷舊成份，但勝在地方都大，又乾淨企理，我哋揀咗埋牆嘅卡位，就更為闊落啲添。

基本餐具、調味料已一早放晒晌枱，不過，仲有啲其他調味料如辣醬、美極鮮醬油……等等可以問問侍應。

講明喺嚟食早餐，睇睇有咩揀先。早餐餐牌一版A4紙睇晒，A到L項，唔多寫喇，自己睇睇，大致嚟講都喺三十蚊上下，一般茶記價錢。

可能有啲人嚟食午餐或晚餐，方便大家多個參考，將主餐牌都影埋出嚟，睇睇整體有啲咩菜式選擇。

A8 + B6餐 $34

即喺咩嚟？其實喺分A、B兩組嘅自由配搭，A8 + B6就於墨魚春卷麵搭漢堡扒煎蛋 + 牛油多士，配餐飲。大多數茶記嘅公仔麵都喺用大光麵，頂多就加錢轉出前一丁，但呢道有另類選擇，就喺加錢轉福麵。話時話，個墨魚春卷麵OK喎，麵就喺大光麵，普通嘢咁啦，但墨魚春卷唔錯，有墨魚味，幾爽口，唔會一口粉咁；

而漢堡扒煎蛋件漢堡扒唔喺牛肉嚟，跟食緊麥記豬柳蛋漢堡塊豬柳一樣口感同味道；但隻蛋道煎得迤咗啲，煎過火，個蛋黃就老晒、實晒。

L中式早餐 $29

呢個中式早餐就無得揀，指明喺皮蛋瘦肉粥配豉油皇炒麵，但一個人食絕對大份量。個粥嘅料就好多，但粥底唔算好綿，而味道亦有少許偏淡；

炒麵又一大碗，老婆話食其中一樣都夠飽呀，而個麵唔油，但相對乾身咗啲，而且，味道亦喺偏淡。事後埋單時，同個主管吹兩句，原來佢哋以上年紀嘅街坊客多，口味偏淡，所以，如果啲客覺得唔夠味就寧願後加鹽、美極嚟調味，總好過一早做得太重味。

熱奶茶、熱檸水

呢個喺我同老婆落茶記嗌餐飲嘅慣性組合，杯奶茶稱唔上好滑，但茶底芳香。題外話，個人就唔好鍾意啲不銹鋼杯，因為易有手指紋及無咁易抹得乾淨，觀感無咁好。

雖然兩份早餐唔叫得好出色，但服務就幾好，見啲侍應會行嚟行去睇吓客人有咩需要，而且，都幾好禮貌。兩公婆食完早餐，跟住就會晌荔枝角公園兜番幾個圈散散步，依家天氣仲有點清涼，感覺舒服。

個人評分
味道：6/10
環境：7/10
服務：8/10
抵食：8/10
平均每人消費：HK$32

餐廳資料：
南記冰室 Nam Kee Restaurant
美孚寶輪街9號地舖
5168 1088