因為依間百樂門主力有搞婚宴，所以，個大堂認真富麗堂皇，不過，我哋揀食6:00pm頭輪，所以，初段客人唔多，但轉眼已經坐滿全場，亦見有部份枱有翻枱情況，做冬大過年都無乜點錯。我哋一行27人，佔兩圍枱，可謂人才濟濟，大家拍埋啲都夠坐得晒。
其他鎖碎嘢就唔多講，服務做足基本，部長、侍應都有禮貌，就單刀直入講餐飯。「冬至快樂套餐」ABC，唔同價錢主要代表唔同人數嘅套餐，我哋咁大棚人，就梗喺要C餐啦，$2,488圍，但就無咗舊年提前落訂可以減$200嘅優惠。此外，我哋每枱都多過12人，佢哋都執正收番多出人頭嘅茶芥，然而，份量上絕對夠一圍13、14人食。
叫得全包宴，就梗喺包茶芥、前菜、汽水連加一，不過事後俾錢先留意到，佢哋張菜單喺無標明全包宴，咁唔包乜？咪就喺啲前菜花生，成為鬼馬嘅隱藏收費。
乳豬大拼盤
拼盤有乳豬、叉燒、燒鴨、海蜇及油雞，跟上年嘅一樣，呢啲就喺連鎖酒家做嘢慣性，大時大節嘅套餐，就喺近乎一年抄一年，當然，對食唔多要求嘅親友，啱食就得喇。況且，啲燒味都幾好食，乳豬唔太肥，皮脆肉香；叉燒屬全瘦，但燒得香口唔韌；燒鴨有油香，又無乜羶味。
瑤柱扒時蔬
時蔬只喺菜心，外觀有啲黃，仲煮得些微過腍，只可以講喺碟頭夠大，落瑤柱無手緊，好多瑤柱絲，味道平穩。
碧綠蝦球蚌片
依道菜就炒得好味在於食材應有嘅質感都發揮到出嚟，蝦球爽口彈牙，蚌片有咬口但一啲都唔韌，而西蘭花煮得恰到好處，唔會飛水飛到腍晒，加啲三色椒令道菜個樣又唔會咁寡，兼且好足鑊氣。
黃金帶子海皇卷
可以講喺粗製濫造嘅出品，因為，既然喺炸嘢，但上到枱都唔覺得有熱辣辣嘅感覺，此外，皮厚成糰粉，腍晒唔脆口，裡面都喺啲蔬菜粒，帶子粒就得好少，認真麻麻。
紅燒花膠海味翅
照慣例，翅已經成為唔食嘅菜式，所以評唔到好唔好食。不過，聽親友講，個翅幾足料，啲魚翅唔喺碎濕濕，都好一排排咁，高湯內又有啲花膠，都算交足貨。
清蒸大龍躉
除咗道碧綠蝦球蚌片之外，條大龍躉就喺第二道有水準嘅菜式，睇外型應足3斤重，夠晒大條兼蒸得火候啱啱好，中心位一夾就離骨，肉質又嫩滑細緻。
蠔皇金錢海鮑片
叫得海鮑片，就當然唔會喺真鮑魚啦，咁海鮑片喺乜？部長話喺螺片一類，不過，切片後，外觀、口感跟鮑魚都十足十，再者，個蠔皇茨汁蠔味濃，稀杰度推得啱啱好，啲冬菇又夠晒大隻厚肉，菇味十足。
當紅炸子雞
繼碧綠蝦球蚌片及清蒸大龍躉之後，第三道做得有水準而好食嘅菜式就喺隻炸子雞，炸得皮脆肉嫩，又有雞味，咁就已經足夠。
臘味糯米飯
回顧舊年個食評，佢哋喺寫「生炒」臘味糯米飯，食落感覺喺炒出嚟，飯粒分明又煙糯。不過，今年個飯真喺唔得，未至於難食，但就唔多好食，今年唔加「生炒」二字，再睇睇啲飯，明顯就喺煮出嚟，味道還可以，但飯粒腍爛，失去晒糯米飯嘅煙糯感。
鴻運慶團圓
今次食頭輪，酒樓都想我哋早啲食完就可以還枱俾下一輪客，所以，今次就唔會發生舊年呆等湯圓事件。果盤及紅豆沙湯圓同步送上，紅豆沙湯圓質素普通，連加片陳皮嚟煲都懶做，但總好過上次又杰又唔熱。
鮮果拼盤
西瓜加橙，低成本生果，所以無乜好寫，影張相留個記錄而已。唯一抽吓水仲有得講嘅，就喺啲橙一開八，成碟果盤只喺用咗一個半橙，所以，咪以為成碟好多呀！
同場加映，就喺慶祝埋其中一對表姨生女及表姨生仔嘅生日，但老套嘅老豆買咗個老土嘅生日蛋糕，依類鮮果忌廉蛋糕真喺多年無乜點食過。酒樓既唔收切餅費，又提供埋膠叉及換上新碟，而且成晚嘅招呼真喺唔錯，整體嘅服務達標。
除咗海皇卷同糯米飯明顯差一大截，其他都算喺咁，況且平均每人二百落樓，食到大家飽晒，算唔錯啦，加上今次服務又唔錯。食完餐飯都喺八點鬆少少，之後行街嘅行街，返屋企嘅返屋企，仲有成晚時間處理私人嘢，所以，食頭輪啲時間都喺好用啲。
個人評分
味道：7/10
環境：8/10
服務：7/10
抵食：7/10
平均每人消費：HK$200
味道：7/10
環境：8/10
服務：7/10
抵食：7/10
平均每人消費：HK$200
餐廳資料：
百樂門宴會廳 Paramount Banquet Hall長沙灣元州街388號肇如大廈2樓
2111 9833
沒有留言:
發佈留言