蘇媽廚房 SoMa Kitchen：蘇far．蘇 good

提起旺角，就梗喺人來人往、多人多到不得了嘅城地方，但旺角外圍，可以靜到近乎人影都無隻。今晚同友人嚟到「蘇媽廚房」食私房菜，真喺有少少尋寶嘅感覺，友人就話喺so far嘅感覺，因為沿豉油街行到篤尾，只喺7:00pm啫，四周圍都好夜闌人靜咁，好似去咗好遠咁。

「蘇媽」屬小店經營模式，推門內進，環境一眼睇晒，4張小方枱，頂多開到14個位，少少逼夾。但一室紫白配襯，幾盞精緻吊燈，令氣氛有種柔和感。

睇見廚房前擺放好多飯壺、湯壺，無特別過問店主，可能喺做附近寫字樓嘅另類「包伙食」？！

講明喺小店，菜式不能提供太多，從餐牌所見，A至I共9款，款式不拘一國，有小食，有沙律，有主菜，亦有甜點，可以講喺全日供應嘅餐牌，包餐飲，應該喺主理人「蘇媽」嘅手本菜式。

除此，「蘇媽」嘅晚市亦會提供私房菜，有咩想試，或有咩唔食得，即管跟店主溝通吓點安排。而今晚我哋就喺嚟試試私房菜，由於我哋幾個乜都食，所以，就由「蘇媽」發辦，每位$258，無加一。

蘇媽靚湯

先嚟喺蘇媽靚湯，亦喺店主嘅誠意之作，無添加，無味精，仲大大煲放出嚟可添飲。

一煲喺青紅蘿蔔煲豬骨，好家常嘅味道；另一煲喺素湯，有雪梨、蓮藕、蜜棗、南北杏……等等，味道幾清，但感覺滋潤。

帶子松露多士

用上鮮帶子嚟做，味道自不然鮮甜爽口，下松露醬亦無手緊，細細件嘅多士都落成一大抹，故此松露嘅幽香勁突出，唯挑剔位喺啲多士攤涼咗，未夠脆熱。

糖醋素咕嚕

素咕嚕喺以猴頭菇嚟「扮嘢」，外觀都幾似架，而個糖醋推得幾好，酸香不嗆喉，而且，薄薄包住啲猴頭菇，唔會話太杰身漿住晒。

香煎豬鞍配三色椰菜花薯蓉

一容有兩大件豬鞍扒，又配上大量沙律菜、椰菜花薯蓉，份量大足，3個人「些牙」就啱啱好。豬鞍扒燒得幾靚仔，帶點焦香，切落都幾腍身，入口有點點爽口，富肉汁，喺不俗嘅質素；初頭無為意個餐牌，以為就咁得薯蓉再加啲紫薯粒，食落有啲爽爽哋，原來喺椰菜花，估唔到咁嘅配搭幾OK啫。

黑椒煙鴨胸炒意粉

炒意粉易做，但就未必做得精，不過，「蘇媽」手勢唔錯，意粉炒出嚟入口有韌勁，個人就最怕腍晒嘅意粉，但再少啲油就更好。而鴨胸好有煙燻香，軟軟腍腍，配意粉喺好拍檔。

朱古力撻

最後喺一人一客朱古力撻，外觀睇落就好似好正喇，立即試試先。入口，朱古力醬做得既柔滑而挺身，朱古力味郁濃，喺質素嚟；牛油皮嘅撻殼都OK，但以個人口味而言，未算極鬆化。

驟眼所見，嚟幫襯嘅都喺熟客居多，或附近嘅家庭客。確實，嚟到用餐，感覺真喺好家常，招呼好親切，故此，唔好太當喺食私房菜，反而當喺去朋友屋企食餐家常飯。整體而言，食物嘅質素就so far so good咁啦，定價個人覺得有少少貴，反而，計落散點似乎更划算！

個人評分
味道：6/10
環境：7/10
服務：8/10
抵食：7/10
平均每人消費：HK$258

餐廳資料：
蘇媽廚房 SoMa Kitchen
旺角豉油街10號地舖
5548 7428