香港郵意明信片航海主題咖啡廳 Postcollectionhk Cafe：力爭上郵

集郵一向興趣唔大，不過，以前年輕無乜能力去依度嗰度，所以，有朋友去外地旅遊，就梗會麻煩佢哋寄張明信片返嚟留個念，故此，收收埋埋唔少明信片。不過，依家互聯網加上智能電話嘅發達，越嚟嚟無人願意寄名明信片，取而代之就喺whatsapp發過嚟嘅風景相。早前晌友人FB見到依間「香港郵意」咖啡店，好得意，又可以嘆靚啡，所以，搵晚收工過嚟迤吓。

果然，由門面到裡面，都充斥着明信片及航海依兩個主題。雖然，餐廳位處後巷，條巷亦有啲污糟，感覺上確喺有點輸蝕，不過，走進店內，唔單止地方大，樓底高，座位都唔會排得好逼，感覺寬敞愜意。

點餐後，再周圍參觀吓，入門口左邊牆上及天花都掛滿好多明信片，而右方更有個攤位擺咗好多明信片作販賣，當中不乏本土色情。

此外，門口嘅舢舨、航海地圖、帆船模型……等等，餐廳主題嘅擺設。

一大張餐牌，底面兩頁，前面印晒所有食物，包括沙律、小食、飯類、意大利粉及數款全日早餐。另一面就喺飲品及甜品，包括各種咖啡、生果梳打及熱花茶。餐牌可能有啲沉悶，但水吧上方嘅黑板，以唔同色情嘅粉筆寫晒餐廳各種食品、飲品，就顯得醒神。

由於餐廳採用半自助形式，晌出面櫃位點餐後，就由店員送上，不過，要清水、其他調味料、餐碟……等等，就要自助，晌水吧前嘅矮櫃自取。順帶一提，矮櫃下仲有啲旅遊書，歡迎自取閱讀。

瑪琪雅朵咖啡 $38

平時晌咖啡店首選喺鮮奶咖啡，今回改飲瑪琪雅朵咖啡，喺一份濃縮咖啡再加一小羹奶泡，店員送上咖啡時講咗句話如果覺得濃得滯就沖過杯俾我，我當佢喺講笑。瑪琪雅朵細細杯，咖啡味確喺好濃縮，但入口無想像中咁苦澀，咖啡香嘅餘韻長。

薑餅人拿鐵 $48

友人同我一樣都喺喜歡飲鮮奶咖啡，所以，揀拿鐵，但佢話未試過加入薑汁嘅拿鐵，故一於要杯薑餅人拿鐵。拉花圖案線條細緻，奶泡打得綿密，撞入濃濃咖啡好均勻，所以，口感細滑平衡，喺杯極有水準嘅拿鐵。

作為正餐，可選擇嘅除3款全日早餐外，就仲有9款主菜俾你揀。

黑松露帶子意粉 $88

以忌廉汁煮好嘅意粉，再加上一撮黑松露醬，所以，食時需先撈勻，幽幽嘅黑松露香，隨意粉嘅熱力散發。啲意粉煮得啱啱好，有咬口，掛滿忌廉汁，黑松露味香我嚟唔會太搶，而帶子呎吋屬大呎碼，幾鮮甜爽口，唔似雪藏貨，可惜得3粒就梗唔夠喉啦！

黑椒牛仔骨飯 $78

睇落份量頗大，牛仔骨亦唔少，不過，牛仔骨其實屬骨多嘅肉，所以，肉地唔多，亦有少少過韌；但喺，配上炒飯底，算做得有誠意，而已，個黑椒汁好惹味，內裡加入好多洋蔥粒，撈飯一流。

焦糖雪糕香蕉窩夫 $78

老友都算喺窩夫「粉絲」，見食完正餐都仲有虛位，點多客窩夫嘆吓，窩夫有兩款口味，一喺就香蕉，一喺就雜莓，但亮點喺伴上Movenpick雪糕，我哋揀咗前者，因為焦糖喺小弟嘅心水口味。

窩夫無乜花巧，方形一大件過，睇得到香蕉經過焦糖化，一大球雪糕球襯住，賣相不俗。至於味道如何，Movenpick雪糕確喺一份保證，雪糕幼滑富奶香，焦糖味十足，更混入杏仁粒，而香蕉夠熟又有焦糖味，更估唔到雪糕底下添加咗啲消化餅碎，增加多咗啲口感。唯一挑剔喺窩夫雖則軟熟，但蛋香比較弱。

同場加映，貓星人四圍走，目測店內有兩隻貓，一隻啡白，一隻全白，成晚走嚟走去，擒高擒低，爬入廚房，又走出大廳，百厭到不得了，幾難先見佢定定哋被我影番一張相。

好鍾意「香港郵意」個環境，因為舒服好迤，同朋友飲杯咖啡，食件蛋糕，傾吓偈都喺非常爽嘅事。不過，睇勻都唔見有蛋糕套餐之類，再向店員查詢，原來喺有啲Afternoon Set，配蛋糕、沙律或小食，款款都喺$58，跟餐飲，喺晏晝迤選。

逢星期一，咖啡仲有買一送一，咁下次我識邊日落嚟幫襯。

依度嘅咖啡無疑喺好出色，食物亦具質素，上次晌尖東嘅My Little Coffee已經覺得喺一間好唔錯兼有個性嘅咖啡店，今次嚟到香港郵意，同樣有個性，絕對喺間有能力力爭上游嘅咖啡小店。

個人評分
味道：8/10
環境：8/10
服務：7/10
抵食：8/10
平均每人消費：HK$165

餐廳資料：
香港郵意明信片航海主題咖啡廳 Postcollectionhk Cafe
灣仔安樂里地下D舖
3702 1078