元朗冰室 Yuen Long Bistro：元形畢露

雖然不時都有落茶記食嘢，但就唔喺次次都有寫食評，一來都喺星期六落番美孚嘅茶記食早餐，都已經寫過，二來就可能無乜嘢好寫，就懶得寫。最近，就短期內去咗3間茶記，分別喺美孚「南記冰室」、荔枝角「飯意冰室」，以及今次分享唔喺開晌元朗，而開喺旺角嘅「元朗冰室」。

之前都提及過，依家間間茶記都改為以冰室掛帥，但就無玩懷舊裝修，只喺得個名，而「元朗冰室」更以厚豬扒專門店自居。旺角區租金貴，可謂吋金呎土，枱櫈排得密麻麻都預咗，幸而樓底高，感覺唔會太侷促。

餐牌插晒晌枱上，最抵嘅喺精選午餐，一共12款，包一杯餐飲，定價為$47-$56，旺角區嚟講，唔算貴啦。

但講到喺餐廳嘅賣點，當然喺厚豬扒系列啦，有配飯、配烏冬、配沙律，定價$46-$62，都算喺晌合理嘅範圍。既然厚豬喺佢哋招牌，我哋主打會點呢樣。

此外，仲有款特餐、全日早餐嘅系列，賣$45、$49、$59，可能喺大堆頭製作，見有唔少客人叫。

剩番一類叫拉麵之選，雖然比起拉麵店平一大截，但我心諗，想食拉麵嘅人大多數會去拉麵店，而嚟得茶記就想食啲港式嘢。

厚豬扒配司華力腸飯 $52

呢度啲餐碟寧舍巨型，掗咗半張枱，就算塊豬扒夠大塊，整體睇起上嚟都唔多好睇。然而，講到「厚豬」就不敢苟同，對比起「大家樂」嘅一哥焗豬，嗰啲先稱得上厚豬啦，點睇都只喺普通厚度，真喺原形畢露。雖然炸得甘香，入口鬆化，但有啲油膩；司華力腸亦只得半條，俾人有種小家嘅感覺，醬汁只有甜豉油一款，無得揀。

厚豬扒配蓮藕餅飯 $52

老友就點咗配蓮藕餅，都只喺細細哋兩件，無話好唔好食嘅，只喺覺得未夠脆口，食落亦喺好油。

馳名厚豬扒全日早餐 $59

另一位朋友見呢個全日早餐好強勢，點都要試一試。整份早餐包括馳名厚豬扒、茄汁豆、歐陸腸、火腿嫩滑炒蛋、牛角酥、田園沙律，賣相就認真幾得，但食味就普普通通咁，茄汁豆、歐陸腸喺凍嘅，牛角酥無牛油香，火腿感覺喺平價貨色，唯獨豬扒做得香口鬆化。

熱奶茶

用上黑白奶嘅茶杯，唔晒多講，都梗喺用黑白奶嚟沖調港式奶茶，茶底馥郁，茶味醇厚，但柔滑度普通而已。不過，奶茶我都喺鍾意呢一類厚身有耳瓦杯。

食物上，我碟「厚豬」有負專門店之名，另外，亦想講講佢哋啲服務，事緣其實我哋一行6人，攞咗飛仔乖乖晌門口等位，但一個號碼過完又一個（喺指過咗我哋個號碼），二人枱、四人枱都嗌咗6、7張，我哋問門口個姐仔，過咗咁多張都未有我哋？佢話好難同時有枱拍到俾我哋，但睇在眼裡，佢根本就無心安排（有心嘅，安排4個坐住先，再等多陣拍張2人枱就搞掂，茶記客一般都快上快落），因為門口等位人多唔憂做，結果，費事等，叫佢「嗱嗱淋」安排兩張四人枱俾我哋就算。老老實實，無下次囉！

個人評分
味道：6/10
環境：6/10
服務：2/10
抵食：7/10
平均每人消費：HK$52

餐廳資料：
元朗冰室 Yuen Long Bistro
旺角彌敦道726號地下1-2號舖
2109 1938