餐廳位處銅鑼灣地鐵一出對面嘅京都廣場7樓，相當便利。門口大大個黑底白光店名，加埋「鳥」字餐廳商標，都幾難會搵錯地方。走入店內，地方唔大，但枱櫈排得唔密，感覺都闊落；兼且裝修雖簡約，但就大玩色彩繽紛加韓風元素，電油桶嘅櫈打開就成為儲物箱。
枱上放齊鐵筷子、鐵匙羮及叉，仲有把大較剪及骨碗、清水，一切開餐用具，全民自決。不過，其他服務，同樣貼心到位，店員亦好好禮貌。可能喺星期六嘅晏晝，客人無夜晚咁多，我哋食都食得輕鬆啲。
餐牌從缺，因為一張點菜紙，底面兩版，圖文並茂，中英韓文，一目了然。自己剔剔剔，就完成點菜程序，減少口述之誤。
Edison Square（柚子+芒果）$48
無嚟3年，辛安東嘅飲品都轉晒為多款特飲，所以，我哋都試試佢哋嘅特飲。其實唔多知個名嘅含意，大抵喺啲雜飲。友人話味道OK，芒果味重啲，只喺賣$48無我哋其他兩款咁抵飲。
Smoothie Cider（乳酸）$48
依一款就明顯喺Smoothie+Cider，不過，上枱時喺將兩者分開上，好處喺先品嚐個乳酸沙冰，友人話好益力多味，酸爽醒神，啱晒行完山飲，沙冰打得夠幼細。之後，自行添加西打，加多加少隨心意，令沙冰多咗重汽泡感，非常有趣。
Smoothie Light（芒果）$68揀依一款特飲，貪其成支炮咁大杯，可以慢慢飲。以梳打水加入芒果沙冰度，長飲長有，芒果味無欺場。
辛安東元祖奶奶雞 $148半隻 / $228全隻
既然嚟辛安東，就梗喺點元祖奶奶雞啦，我哋3個人，半隻就好夠食，因為奶奶雞唔淨喺有雞件，仲有水晶粉、青瓜、甘筍、薯仔等等，好大碟頭，此外，以韓國運嚟嘅走地雞烹煮亦成為其賣點。據我記得，奶奶雞喺落單先做，所以製作需時約15-20分鐘左右。友人喺四葉妹嘅「粉絲」，所以，都情商個公仔借嚟影番張相。
雖然半隻，都果然好大份，雞件入味嫩滑，墨漆漆嘅醬汁濃郁惹味，配菜亦好好食，至於啲水晶粉，咬口柔滑。
牛肋肉生菜包 $78
10款小食中，我哋揀咗牛肋肉生菜包，一客有5件，賣相精巧，生菜之上有燒牛肋肉及辣泡菜，食落集清爽、柔嫩、爽脆嘅口感於一身，味道濃香帶少許辛辣，值得捱介！
真露煮蜆 $68
記得之前試過，所以，推介俾佢哋試，以韓國燒酒「真露」去煮，就如日式嘅清酒煮蜆，法式嘅白酒煮青口。個菜最有趣嘅地方就喺以銅壺呈上，食完蜆，又方便倒出真露清湯享用。蜆雖然唔大隻，肉地薄，但味道算鮮甜，帶微微酒香，不過，臨尾飲咪個湯先喺精髓，非常鮮香。
蘆筍韓牛炒飯 $88
老友喺飯底之人，所以，點一客炒飯實可以填飽大家個肚。石頭窩飯喺傳統韓式飯品，以石鍋載住，熱力逼人。飯底以露筍、韓牛粒、青豆炒成，再加上蔥花，飯粒炒得夠乾身，味道均勻，熱辣辣，又有飯焦，正喎。另附有一碟紫菜，正確嚟講可以用嚟包住啲飯食，又或貪得意撕碎拌飯都得，別有一番滋味。
臨尾，都講下是次薄扶林公園嘅郊遊徑，主要喺港島徑駁家樂徑，好易行，無乜難度，大概1.5-2小時就可完成，沿途樹蔭多，有唔少溪澗，不過，依啲秋冬季節就無乜溪水。借用老友嘅四葉妹，分享一下沿途照片。
總結埋餐午飯，對比番以前嘅食評，除咗奶奶雞之外，其他幾樣嘢都無加到價，個生菜包仲平咗添，而水準我就覺得保持到喇，尤其個真露煮蜆，喺大家一致公認是日最好食嘅菜式。
個人評分
味道：8/10
環境：8/10
服務：8/10
抵食：8/10
平均每人消費：HK$205
味道：8/10
環境：8/10
服務：8/10
抵食：8/10
平均每人消費：HK$205
餐廳資料：
辛安東元祖奶奶雞 Spicy Andong
銅鑼灣駱克道491-499號京都廣場七樓
2328 8917
辛安東元祖奶奶雞 Spicy Andong
銅鑼灣駱克道491-499號京都廣場七樓
2328 8917
沒有留言:
發佈留言