東海堂嘅蛋糕食過唔少，亦知佢哋用料精，以日本食材為主，所以，就算喺Cafe都有信心幫襯。除一般東海堂餅店嘅出品之外，如蛋糕、麵包，主要就喺多咗啲主食。2人餐喺我哋嘅目標，因為只賣$128，可選沙律拼意粉，或要晒兩客意粉，單喺散點依兩樣都已經超過個套餐價，即喺等同平咗之餘再送兩杯熱飲。
不過有啲可惜，落單前店員話整十勝花畑牧場芝士碎部機壞咗，啲意粉提供唔到芝士，我都照落單皆因老婆依家戒芝士，當喺益佢啦。
落單後，沙律可以先攞，因為喺自選款式，其他嘢食製作需少少時間，俾個傳呼器你埋位等，唔使成堆人企晒晌鋪面。
沙律分兩個份量，細份可揀兩款沙律（$42）， 大份可揀三款沙律（$58），雖然佢無講個重量，但單睇個盒嘅大細，大份應比細份多1/3左右。而選擇方面，共有4款：煙肉蘿勒醬螺絲粉沙律、凱撒沙律、日本南瓜沙律 及粟米煙肉沙律。
沙律盒（大份，散賣價$58）
份量真喺唔講得少，由於小弟揀咗煙肉蘿勒醬螺絲粉沙律、日本南瓜沙律 及粟米煙肉沙律，幾樣都喺墜手嘢，加上店員姐姐喺咁堆，所以，盒沙律好重手，拎起嚟估計都有磅半重。
3款沙律都用足料，味道調得好，煙肉蘿勒醬螺絲粉沙律嘅蘿勒醬唔喺落得好重，輕輕香草味，始終喺食緊沙律，不宜太重，而螺絲粉煮得質感帶爽，配合煙肉嘅鹹香，所以，的確做得好食；日本南瓜沙律唔單啲南瓜粉甜且有南瓜香味，並以蛋黃醬作主要醬汁，更加入唔少碎蛋，老婆超鍾意；反而個粟米煙肉沙律先有意外驚喜，諗住佢只喺粟米同煙肉，應該普普通通，首先煙肉喺用咗辣肉賜，味道已經好唔同，再者，沙律內更混入意大利米形意粉，寧舍有咬口，加埋超甜粟，真喺無欺場。
花畑芝士鮮蝦蕃茄意粉（散賣價$78）
缺少咗啲花畑牧場芝士碎，當然令整道菜式賣相差一截，變得無咁有睇頭，亦引發另一個問題，就喺啲蕃茄醬汁勁稀，我估佢哋原先嘅設計喺做稀少少，混埋啲芝士碎就啱啱好，不過，依家壞機無咗芝士碎，佢哋缺乏應變，個汁都仲喺咁水汪汪就唔理想。還好嘅喺意粉煮得恰到好處咬落有韌勁，蕃茄汁底酸香鮮活，鮮蝦爽口，所以，少咗啲芝士碎成為美中不足嘅遺憾。
3.6牛乳抹茶紅豆 +$6
加入北海道3.6牛乳嘅抹茶，質感比較挺身，而且，帶頗濃嘅奶味，但抹茶味仍然保持到，熱辣辣，入口暖笠笠，真喺唔錯。加埋仲有啲紅豆食，雙重享受。
炭燒咖啡
小弟都喺喜歡揀杯咖啡飲吓，不過，就無特別加錢飲其他，只喺跟餐嘆杯炭燒咖啡，先呷一啖齋啡，真喺幾醇香，有一朕朕焦苦味。但我都喺鍾意飲加奶嘅咖啡，糖奶自取，多少隨意。
不知不覺，2016就咁過咗，唔知你晌依一年做咗咩大事小事，抑或一事無成。我無刻意晌生活上追求啲乜，一貫做人既來之則安之，但做人唔會唔知唔覺咁過，感恩嘅事多得很，淨喺病痛少過舊年就要感恩啦！
個人評分
味道：8/10
環境：7/10
服務：7/10
抵食：8/10
平均每人消費：HK$67
味道：8/10
環境：7/10
服務：7/10
抵食：8/10
平均每人消費：HK$67
餐廳資料：
東海堂 Arome Café
葵芳興芳路223號新都會廣場2樓297-298號舖
3460 4742
東海堂 Arome Café
葵芳興芳路223號新都會廣場2樓297-298號舖
3460 4742
沒有留言:
發佈留言