山區裡的走走趯趯: 星廚 Star Cucine：有星有色

2016年12月11日星期日

星廚 Star Cucine：有星有色

香港嘅茶記故然一個本土嘅代表，但港式西餐亦喺一個不可或缺嘅部份，兩者晌飲食圈都扮演相當重要嘅角式。隨經濟變化，唔少港式西餐廳嘅出品已唔再停留晌普普通通嘅水平，所做嘅菜式已做得好精緻、好有特色，又敢用上靚料入饌，但勝在價位唔高。最近，老友推介嘅「星廚」，就專登走訪一回。

星廚屬小店格局，所以，枱櫈編排都有點逼，鬼叫香港租金貴咩。雖然喺咁，你見有唔少街坊幫襯，就知質素應該差唔得去邊。再者，有留意嘅話，見到牆上掛上盆栽、小畫，喺唔錯嘅點綴，當然嚟得依度重點就晌食物處，而非食環境。

午市主要都喺做套餐，午餐都算十眾化，包餐湯、熱飲，加多一小球雪糕做甜品，定價都喺$40-$48，亦唔使收加一。

不過，推介嘅老友話，嚟到食午餐，唔喺話唔好，但主餐牌嘅菜式先喺「寶物沉歸底」，所以，都睇睇主餐牌先再作決定。翻一轉餐牌，除小食，有幾款精選單點菜式：油封鴨脾、鹹豬手及牛肋骨，但可以加$15轉為套餐，不過，睇落份量頗大，一個人食似乎太滯喇。

此外，仲有主菜類、意大利粉及飯類，依幾樣本身就已經喺以套餐形式供應，包餐湯、包熱飲，價錢雖然比午餐貴，但用料睇落具質素好多。如想食甜點，可以用優惠價加配幾款甜品，如法式焦糖燉蛋、意大利芝士餅……等等，不過，主要喺晌晚市供應。

野菌忌廉湯（跟餐）

個湯睇樣已經覺得好足料，入口果然菌味強，好濃郁雜菌味，明顯喺保留好多微細菇粒，所以，比一般以柔滑為主嘅忌廉湯就重口感啲。

最後決定從主菜入手，主菜類共有6款，基本上牛羊豬魚類都有，今次就唔食羊嘢，試吓個法式豬扒，因為，豬扒做得好都唔容易。

香煎美國穀飼法式豬扒配飯 $138

賣相掂喎，唔單因為厚切大大件有睇頭，煎得外層焦香，而配菜有炸薯角，什菌加沙律菜，估唔到仲加少少黑醋提味，比港式西餐高一個層次。而件豬扒煎得火喉都唔錯，咬落肉質帶點爽，富肉汁，唔會「嚡烚烚」，不過，個人覺得配洋蔥汁會顯得普通少少，如果改改用蘋果醬或者更有亮點，之前就食過一間店嘅豬鞍，件芥末莎莎，效果亦唔錯。