奇華餅家 Kee Wah Bakery：松心所欲

唔知咩時候，奶皇月餅比傳統嘅蓮蓉月餅更成為主打咁，家下啲餅店、酒店、酒家、食肆推出嘅月餅大多數喺奶皇月餅。個人覺得，奶皇所做出嚟嘅變化比較多，可塑性強，當然利錢亦非常之高。中秋將至，總會收到少少月餅，友人送嚟一盒正就是奶皇月餅，出自「奇華餅家」。

禮盒外觀以橙白雙色配襯，並以簡約金線勾畫出跳躍嘅小兔，予人感覺清雅不俗氣。而呢盒名為「鴛鴦奶皇」禮盒，內有4個迷你松子蜂蜜奶皇月及4個迷你蛋黃奶皇月。

打開包裝，先有一張店家嘅推薦食法介紹，以微波爐翻熱又得，用小焗爐烘熱都得，睇公仔一睇就明。翻熱後，可令奶皇餡烘得更綿滑芳香。

講到包裝，每個獨立包裝夠晒衛生，每個月餅面都有「奇華」或「蜜」字樣式屬喺咩口味，唔使擔心搞錯。

迷你松子蜂蜜奶皇月

兩款月餅都烘得金黃，字紋清晰，先試試個松子蜂蜜奶皇月，奶皇嘅色澤偏淺，但帶有陣陣蜂蜜清甜味，奶皇搭蜂蜜確喺幾醇香嘅配搭；此外，混入粒粒松子仁，多咗份口感之餘，更喺健康有益。一次過食完兩個，都仲回味緊呢份天然滋味！

迷你蛋黃奶皇月

印象中，兩三年前都食過「奇華」嘅蛋黃奶皇月，今回再食，仍覺得水準依然。切開一睇，皮薄而入口鬆化，餅底更有少少鬆脆感，餅心嘅奶皇餡色澤橙紅，烘熱後散發陣陣蛋香，食落口感軟綿幼滑，卻又有少少起沙嘅感覺，非常之好食。

做人嘅嘢未必事事隨心所願，但揀食咩月餅咯喎，點都可以從心所欲啦！

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
奇華餅家 Kee Wah Bakery
觀塘觀塘道418號創紀之城五期apm1樓26B號舖
3148 9040