享樂烘焙 LY Bakery：獨享樂，不如眾享樂！

最近同好友飯聚，老友見我「麵包王」呢個銜頭（都喺虛銜而已），分別送我兩款麵包，同樣嚟自新蒲崗嘅一家小店「享樂烘焙」。先介紹其中一款：「特濃抹茶焦糖三角」（$18），友人將店家嘅產品名牌都影埋俾我做參考，真喺唔話得。

未食都知啱我心水，皆因有焦糖成份，而且，從名牌所見，採用日本「小圓山」抹茶粉，自不然有更大嘅期望。成件三角即喺一大件厚三角多士，估計喺灑上沙糖嚟再烘焗過，所以，兩邊側面摸上手有少少黏，但大大口咬落去，外皮有份煙韌感，包心軟綿之餘，既有焦糖香，又有幽香嘅抹茶味，兩者幾有火花，再唔使又喺紅豆搭抹茶喇！

另一款麵包喺貝果包：「湯種黑芝麻貝果」（$15），細細個賣成15蚊，都唔便宜架。貝果包我唔算多食，亦叫唔到有心得，但幾喜歡佢嘅柔韌感。

個貝果包跟平常晌啲咖啡店所見嘅都無乜兩樣，喺叫表面有多少少黑芝麻，不過，咬開就變得不一樣。先講個包本身，撳落去有回彈力，口感煙韌有咬口，唔喺港式包軟軟熟熟一陣風咁；內裡散發陣陣芝麻香，因為填有芝麻蓉，不過，就未至於好似名牌咁講有流沙嘅感覺，或者輕輕翻焗一下可能會做到咁嘅效果。

兩個包，分咗兩日做早餐，沖杯咖啡或花茶，喺醒神一日嘅好開始。獨享樂，不如眾享樂！多謝好友相贈，讓小弟同樂。

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
享樂烘焙 LY Bakery
新蒲崗大有街3號萬迪廣埸地下E舖
9227 2634