粒粒果甜品 Fruit Lover Dessert：粒粒皆新款

晌旺角呢個年輕人出沒嘅潮區，就算喺賣糖水、甜品，都要有賣點先至吸到客。因為，唔單止競爭大，大部份嘅客源算上喺後生仔，普遍都唔長情，喜歡試新嘢，就算唔太鍾意食甜點嘅都會為打卡去幫襯。最後，同朋友試過「粒粒果甜品」，甚富打卡感，但絕對唔喺得個樣，值得推介。

餐廳門面喺全落地大玻璃，晌外面已經一眼清晰睇到餐廳內部環境，地方乾淨企理。以粉色作為主調，紅紅、黃黃、綠綠嘅櫈，牆上掛有不少畫作，以及手繪，都為餐廳增添不少歡樂、輕鬆嘅感覺。

睇見個店名，多多少少都估到喺以水果為主題嘅甜品店。晌玻璃窗上，就正正貼有唔少主題甜品嘅介紹，以及一啲飲食雜誌專訪。

主餐牌印得色彩繽紛、圖文並茂，並以唔同系列劃分，清清楚楚，不過，因為膠面印刷，都幾反光，好在門口有啲單張攞，正接掃描貼出嚟俾大家參考。

細閱就發覺款式甚多，而系列包括：思慕雪、皇牌甘露、水果星球、芒冰、草莓冰、白雪、窩夫、奶酪布甸、水晶圓、芋圓仙草、芭菲、椰汁、芒汁、冰飲……等系列，4款傳統糖水供應，以顧及中式糖水嘅人士，而2款小甜點，最啱開心「些牙」！

此外，仲有個額外餐廳，應喺一啲新推嘅款式，如龍珠星球、紅棗雪耳燉桃膠、香蕉朱古力窩夫，以及數款輕食墊墊肚。

唔只食甜嘢會令人開心，人多齊齊共享就更開心，正所謂獨樂樂，不如眾樂樂。故此，點都要等齊晒嚟一張大合照先似樣。

綠茶窩夫 $46

雖然只得「半底」，但伴兩球雪糕，仲有咁多配料，只賣$46，都喺划算之選。水滴形嘅窩夫烘得香脆，入口雖未至於熱辣辣，仍帶七分暖意；伴以甘苦味嘅綠茶雪糕、清甜軟腍嘅紅豆、煙韌軟糯嘅糰子，口感複雜，味道多變，好食！

芒果傾斜奶酪 $38

奶酪個名比較少聽，如果稱為意式奶凍，相信一講就明喺咩。我覺得店主好聰明，將平常嘅意式奶凍做成傾斜式，難度唔高，但晌視覺效果上就好不一樣。再配以椰果、芒果粒及大量燕麥脆脆，混和後一羹放入口，奶凍極有奶香，又綿滑，燕麥加添不少「脆」味，口感豐富。

牛油果思慕雪 $45

思慕雪系列，可以講喺店家最吸晴，賣相最搶眼嘅出品。而呢一杯蘋果綠色嘅思慕雪喺以牛油果及奇異果打成，加幾片薄薄嘅士多啤梨作裝飾，佢無一般沙冰咁冰，入口喺非常幼滑細緻，感覺清爽健康；然而，味道卻以奇異果味較突出啲，相信要加重牛油果嘅比例先可以突出番個主題。

水果星球配芒汁涼粉 $42

水果星球呢個系列好有心思，根本就喺慣常所見嘅乜乜生果撈芒果汁底，但將部份生果做成晶瑩剔透嘅小星體，感覺即時好唔同，賣相好得。大部份生果都好清甜，而水果星球喺搵大菜做，爽爽哋，唯一挑剔位，涼粉就切得太幼細，失咗啲口感，芒果汁底再濃啲就更好。

核桃露配豆腐布甸 $29

上面講嚟講去都喺較西式嘅甜點，中式嘅又如何，估唔到做得都有一手。核桃露雖然算唔上超濃郁，但核桃味清甜，質感柔滑，加埋粒香滑嘅豆腐布甸，可以講喺畫龍點晴，相得益彰。

細個時睇教育電視（後生一輩肯定唔知喺乜啦），學過一句諺語，粒粒皆辛苦，喺指嗰時啲人種米唔容易，粒粒皆辛苦。做飲食都喺，好食、好睇之餘，仲要有創意，時不時要有新款。

個人評分
味道：9/10
環境：7/10
服務：8/10
抵食：8/10
平均每人消費：HK$40

餐廳資料：
粒粒果甜品 Fruit Lover Dessert
旺角廣華街3號百利達廣場地下1號舖
2377 9388