拉門而入，講明喺小店，地方就唔會太大，除近門口左邊向街喺L形高腳枱櫈，其他就喺二人枱。一室木系，裝修簡約，牆上掛上嘅鉛筆素描，氣氛悠閒之餘，令室內更添點點藝術氣息。如大多數咖啡小店，賣咖啡、輕食之餘，咖啡豆、咖啡壺、磨豆機……等等咖啡相關產品，都成為其副業嘅收入來源。
餐牌一頁A4紙睇晒，包括三文治、餡批、酥餅、窩夫、咖啡及其他飲品。雖則話店內主要提供輕食，但一樣有午餐供應，仲去到4:30pm。不過，我哋一心一意嚟嘆下午茶，一件蛋糕、一杯咖啡喺我哋嘅目標。
店主話佢哋一般每日會供應4款蛋糕左右，走到凍櫃前，雖然只剩番3款選擇，但3樣都啱食，友人睇中朱古力香蕉蛋糕，小弟則揀件甘筍蛋糕。款款都喺賣$32，配任何一款咖啡成為套餐，都只喺$52。
朱古力香蕉蛋糕 $32
個蛋糕賣相有啲眼熟，睇一睇番自己嘅食評，跟早前晌佐敦Café Hillywood食嘅香蕉朱古力蛋糕一模一樣，後尾跟店主傾開，佢哋啲蛋糕部份嚟貨，部份自家製，仲話今日整咗超好食嘅芝士蛋糕，如果我哋早啲嚟就仲有得食。然而，試咗友人嘅朱古力香蕉蛋糕兩口，一層夾一層嘅香蕉蛋糕同香蕉果蓉，引發出嚟嘅香蕉味都幾香濃突出，面層嘅朱古力漿亦夠濃郁，只喺未夠軟滑而已。
甘筍蛋糕 $32
甘筍蛋糕質感比較粗，但唔等於唔好食，蛋糕內好多果仁碎及合桃碎，非常有咬口，又帶有少少玉桂味，當然，如果你本身唔鍾意啲堅果類食材，依件蛋糕就唔喺你杯茶。此外，中間及面層一層層白色喺忌廉芝士，唔算好軟滑，但芝士味香濃，又無預期咁甜，所以，整體嚟講真喺幾好食。
Flat White $35
友人都喺咖啡迷，飲咖啡比小弟要求高，佢就揀咗杯Flat White，都喺鮮奶咖啡嘅一種，只喺濃縮咖啡跟熱奶嘅比例唔同，理應唔加奶泡所做出唔同嘅效果。單睇細緻嘅天鵝拉花，仲要鵝頭拉成心形，湖水泛泛，感覺唔打得都睇得，但老友話杯嘢就真喺幾「打得」，口感綿密順滑，咖啡醇香中滲出點點果香味，質素甚佳。
Latte $35
我就揀番心水嘅Latte，一來較喜歡飲加有奶嘅咖啡，二來喜歡奶泡帶嚟嗰份綿密感。店主沖泡嘅手勢一流，咖啡面唔會起晒泡泡，奶泡跟濃縮咖啡融和均勻，唔使攪，第一口到最尾，味道及口感一致，醇香柔滑，絕對喺上佳之作。
除銅鑼灣店外，原來尖沙咀都有分店，咁下次再幫襯就可以揀去九龍店。晌依類小店嘆咖啡，除咗各店有唔同個性外，店員都比較人性化，唔似連鎖式咖啡店啲店員咁機械，遇到健談嘅店主，仲可以傾吓咖啡，學吓嘢。總結幾家咖啡小店，各有長短，咖啡水準高，真喺難講鹿死誰手！
個人評分
味道：9/10
環境：8/10
服務：8/10
抵食：8/10
平均每人消費：HK$52
味道：9/10
環境：8/10
服務：8/10
抵食：8/10
平均每人消費：HK$52
餐廳資料：
Green Door Coffee
銅鑼灣摩頓臺25號地舖
3709 8577
Green Door Coffee
銅鑼灣摩頓臺25號地舖
3709 8577
沒有留言:
發佈留言