碗碟、餐具都用料精緻，有黑白公筷、私筷，又有鋼夾，基本配套做足。
每枱枱側都擺放一個托架，喺用作稍後擺食物之用，不過，此刻就放咗「九宮格」醬料盤，而醬料收費每位收$18。攞完醬料後，基本上店員會攞走個醬料盤，以騰出空間，不過，唔使擔心啲醬料取用喺一次性，之後有需要加添可以再問問店員。
除一小兜混上自己幾款偏好嘅醬料外，如沙嗲醬、金蒜、蔥花……等，另外，見醬料盤內有青檸，就試嚟唧落豉油度，用嚟沾海鮮效果唔錯喎，更提鮮呀！
食火鍋湯底就梗喺好重要啦，「火鍋頭」嘅湯底真喺有幾多選擇，一系列招牌湯底頗幾有心思，另一系列精選湯底又可以選擇雙拼（以價高者另加多$25）。而有啲咩食，真喺講唔得咁多，索性將張點菜紙掃描出嚟俾大家參考吓就一目了然。但順帶一提，好多火鍋料可以加少少錢變雙拼。
蕃茄薯仔牛腩鍋 $128、養顏杏汁豬肺湯 $128
兩款湯底獨立計都喺賣$128，如果雙拼就變為$128+$25，一次試兩款湯底而加多$25喺好划算嘅取態。以往呢，打邊爐嗌邊湯底都好，喺純用嚟烚嘢，唔會飲，但呢度啲湯底真喺唔好錯過，先飲番碗為敬，就知絕無欺場。
蕃茄薯仔牛腩鍋
啲湯底真喺唔喺得個樣，好似兜蕃茄薯仔湯，唔喺家常滾湯嗰隻，個湯嘅蕃茄味頗濃郁，酸香鮮活；牛腩亦唔喺得一兩嚿嚟扮晒嘢，夾夾埋埋大概都有5、6嚿之多，肉質軟腍，又極有肉香。
養顏杏汁豬肺湯
杏汁豬肺湯飲過唔少，用嚟打邊爐印象就喺第一次，估唔到效果真喺幾好喎。首先，個湯嘅杏味未算超濃厚，但亦不失禮，有份清潤嘅感覺；而湯內藏有好多豬肺，啤水夠乾淨，全無臊味，口感爽爽哋，沾點青檸豉油已好好食。
自家鮮製竹蔗茅根 $58
打邊爐烚吓烚吓最慣常喺伴汽水，不過，下下火，清熱解毒嘅竹蔗茅根就更加好。一大樽睇得到真材實料，入口冰涼清甜，蔗味天然，食完成晚火鍋，一樽都好夠兩個人飲。
未開波烚嘢食前，順便介紹埋枱上呢張烚嘢指引，基本上，佢都涵蓋咗大部份食材所需煮熟嘅時間。不過，無意中發現，有啲食材，好似元貝、豬潤咁，竟同時出現晌30秒及1分鐘兩欄，哈哈！估計，喺視乎你想食到咩口感。
招牌芥辣墨魚丸 $88、招牌鹹蛋黃豬肉丸 $78
店長推介我哋試吓啲丸類、水餃、雲吞，因為全部都喺自家製，話喺質素高兼水準有保証，而且，全部都可以揀雙拼，雙拼就以價高嘅款式再加$10，所以，我哋呢碟雙拼丸就賣$98。
招牌芥辣墨魚丸
見點菜紙列為推介，所以，一心想試試。睇表面，亦都見到有點點青綠色斑紋。咬一口，唔使擔心，有芥辣陣味，但無乜芥辣陣辣勁，丸內更混有墨魚粒，添咬口，好食。
招牌鹹蛋黃豬肉丸
雖然都喺推介，小弟就覺得豬肉丸就無墨魚丸咁好食，啲豬肉丸喺打得鬆化嘅，但小弟較喜歡爽口嘅丸類，此外，鹹蛋嘅元素無預期中咁明顯。
台式酒糟豬 $68
平時打邊爐，好少唔叫牛，不過，因為其中一款湯底已食過啲靚牛腩，友人亦唔喺咩牛痴，必定要食牛，反而大家對呢款酒糟豬感興趣多啲。一客有6大片，部位大概喺腩位，睇外觀就知已處理過，心裡亦疑惑喺咪都可以就咁食呢？再睇睇「指引」，烚8秒就夠，即喺純粹灼番熱。入口嗰份酒香好突出，而啲腩片鬆化有咬口，好有驚喜。
蒙古羊肉片 $68
啲羊肉片刨到好薄，而且，色澤紅潤，喺新鮮嘅象徵。按「指引」，喺無講烚幾耐，但切得咁薄，就30秒我都覺得夠晒。輕灼後，啲羊肉又腍又滑，羊羶味唔重，好食喎！
海鮮拼盤 $398
晌點菜紙上有唔少靚海鮮，更有唔少喺貴價貨，以時價計算，不過，亦有多款優質海鮮喺以定價計算，但睇落最划算，都喺呢一款「海鮮拼盤」，一份已包本地原隻野生龍蝦仔、2隻蘇格蘭蟶子皇、2隻北海道野生元貝及1份新鮮馬刀貝。計過喇，散點要$598，足足慳兩嚿水，好明顯就知點揀啦。
本地原隻野生龍蝦仔（散點$238）
雖然叫龍蝦仔咋，唔喺食自助餐嗰啲細過隻手掌，入口都無一啖肉，只喺比一般龍蝦細隻少少，但外殼有光澤，啲肉晶瑩剔透，仲有少少膏。灼熟後，啲肉輕易離殼，大啖大啖入口，肉質爽彈，帶鮮甜味，爽呀！
蘇格蘭蟶子皇（散點$68 / 隻）
蟶子皇有成半呎長，大大隻，師傅稍稍已鎅開幾刀，所以，當淥熟之後，可以細口細口咁食。食落，啲肉好彈牙，依然覺得點少少青檸豉油喺最好，最能吊出鮮味。
北海道野生元貝（散點$58 / 隻）
啲帶子視為刺身級都不為過呀，隻隻都大過個五蚊銀，撳落去好有回彈力。不過，我哋一時分心，烚過籠，雖然鮮味依在，但質感未至最好，被我哋嘥咗少少。
新鮮馬刀貝（散點$108 / 份）
一份馬刀貝都有成8隻之多，唔可以跟啲蜆仔相提並論，隻隻都好大隻，灼熟每隻都開晒口，表示都喺新鮮貨，唔會有死貝。貝肉厚身飽滿，柔軟鮮甜，質素高。
順帶一提，晌FB讚好，會送你雪糕球一客，當喺甜品作結都好唔錯吖。
食咗成晚，可以總結一句：「靚料先行」，無論湯底，抑或丸類、肉類，都食得出用料精，尤其啲海鮮，更喺揀手貨。依家唔少香港人使得起錢，最緊要喺佢哋覺得值，俾多少少都無問題，「火鍋頭」可以講喺喜歡食高質火鍋嘅佳選，加上環境唔錯，服務到位，值得「頭」懷送抱！
個人評分
味道：9/10
環境：8/10
服務：8/10
抵食：8/10
平均每人消費：HK$465
味道：9/10
環境：8/10
服務：8/10
抵食：8/10
平均每人消費：HK$465
餐廳資料：
火鍋頭 Huo Guo Tou
九龍城龍崗道17號地舖及1樓
2382 3767
火鍋頭 Huo Guo Tou
九龍城龍崗道17號地舖及1樓
2382 3767
沒有留言:
發佈留言