山區裡的走走趯趯: 柏景餐廳 Café on the PARK：猜．情．尋

曾幾何時，因為有好多舊建築基於不同原因而被逼拆卸，突然先至有好多人走出嚟講懷舊、講集體回憶，其實，回憶呢家嘢真喺好講個人對某些事物嘅情感。生於上世紀70年代嘅小弟，正值香港經濟起飛嘅年代，但成長於H型7層公屋嘅歲月（依家啲後生想像唔到當時嘅公廁、公眾浴室及俗稱「水頭腳」嘅公眾攞水嘅地方），最懷舊回憶喺地下啲士多，因為有好多零食買。最近，就同啲老友記去咗皇家太平洋酒店嘅「柏景餐廳」食自助餐兼懷舊一番，皆因新主題做緊「黃金歲月尋味之旅」。

既然喺打正懷舊，場地亦多咗呢方面嘅佈置，晌度唔特別講，等大家晌相片中慢慢搜尋吓，此外，更專登將唔同食物區化身為唔同街道，就晌另一邊門口，就砌咗個「柏景冰室」牌檔景，喺打卡位嚟。食物方便，唔使講就梗喺有唔少懷舊嘢啦！之但喺，就算唔懷舊，菜式都大把選擇。

除咗多唔多嘢食，客人最關心喺價錢，近門口1張餐牌，就羅列晒各種自助餐唔同日子及唔同時間嘅定價，自助晚餐由$618-$688，但有唔同信用卡有折扣優惠，最正喺客人走去官網，提前最少1日晌網上預訂兼俾晒全數，有七折、六折，甚至高達半價優惠，視乎所揀嘅日子及近唔近啲大節日。

由於食物枱分多個區域，有效分散人流，而餐廳簡約時尚，地方寬敞，座位又編排得闊落，絕對無逼逼夾夾之感，加上燈光柔和，舒服好坐。同一班老友記聚餐，有傾有講，感覺自在。

健怡道

平時好少會介紹嘢飲先，但除因為一入門口就有條擺滿飲品嘅「健怡道」之外，今次更因為飲品亦有啲特別。講明玩懷舊，先有低糖嘅夏枯草，跟住就喺養生嘅紅菜頭梨汁、健怡兼排毒嘅維他命水（Detox Water），此外，仲有橙汁、菠蘿汁，以及多款汽水、啤酒，全部都喺任斟任飲。

小弟一向喜歡飲蔬果汁，所以，成晚飲咗幾杯紅菜頭梨汁再溝菠蘿汁，清涼香甜，味道特別，而且，堅用新鮮紅菜頭及雪梨打成，因為飲到尾有唔少果渣沉底，「睇」得出真材實料。

田園徑

有睇開小弟食評嘅都會意識到，食親自助餐就一定喺食沙律先，以「田園徑」為名嘅沙律吧，喺健怡嘅客人之選，4款沙律菜、十多款配料，再加足足8款特色醬汁，如野雜莓油醋汁、檸檬青檸汁、香橙牛油果醬……都非常有特色，DIY砌出美味嘅沙律碟絕無難度。

總有啲人就唔想煩，搞咁多，有4款預拌好嘅沙律：龍蝦荔枝沙律、牛油果燒雞沙律、雜菌沙律及紅菜頭南瓜沙律，睇起嚟配搭都頗有心思。以及，細細碟嘅XO醬玉子豆腐沙律及蟹肉沙律，的的骰骰。

冷盤區

而就在沙律吧旁，通常都會見到冷盤嘅蹤影，除煙三文魚、刁草醃三文魚、凍肉腸之外，仲有較少見嘅谷巴火腿，睇起嚟光澤油潤，誇張啲講句，唔食都知好好食，哈哈！

揀吓揀吓砌咗一大碟沙律配檸檬青檸汁搭香橙牛油果醬，再夾啲冷盤作為是晚嘅頭盤，拼湊得色彩繽紛，賣相好睇都令食慾提高啲。沙律菜好爽脆，兩款醬汁擦出酸活火花，其他配料均用料不賴，冷盤嘅火腿果然一流，值90分嘅頭盤。

素食街

近年人人都講「Go Green」，素食大行其道，所以，餐廳一角都變為小規模嘅素食街，枱上放有兩款餐湯：合掌瓜豬骨湯、南瓜忌廉湯、幾款歐陸麵包、三文魚撻、印式薄餅、炸雜菜、印式雜菜咖喱、印式飯。個人覺得，如果叫得素食街，豬骨湯改為素菜湯就更貼題。

食完道自家製頭盤，就嚟一道西湯暖吓胃，咁先喺養生之道。個南瓜忌廉湯好得，南瓜味突出而清甜，口感幼滑；正所謂飲啖湯，食個包，幾款歐陸包就隨意揀咗個香草包，而另一款中式包點喺友人極力推介，咩包咁耍家？就喺放晌熱盤區名為「禾稈冚珍珠」嘅龍蝦鮑魚大包，真喺堅大大隻鮑魚及龍蝦肉塞晌裡面，包身鬆軟唔黏牙，實在食得豪氣。

海鮮街

食自助餐又點會無海鮮吖，將凍海鮮區命名為「海鮮街」，長蟹腳、龍蝦鉗（龍蝦身就用作做成熱盤區嘅另一款美饌）、小龍蝦、凍鮮蝦、翡翠螺、青口一一以冰鎮住，配以泰式海鮮汁、咯嗲汁、檸檬角，不時經過都見補給快手。

揀咗數款海鮮，加多碟蟹肉青瓜沙律，雖然無生蠔供應，感覺總有少少失色咗啲，但啲凍海鮮質素唔錯，最正就梗喺龍蝦鉗，啖啖肉，爽呀！

姬松茸清燉龍躉骨湯

突然間聽到啲拍掌聲，好似燒炮仗咁劈劈啪啪咁，原來推出幾鍋原盅燉湯，即時人龍立現，無他嘅，好嘢就自然喺搶手啲，問問師傅，是夜嘅燉湯喺「姬松茸清燉龍躉骨湯」，夠晒養生滋補。

難得咁正，點都要排吓嘅，碗湯果然真材實料，撈一撈真喺勁足料，除姬松茸、龍躉骨，仲有老雞，個湯色澤深沉，入口卻異常滋潤清甜，誇張少少講，確喺啖啖精華飲落肚。

東瀛路

經過之前嘅「海鮮街」、「田園徑」、「冷盤區」，就會見到「東瀛路」，顧名思義就喺供應和食嘅地方，有多款刺身、壽司、卷物，並有迷你丼飯、冷麵、冷烏冬及少量漬物、小食，由於款式嚟講對我就唔算太吸引，所以，呢次就無試到佢哋啲日本嘢，但同枱老友試過就話唔錯，啲刺身夠新鮮，而抹茶冷麵好好食。

就晌東瀛路側邊，分別有兩大區域：「麵食里」及「點心街」，前者唔使多講，大家心領神會都知喺乜，而後者所謂點心非一般所諗到嘅蝦餃、燒賣、叉燒包。

點心街

為回應自助餐主題「黃金歲月」，晌一小截「點心街」之下，大廚炮製咗一系列加入鹹蛋黃嘅「黃金」美食，包括黃金焗蟹蓋、黃金墨丸、黃金魚餅、黃金蝦片及黃金魚皮，邪惡而吸引，講句膽固醇萬歲之餘，唯有再飲多兩杯蔬果汁或維他命水，令自我感覺良好啲啦。

麵食里

自助餐嘅粉麵小弟一向好少掂，皆因太易飽肚再食唔到啲咩，但睇見麵條（5款）、配料（近30款）都有咁豐富嘅選擇，可以講得陣容強勁，而最難得幾位老友都想食，所以，我哋就要一碗嚟「些牙」。

有清雞湯、豬骨湯和喇沙湯供選擇，當然後者喺眾人心水，配菠菜麵，再加上7、8款配料，真喺未試過咁豪嘅「車仔麵」，實在太豐富喇，而個湯底又確喺好正！

黑毛叉燒狗仔粉

講懷舊嘅食物，實在諗吓諗吓有唔少，餐廳就特別設計咗幾款並輪流登場，今晚就遇到嘅懷舊香江滋味喺狗仔粉，喺80年代嘅屋邨美食，依家都仲有，但已賣少見少，故此，都甚為懷恨緬。而呢碗喺非一般狗仔粉，除湯汁濃稠，並配上蝦米、冬菇、冬菜、豬油渣，提升口感之外，更升級以西班牙黑毛豬入饌，做成鬆化嘅叉燒，讓我哋一班老鬼尋回一份兒時嘅回憶。

熱盤區

直長嘅開放廚房，擺有十多款熱盤美食，包括極搶手，幸而補充得快嘅白汁焗波士頓龍蝦，以及上文提過嘅龍蝦鮑魚大包，跟住就一口氣介紹埋仲有咩陣容先，分別喺龍躉皇豆腐、紅燒乳鴿、鮑魚菇扒時蔬、印度咖喱雞、焗芝士肉醬千層麵、西班牙海鮮飯、香草烤羊架、蒜蓉粉絲蒸扇貝、啫啫龍躉煲……等等，當中有啲熱盤會不時轉款，但單睇呢個牌面已相當吸引啦。

燒烤區

晌熱盤區嘅一截之上，另僻為製作燒烤食物，有燒三文魚、燒牛仔骨、燒菠蘿、燒三文魚及燒珍寶雞翼。睇住師傅密密咁燒，引發香氣四溢，吸引唔少食客。

燒烤區前放咗多種特色醬汁，包括薄荷啫喱、芫荽莎莎、菠蘿莎莎、泰式魚露，以及一啲燒汁、芥末，喜歡配咩食物就隨自己喜好，無話薄荷啫喱硬配羊架嘅，食自助餐就有呢樣嘢好玩。

原條烤肉

自助餐必見嘅烤肉就晌開放式廚房尾，是晚主角喺燒原條西冷牛肉，燒得外觀焦香，加上燈光，又喺一款極盡誘人嘅美食。此外，仲有多款烤蔬菜作配搭。

由於試咗啲粉麵及狗仔粉，又要留肚跟甜品拼搏，所以，熱葷就唔敢拎太多，只喺攞咗龍蝦、燒西冷及龍躉皇豆腐。龍蝦唔使講，啖啖肉，又多膏，就梗喺好食啦；燒西冷亦睇得出有水準，表層有少少焦香，內層色澤粉嫩，肉質軟腍而富肉香；反而，龍躉皇失色少少，有種蒸過火少少嘅感覺，肉質未夠細膩。

即炒XO醬龍蝦腸粉

本來準備跳落最後一環食甜品，但好友拎咗一大份XO醬龍蝦腸粉，香氣撲鼻，啲龍蝦又大大件，忍唔住手夾咗幾炷試吓。經過XO醬「洗禮」，腸粉爽滑惹味，蝦肉又彈牙，好嘢就更喺要共享。

懷舊老街

甜品嘅款式都佔整體食物幾大比例，加上今次以懷舊為主題，更多咗細路仔時嘅本土零食。先講講「懷舊老街」呢一邊，甜品有自助班戟機、鮮奶燉蛋、焗西米布甸、豆腐花、焗葡式蛋撻、金箔脆麻花、花塔餅、花生糖、鴨頸糖、朱古力噴泉（外型更比較特別）。

此外，幾款新鮮生果及特色芝士盤，Brie de Meaux、Gruyère、Camembert，並配有克力架及乾果，亦能夠晌呢度搵到。

甜蜜里

就晌「懷舊老街」對面，擺放咗超多款的的骰骰嘅甜品，如香芋雪芳蛋糕、蘋果杏仁撻、經典拿破崙、抹茶朱古力蛋糕、冧酒提子芝士蛋糕、黑森林蛋糕、焦糖燉蛋、香芒布甸、朱古力布朗尼、阿華田奶凍、蜜瓜豆奶布甸、甘筍蛋糕，絕對夠晒甜蜜。

晌呢邊，又多擺咗幾款懷舊甜點，包括連埋個小販箱嘅糖蔥餅、合桃牛油蛋糕（即喺嘉頓仲有賣嗰隻）、蛋花大菜糕、紅豆糕、龍鬚糖、芝麻卷、麥芽糖夾餅，後方少少仲有一大堆糖果玻璃盅，上年紀嘅朋友一定知喺乜，嚟到仲可以邊食邊講番兒時趣事，勾起一段段回憶。

小弟嘅甜品拼盤就新舊款式都有啲，新嘅就拎咗芒果慕絲蛋糕、布朗尼、甘筍蛋糕、鮮奶燉蛋、蘋果杏仁撻幾款，整體水準不俗，最欣賞喺布朗尼及杏仁撻，味道及口感都好得；舊款就拎咗脆麻花、龍鬚糖及糖蔥餅，喺無晒啲麥芽糖夾餅，呢啲舊式甜點一樣做得OK喎，喺龍鬚糖可能擺得耐，口感無咁鬆化，但脆麻花真喺好食，但更重要喺多一份感情。