由於我都久唔久會嚟太子呢邊，所以，呢間分店我都好有印象佢個位置。餐廳位處地庫，落到去，地方話大唔，話細唔細，間高咗啲間板，減少前後枱之間嘅騷擾，加上柔和燈光，整體感覺唔錯。而抽油煙喺採用上抽式，友人就大讚佢哋抽風幾好，因為效果還算不俗，至少食完都唔會覺得一頭「煙」周身燒烤味。
醃蘿蔔、韓式泡菜、大豆芽、醃青瓜（免費任添）
照舊，一坐低，乜都未點，侍應就送上4款前菜，亦喺食韓國嘢嘅一大特色，等你邊食邊諗吓叫咩好。幾款前菜都好食，尤其酸蘿蔔及酸青瓜，特別醒胃。除淨食，用嚟夾肉有去膩作用，效果非常好。最正嘅喺，所有前菜都歡迎無限添加，實在大方。
柚子醋田園沙律
除前菜之外，仲有一大碗沙律，雖然簡簡單單嘅田園沙律，但清爽外，帶有陣陣柚子香味。最鬼馬喺將片甘筍整成「笑哈哈」，令人望落都開心啲嘛！
主餐牌晌以前嘅食評都概略介紹過，烤肉、醬油蟹、蟹油蝦、韓式煎餅、炸雞、湯類、飯類、麵類……等等，亦一應俱全，唔使怕淨喺得烤肉咁寡。今次見佢哋有個「濟州產」嘅限定餐牌，內裡有多款濟州出產嘅食材，就不妨貼埋出嚟介紹吓。
不過，我哋反而較想試呢個「王者牛肋骨」，西餐有斧頭扒，所以，我就暱稱佢叫做「斧頭骨」，有成25cm長，好墜手，夠晒霸氣。更加好嘅喺好多肉類、海鮮都可以揀半份嚟叫，變咗人少一樣可以試多少少嘢。
因為個牛肋骨唔喺餐，而食韓燒真喺唔可以唔飲嘢，尤其凍飲就最夾，所以，順便都介紹埋有咩飲品。兩版紙嘅飲品，有多種特飲、汽水、啤酒、真露……等等，附加埋甜品都晌此版搵到。
枱上除有即棄圍裙外，仲備有鋼鉗、鉸剪供烤肉時用，另外海鹽、大醬、醬油、鮮蔬菜……等等韓燒開餐必需品，亦都一一備妥。
荔枝冰茶、水蜜桃果茶 @$36
一喺菠蘿，一喺荔枝，都喺小弟較心水嘅果茶，今次揀咗後者，冰涼嘅紅茶中滲出陣陣荔枝香，如果裡面多放幾粒荔就好喇。友人亦讚佢杯水蜜桃果茶，有濃郁嘅蜜桃果香，一口熱辣辣嘅肉，又一啖冰凍果茶，喺冰火嘅爽快感。
邊爐烤蛋 / 芝士粟米
晌食前菜、沙律期間，店員已為我哋預備好邊爐烤蛋及芝士粟米，依家呢兩樣都唔再喺新鮮事，不過，依然好食。啲蛋千祈唔好烤太老，而芝士粟米拉出一絲絲，綿香好食，更可以捲起啲烤肉一齊食，「芝」味立時提升。
王者牛肋骨 $226
睇相都覺得條牛肋骨夠巨型，到實物上枱，就更感震撼，「王者」之名都唔喺流。
侍應話條肋骨燒起嚟有少少技巧，當然唔介意客人自己燒，但最好由佢哋代勞，開到聲就梗喺等佢搞，我就撓埋手得食啦。的確，由於條骨彎彎哋，喺需要啲技巧。
辣好幾邊之後，再剪成小件，跟住就可以由客人控制番自己喜愛嘅生熟度，不過，侍應就溫馨提示吓，千祈唔好太熟，頂多七乘好喇。
先淨食試試，啲牛肋骨肉軟腍得嚟，又帶少少韌勁，好夠肉香，又因為本身醃過，頗惹味。
再用較傳統嘅韓式食法，搵生菜包住嚟食，夾埋少少泡菜或酸蘿蔔，入口無咁膩，但保持嗰份肉香；另外沾少少大醬，又別有一番風味。
切條特級牛五花 $72（半份）
平常一講「五花」，就即時諗起「五花腩」，牛五花？未試過喎！最欣賞佢哋依家將每款肉都加上個牌仔，一來唔怕俾錯嘢，二來清楚知道邊款肉打邊款肉。
上網睇睇，牛五花即喺肩腹肉，位置即喺肋骨頭位啲肉。燒完之後，入口會覺得幾有咬口，無牛肋骨咁韌身，肉味亦好濃郁。
今回就將一小口牛五花，加上芝士粟米，搵啲菜捲起嚟食，食味過癮。
特級鹽烤豬背肉 $62（半份）
豬背肉，又喺一款較冷門嘅部位。第一眼望落去有啲似豬頸肉，色澤呈淡粉紅，有唔少油花，並平均分布，已灑上鹽及黑椒調味。
咪話個樣，食落口感都真喺有啲似豬頸肉一類，爽爽哋咁，帶點油潤感，因為已有啲調味，就咁淨食就好唔錯。
韓式大蝦 $52（半份）
一客得3隻，感覺有點貴，不過，啲大蝦都幾新鮮，如果細心留意，喺將中間嘅蝦殼已經去晒，所以，燒完就已經可以即食，唔使搣蝦殼咁麻煩，抵讚。燒後嘅蝦肉算幾爽，沾點海鹽就更能突出到蝦肉嘅鮮甜味。
野菜
由於每碟食材都搭上少少唔同款式嘅野菜，一來令每碟食材外觀好睇啲，二來都唔使特別叫一籃野菜已經有夾夾埋埋燒出一大份烤野菜，最好食就首推南瓜啦，啲菇菌都唔錯。
整體，除食材鮮新具質素外，招呼亦都好好，不時問有無需要幫忙燒烤、添前菜，適時換過一塊新鐵板……等等，兼且禮貌周周。由食講到旅行，原來友人打算去濟州，而小弟數年前去過一轉，反而想去首爾，因為對上一次出誇訪首爾已經喺廿多年前嘅事嘞，一餐韓燒頂住癮先。
個人評分
味道：8/10
環境：8/10
服務：9/10
抵食：8/10
平均每人消費：HK$260
味道：8/10
環境：8/10
服務：9/10
抵食：8/10
平均每人消費：HK$260
餐廳資料：
炑八韓烤 MeokBang Korean BBQ & BAR
太子彌敦道749號歐亞銀行大廈地庫
2390 6822
炑八韓烤 MeokBang Korean BBQ & BAR
太子彌敦道749號歐亞銀行大廈地庫
2390 6822
沒有留言:
發佈留言