之前友人去過，讚其環境好，有氣氛，又有Live Band，食物有水準，但我話怕嘈，應該唔啱我，佢就話無問題，因為可以揀食晏或下午茶，咁下午茶啱我喎，就趁復活節假走過嚟嘆個下午茶，輕鬆吓。走入店內，環境確喺比想像中好，地方寬敞，樓底夠高，裝修有格調。
雖然今日嚟喺嘆下午茶，不過，見佢個假日午餐餐牌仲棟晌門口，影埋出嚟俾大家參考。初時都無為意，事後睇番啲相，先知個供應時間喺由12:00pm-6:00pm，定價都唔貴喎，都喺$98-$158。
而我哋打算試嘅下午茶套餐（二人份），睇餐牌嘅相片印刷得好精緻，有多走鹹甜點。雖然話叫做下午茶，供應時間喺1:00pm-6:00pm。
不過，研究咗個內容好耐，都睇唔明喺點，結果都要問一問侍應。原來喺包含3款鹹點、3款甜點（6款中按餐廳供應其中3款），再晌Tere De Moine 半硬芝士 / 意大利布袋芝士配天然蜂巢蜜 / 士多啤梨酥脆蛋糕3款食物中揀其1，而每一款食物都有兩客，並奉送餐飲兩杯，定價為$328 + 10%。
落單後大概等咗15分鐘，下午茶套餐卒之送到上嚟，侍應更慢慢將所有食物放好、砌好，以菱形盤子載起每一種食物，砌出嚟猶如蜂巢幾何，感覺幾特別。我哋都喺慣以鹹點為始，甜點作結。
馬茲卡彭芝士小點
初初一眼望落去，以為底下喺一片薄脆餅，點知喺腍腍哋，唔太討好；反而白雪雪嘅馬卡風芝士（我鍾意呢個音譯多過馬茲卡彭芝士）入口綿綿滑滑，淡淡嘅芝士味，最搞鬼以為黃色嗰啲喺檸檬青啦，原來喺啲鹹蛋黃碎碎。
煙燻三文魚三文治
呢個唔多介紹，一睇就知喺煙三文三文治，再配上珍珠芽菜，靚仔晒。啲煙三文鹹香油潤，只喺大路欠缺啲亮點。
自家煙燻車打芝士薯球
3款鹹點，以呢個薯仔波最得我哋歡心，因為薯仔波炸得香脆不膩，而內裡填滿車打芝士，份外惹味。
紅桑子芝士蛋糕
甜點方面，款款都做得的的骰骰，紅桑子芝士蛋糕更灑滿彩虹糖針，更加搶眼。紅桑子軟漿酸香清爽，夾埋下層嘅芝士蛋糕，夠平衡。
迷你蘋果批
呢款更喺老婆嘅是日心水推介，的確，入口軟綿，又好蘋果嘅清甜味，以及帶有微微玉桂嘅幽香。如果俾大件啲，就更滿足。
核桃朱古力蛋糕
形式有啲似布朗尼，不過，口感就更為軟身，而朱古力味極之濃郁，又唔會太甜、太膩；面頭柔滑嘅核桃軟漿，為朱古力蛋糕有畫龍點睛之效。
意大利布袋芝士配天然蜂巢蜜
其實，3揀1嘅選擇中，最初真喺無乜心水揀邊款，只喺見到呢一款有天然蜂巢蜜，老婆又好鍾意天然嘢，加上蜂蜜，就更喺穩妥之選。當見到成品時，就知完全無揀錯，大大份意大利布袋芝士下，墊有好多青、紅提，再加上兩大夥蜂巢蜜，賣相絕對有睇頭。
意大利布袋芝士味道比較清淡，唔會好似車打一類咁重芝士味，後而帶有奶香，口感極之綿滑細緻；伴上一小塊蜂巢蜜，嗰份清甜滋潤嘅蜜香一湧而出，非常有驚喜，再者，蜂巢嘅蜜味天然，又蘊含蜂蠟、蜂膠，絕對喺好嘢嚟，值回票價。
如果食完都覺得唔夠喉，有加配優惠，如+$88多一客Tere De Moine 半硬芝士 / 意大利布袋芝士配天然蜂巢蜜，或+$98配多客士多啤梨酥脆蛋糕。餐飲方面，基本選擇有草莓奶酪、藍莓奶酪或啡茶，值得一讚喺就算揀啲特色咖啡或花茶，都唔會額外收錢。
La Vie En Rose花茶
花茶啲款式多之餘，味道亦比較特別，結果老婆揀咗以蘋果、玫瑰草、玫瑰花瓣、紅茶混合出嚟嘅La Vie En Rose。入口感覺舒暢，帶有淡淡玫瑰花香。
Caffe Latte
最估到，身為一間酒吧餐廳，所做嘅鮮奶咖啡比咖啡店一啲都唔差，唔止個拉花圖案對稱，花紋細緻，最後收尾嘅尖尖喺對正茶杯嘅餐廳標誌。入口，更喺極具水準，唔使加糖，唔使攪，飲落已感受到嗰份均勻感，咖啡嘅味道醇香。
溫馨提示，雖然個下午茶套餐供應到6:00pm，但建議都唔好太晏嚟，因為嚟得食下午茶嘅，都喺三五知己，想靜靜享受吓，不過，大概五點幾會有樂隊開始為表演做綵排，雖然綵排咋，但都好認真、好較勁，立時打破晒寧靜，我同老婆都唔多鍾意嘈就覺得幾騷擾，所以，唔止我哋，幾枱客嘆完都埋單閃人。其實整體服務喺幾好架，不過，因着呢一點就要扣少少分。
個人評分
味道：8/10
環境：8/10
服務：7/10
抵食：8/10
平均每人消費：HK$180
味道：8/10
環境：8/10
服務：7/10
抵食：8/10
平均每人消費：HK$180
餐廳資料：
Lost Stars LiveHouse Bar& Eatery
大角咀利得街11號利奥坊一期地下506號舖
2337 6728
Lost Stars LiveHouse Bar& Eatery
大角咀利得街11號利奥坊一期地下506號舖
2337 6728
沒有留言:
發佈留言