Ignis by Linx：精．型．午餐

食友知我喺晌中環返工，特別推薦一家新開嘅歐陸餐廳「Ignis by Linx」叫我試試，佢話質素高、環境靚、午餐定價相宜，好值得一試。講到咁心動，就趁假期前拉埋同晌中環返工嘅朋友到訪，一嚐其午餐喺點。

餐廳位處中環加州大廈，一出電梯就喺，整個用餐區（二樓）一眼望晒，第一個印象喺予人高雅而時尚嘅感覺，簡約而不失格調。一室黑金配，雲石地台襯雲石餐枱，真樣梳化椅舒適好坐。此外，有少部份高腳枱櫈，適合淺酌幾杯，嗌點小食。而酒吧區（一樓）因為午市無開放，就唔知喺點喇。

除咗環境，枱上添設少少擺設，如燭燈、小花束，都令人感覺好唔同。

午市主要提供「自選三道菜午巿套餐」，唔止自主，仲可以好個人化，點解咁講？$158嘅三道菜午餐，喺可以晌6個系列「Power Breakfast、Leaves、Eggs、Proteins、Carbs及Cheats」共23款菜式任揀3道菜，據個人喜好點揀都得，即喺你鍾意嘅話，揀晒3道沙律都可以，並奉送餐飲一杯。唯溫馨一提，Proteins類則需另加$40一道菜。

Avocado

為求樣樣都試，我哋就晌每個系列中揀一款菜式，打頭陣有呢一道牛油果多士，仲諗住會喺前菜類，細細份，估唔多份量不少。

以高纖嘅麥多士鋪上大量牛油果蓉，多士脆口而有麥香，牛油果蓉綿密細滑，最正喺既加咗脆口嘅去衣合桃，完全無苦澀味，以及添咗啲超級食物奇亞籽，加強健康感。

Beetroot Tartare

沙律類點咗個紅菜頭他他，賣相吸晴，色澤對比強，明顯鋪排花過心思。唔單呢道菜，呢度所做嘅食物，賣相都睇得出經過精心雕琢。

紅菜頭本身口感喺好硬，依家做法做到好似意大利菜嘅「牛肉他他」咁，口感綿密，非常有趣；再襯以石榴子、藜麥、可達羊奶芝士，伴以清香嘅香草青醬，令味道、層次，都變得豐富有層次。

Omelette

蛋類為咗方便大家分嚟食，就揀咗「蘑菇奄列」，雖然只喺一道簡單嘅奄列，但做得的骰精緻，面頭更灑滿巴馬臣芝士碎，外觀睇落，啲蛋炒得都幾嫩滑。

一切開，中心仲有些微蛋漿滑溜出嚟，而裡面填滿咗菌粒，入口啲蛋細嫩富蛋香，陣陣芝士香隨之湧出。

Beef Hanger Steak +$40

西冷、肉眼、T骨……等都比較多食，封門柳算少見啩，加錢都要試啦！即喺乜？上網查查喺橫隔膜嘅一組肌肉，一隻牛得一條。做法簡單，少少調味，煎封後伴薯蓉就上枱。

師傅好細心，將牛柳裁成小件，方便我哋食用，而單睇外觀，色澤保持鮮嫩，卻唔會有半點血水，入口肉味濃，口感軟腍，好正；而薯蓉打得十分柔滑，富薯香，真材實料嚟。

Linguine

呢個類別叫Carbs，唔好誤會為Crabs（蟹），再睇睇菜式嘅選擇，就意會到佢喺Carbohydrates（碳水化合物）嘅縮寫，所以，唔會有蟹架。我哋就揀咗道「西班牙辣肉腸扁意粉」，貪其惹味感。

個扁意粉唔止有微辣鹹香且煙煙韌韌嘅香腸，更落咗唔少菲達羊奶芝士，令其鹹香度爆燈；而扁意粉口感好得，極具彈牙咬口，沾上微辣醬汁，絕對喺惹味之選。

Lemon Tart

幾款甜品都喺心水，而友人最想試就喺呢一款檸檬撻。佢唔喺只當是日甜品咁簡單，喺如一頓細緻晚餐嘅正式甜品咁，單喺賣相已非常吸晴。伴碟嘅以「馬令」（Meringue）做出波浪紋，放上少少西柚肉及糖漬檸檬皮，甚富心思。

至於件撻，我同老友都異口同聲俾個超讚佢，因為，實在高水準。先喺撻殼，無論喺殼邊，還是殼底，厚薄均一，入口十分鬆脆；中層加咗薄薄一層海綿蛋糕，再嚟喺清香嘅檸檬軟漿，入口輕盈清新，檸檬味酸香自然；而最上層嘅「馬令」，唔單令賣相更立體，清甜嘅蛋白餅，做得好綿滑。

Coffee、Lemon Tea

除一般啡茶，亦可考慮+$28轉為鮮打沙冰，不過，襯甜點，小弟都喺選咖啡。就連咖啡，都喺一杯有質素嘅即磨咖啡，睇見杯面一層薄薄嘅咖啡油，以及有掛杯嘅狀態，就知啲咖啡豆唔喺平價嘢，再者，就連鮮奶都打熱至有少少奶泡。入口除咗香醇，帶有少少果仁香。

用餐環境嘅舒適，自然有相你睇，而服務都好有級數，上菜有節奏，唔會一下子上晒啲菜式，當對菜式嘅煮法、所用嘅食材有疑問，侍應對菜式都有一定嘅了解。再者，用料具質素，又以唔少健康嘅食材入饌，$158呢個價確喺超值。

個人評分
味道：9/10
環境：9/10
服務：8/10
抵食：9/10
平均每人消費：HK$196

餐廳資料：
Ignis by Linx
中環蘭桂坊德己立街30-32號加州大廈1-2樓
2623 0298