星巴克咖啡 Starbucks Coffee：星星雙式

有個台灣朋友送咗隻台灣版嘅星巴克茶杯俾我，有隻大熊印晌杯上，無查究有無咩來頭，但就覺得幾靚。擺咗好耐都未正式使用，早前卒之就為佢開封，為咗新用佢，專登到公司附近嘅星巴克買件鬆餅嚟襯吓，自己滴漏番杯咖啡，晌繁重嘅工作中輕鬆一下。

紅豆抹茶鬆餅 $19

晌多款烘焙產品中，揀咗「紅豆抹茶鬆餅」，其實都無話咩心水嘅，原來喺想試佢哋嘅「香蕉合桃蛋糕」，不過賣晒，但見呢款鬆餅都帶4啲吸引，就試試佢。

咪睇佢賣成$19好似細細個咁，其實都幾墜手吓，墨綠色嘅美式鬆餅，面頭黐滿紅豆粒。一口咬落去，個鬆餅幾有抹茶香，質感帶微微濕潤，而紅豆粒就稍嫌硬咗啲。

以為成個鬆餅就喺咁，食多兩口咬到底，原來底層仲有啲紅豆蓉，清甜柔滑，算為平凡嘅鬆餅帶嚟點點驚喜。當然，如果鬆餅內仲混埋有紅豆粒，就更理想。

檸檬撻 $21

至於呢個檸檬撻就喺有日晌屋企做完成朝家務辛勞完獎勵自己嘅，晌美孚嘅星巴克買咗個返屋企，沖泡杯咖啡慢慢嘆，費事開篇新食評，就食埋晌呢度。

以$21嚟講，加上個撻成個手掌咁大，都算抵食。撻殼都頗為鬆化，但唔算好有牛油香，不過，就嫌撻底厚身，個人就覺得唔合格。幸而，中間嘅檸檬軟糕做得清爽酸香，軟滑好味！

前後試咗兩款星巴克嘅特色烘焙甜點，配上一杯咖啡，確喺為平淡嘅生活帶嚟點點樂趣。我成日都講，與其睇乜都唔順眼就「盞」自己激氣，負能量喺無意思，晌生活中搵啲點子，唔喺阿Q，只喺學吓點樣樂活做個快樂人。

個人評分
味道：7/10
環境：8/10
服務：7/10
抵食：8/10
平均每人消費：HK$20

餐廳資料：
星巴克咖啡 Starbucks Coffee
中環都爹利街13號樂成行地庫中層
2523 5685